2 Yohane 1:1-13
1 Nṋe mukalaha ndi ṅwalela mufumakadzi o nangwaho na vhana vhawe, vhane nda vha funa vhukuma, hu si vhane vha funwa nga nṋe fhedzi, fhedzi na nga vhoṱhe vhane vha ḓivha ngoho,
2 nga nṱhani ha ngoho i re mbiluni dzashu, ine ra ḓo vha nayo lini na lini.
3 Ri ḓo vha na vhuthu vhuhulu, khathutshelo na mulalo zwi bvaho ha Mudzimu Khotsi na kha Yesu Kristo Murwa wa Khotsi, khathihi na ngoho na lufuno.
4 Ndi a takala zwihulu ngauri ndo wana uri vhaṅwe vha vhana vhau vha khou tshimbila ngohoni, samusi ro wana ndaela i bvaho ha Khotsi.
5 Huno ndi a u humbela iwe mufumakadzi, uri ri funane (A thi khou u ṅwalela ndaela ntswa, fhedzi ndi ye ra vha ri nayo u bva mathomoni).
6 Hezwi ndi zwine lufuno lwa vha zwone, uri ri bvele phanḓa ri tshi tshimbila u tendelana na ndaela dzawe. Heyi ndi ndaela ye na i pfa u bva mathomoni ya uri ni fanela u bvela phanḓa ni tshi tshimbila khayo.
7 Ngauri ho no bvelela vhafhuri vhanzhi shangoni, vhathu vha sa tendi uri Yesu Kristo o ḓa nga lwa ṋama. Onoyo ndi mufhuri na mulwa-na-Kristo.
8 Ni ḓiṱhogomele, uri ni si xelelwe nga zwithu zwe ra zwi shumela uri ri zwi bveledze, uri ni wane malamba nga vhuḓalo.
9 Muṅwe na muṅwe ane a kheluwa nahone a si dzule e kha pfunzo ya Kristo ha na Mudzimu. Ane a dzula kha yeneyi pfunzo ndi ene a re na Khotsi na Murwa.
10 Naho e nnyi ane a ḓa kha inwi a si na yeneyi pfunzo, ni songo mu ṱanganedza nḓuni dzaṋu kana na u mu lumelisa.
11 Ngauri ane a mu lumelisa u ṱanganela nae kha mishumo yawe mivhi.
12 Naho ndi na zwithu zwinzhi zwine nda nga ni ṅwalela zwone, a thi ṱoḓi u zwi ṅwala, fhedzi ndi fulufhela uri ndi ḓo ḓa kha inwi, ra amba ro livhana zwifhaṱuwo, uri dakalo ḽaṋu ḽi vhe ḽihulu.
13 Vhana vha mukomana wau, o nangwaho, vha a u lumelisa.
