Filemoni 1:1-25
1 Nṋe Paulo, tshivhotshwa ndi tshi itela Kristo Yesu, khathihi na Timotheo, wahashu, ndi ṅwalela Filemoni, mushumisani na riṋe a funwaho,
2 na Apia, khaladzi ashu, na Arakipo, ḽiswole nga riṋe, na tshivhidzo tshi re nḓuni yau, ndi ri:
3 Vhuthu vhuhulu na mulalo zwi bvaho ha Mudzimu Khotsi ashu na Murena Yesu Kristo nga zwi vhe na inwi.
4 Tshifhinga tshoṱhe ndi livhuha Mudzimu wanga musi ndi tshi amba nga ha iwe thabeloni dzanga,
5 samusi ndi tshi dzula ndi tshi pfa nga lufuno lwau na lutendo lune wa vha nalwo kha Murena Yesu na kha vhakhethwa vhoṱhe.
6 Ndi rabela uri u vha hau na lutendo lu fanaho na lwa vhaṅwe zwi u ṱuṱuwedze uri u dzhiele nṱha zwivhuya zwoṱhe zwine ra vha nazwo nga Kristo.
7 Wahashu, lufuno lwau lwo ntakadza na u nkhuthadza zwihulu, ngauri wo homolosa vhakhethwa.
8 Nga nṱhani ha zwenezwo, naho ndi na mbofholowo khulu ya u amba nga ha Kristo na u u laya uri u ite zwo fanelaho,
9 ndi khwine ndi tshi u kwengweledza ndi tshi itiswa nga lufuno, nga nṱhani ha zwine nda vha zwone, nṋe Paulo mukalaha, ane a dovha a vha tshivhotshwa ndi tshi itela Kristo Yesu.
10 Ndi khou u kwengweledza ndi tshi itela ṅwana’nga Onesimo, we nda vha khotsi awe musi ndi dzhele.
11 Kale o vha a si na mushumo kha iwe, fhedzi zwino ndi wa ndeme kha iwe na kha nṋe.
12 Ndi khou mu humisela kha iwe, ene ane nda mu funa vhukuma.
13 Ndo vha ndi tshi nga funa a tshi dzula na nṋe uri a bvele phanḓa a tshi ntshumela vhuimoni hau musi ndi dzhele nga nṱhani ha mafhungo maḓifha.
14 Huno a thi ṱoḓi u ita tshithu na tshithihi ndi songo wana thendelo kha iwe, uri mushumo wau wavhuḓi u si u ite nga u tou kombetshedzwa, fhedzi u u ite nga u tou ḓifunela.
15 Khamusi ndi ngazwo o thoma a ṱuwa lwa tshifhinganyana, uri a vhe wau lwa tshoṱhe,
16 a si tsha vha mulanda, fhedzi e khwine kha mulanda, e wahashu a funwaho, zwihuluhulu kha nṋe, fhedzi a tshi funwa zwihulu nga iwe vhushakani ha lwa ṋama na Murenani.
17 Arali u tshi ndzhia sa mutendi nga iwe, mu ṱanganedze nga vhuthu nga nḓila ye wa vha u tshi ḓo nṱanganedza ngayo.
18 Zwiṅwe hafhu, arali o u khakhela kana a tshi u koloda naho tshi tshini, u dzhie wonoyo mulandu u wanga.
19 Nṋe Paulo ndi khou ṅwala nga tshanḓa tshanga ndi ri: Ndi ḓo u lifhela—ndi si tsha amba uri na iwe u a nkoloda zwine wa vha zwone.
20 Ndi zwone wahashu, u nga ri ndi nga thuswa nga iwe Murenani: homolosa mbilu yanga vhunga ri vhathihi na Kristo.
21 Ndi u ṅwalela ndi tshi fulufhela uri u ḓo tendelana nazwo, ndi tshi ḓivha uri u ḓo ita na zwi fhiraho zwe nda amba.
22 Zwiṅwe ndi zwa uri u dovhe u ndugisele vhudzulo, ngauri ndi fulufhela uri nga thabelo dzaṋu ndi ḓo vhofhololwa nda ḓa ha inwi.
23 Epafra o valelwaho dzhele na nṋe ane a vha na vhuthihi na Kristo Yesu, u a u lumelisa,
24 na Marko, Aristariko, Dema, na Luka, na vhashumisani na nṋe.
25 Vhuthu vhuhulu ha Murena Yesu Kristo nga vhu vhe na muya une na u sumbedza.
