2 Vhathesalonika 3:1-18
3 Tsha u fhedza vhahashu, bvelani phanḓa ni tshi ri rabelela, uri ipfi ḽa Yehova ḽi bvele phanḓa ḽi tshi phaḓalala nga u ṱavhanya na uri ḽi huliswe samusi ḽi tshi huliswa vhukati haṋu;
2 na uri ri ponyokiswe kha vhathu vha re khombo na vhane vha vha vhavhi, ngauri a si vhoṱhe vhane vha vha na lutendo.
3 Fhedzi Murena u a fulufhedzea, nahone u ḓo ni khwaṱhisa na u ni tsireledza kha muvhi.
4 Zwiṅwe hafhu, ri a ni fulufhela Murenani, uri ni khou ita zwe ra ni eletshedza zwone na uri ni ḓo bvela phanḓa ni tshi zwi ita.
5 Murena nga a bvele phanḓa a tshi ni livhisa nga hu bvelelaho lufunoni lwa Mudzimu na nga u konḓelela ni tshi itela Kristo.
6 Vhahashu, ri khou ni ṋea nyeletshedzo dzinani ḽa Murena Yesu Kristo, uri ni sendele kule na wahashu muṅwe na muṅwe a sa tshili nga maitele a Mudzimu na ane a si tshimbile u tendelana na zwe ra ni vhudza zwone.
7 Inwi ni a ḓivha nḓila ine na fanela u ri edzisa ngayo, ngauri a ro ngo vha vha sa tshimbili nga maitele a Mudzimu musi ri vhukati haṋu
8 kana u ḽa zwiḽiwa zwa muthu naho e ufhio nga fhedzi. Ro ita zwo fhambanaho na zwenezwo, ro shuma nga maanḓa na u ḓinetisa vhusiku na masiari uri ri si vhe muhwalo u lemelaho kha naho e nnyi.
9 Hu si uri a ri na ndugelo ya u wana zwiṅwe zwithu, fhedzi uri ri vhe tsumbo ya uri ni ri edzise.
10 Zwi re zwone ndi uri ro vha ri tshi dzulela u ni vhudza heyi ndaela: “Arali muthu a sa ṱoḓi u shuma, na u ḽa a songo ḽa.”
11 Ngauri ri pfa uri hu na vhaṅwe vhathu vhukati haṋu vhane vha si tshile nga maitele a Mudzimu, vha sa shumi na luthihi, vhane vha dzhenelela kha zwine zwi si vha kwame.
12 Vhathu vho raloho ri a vha laya na u vha ṱuṱuwedza dzinani ḽa Murena Yesu Kristo uri vha shume vho ḓifhumulela nahone vha ḽe zwiḽiwa zwe vha zwi shumela.
13 Vhahashu, ni songo neta u ita zwivhuya.
14 Fhedzi naho e nnyi a sa thetshelesi zwine ra zwi amba nga uvhu vhurifhi, onoyo ni mu swaye nahone ni litshe u konana nae, uri a farwe nga ṱhoni.
15 Ni songo mu dzhia sa swina, fhedzi ni bvele phanḓa ni tshi mu eletshedza sa wahaṋu.
16 Murena wa mulalo nga a ni ṋee mulalo tshifhinga tshoṱhe nga nḓila dzoṱhe. Murena nga a vhe na inwi noṱhe.
17 Nṋe Paulo, ndi khou ni ṅwalela yeneyi ndumeliso nga tshanḓa tshanga, yeneyi ndi nḓila ine ya ṱalula marifhi anga oṱhe; yeneyi ndi nḓila ine nda ṅwala ngayo.
18 Vhuthu vhuhulu ha Murena washu Yesu Kristo nga vhu vhe na inwi.
