Luka 1:1-80
1 Vhanzhi vho lingedza u kuvhanganya mafhungo nga ha zwithu zwoṱhe zwine na riṋe ra zwi tenda,
2 u fana na vhe mathomoni vha vha ṱhanzi dzo zwi vhonaho nga maṱo na vhaḓinḓa vha mulaedza we ra ḓivhadzwa wone,
3 muṋe wanga Theofilo, ndo phetha nga uri ndi u ṅwalele enea mafhungo nga u tevhekana hao, ngauri ndo ṱolisisa dzenedzi mbuno nga vhuronwane u bva mathomoni adzo,
4 uri u ḓivhe nga vhuḓalo ngoho ya zwithu zwe wa funzwa zwone.
5 Misini ya Herode, khosi ya Yudea, ho vha hu na muṅwe tshifhe we a vha a tshi pfi Sakaria, we a vha e wa tshigwada tsha Abia, e na mufumakadzi wa lushaka lwa Aroni, dzina ḽawe ḽi tshi pfi Elisabetha.
6 Vhoṱhe vho vha vho luga phanḓa ha Mudzimu ngauri vho vha vha tshi tshimbila u tendelana na ndaela dzoṱhe na milayo ya Yehova.
7 Fhedzi vho vha vha si na ṅwana ngauri Elisabetha o vha e muumba, nahone vho vha vho no vha vhalala.
8 Musi a tshi khou shuma sa tshifhe phanḓa ha Mudzimu, nga tshifhinga tshee tsha vha tsho vhetshelwa tshigwada tshawe,
9 a dzhena thembeleni ya Yehova u itela u fhisa zwioro u ya nga maitele a vhotshifhe,
10 hone gogo ḽoṱhe ḽo vha ḽi tshi khou rabela ḽi nnḓa nga tshifhinga tsha u fhisa zwioro.
11 Sakaria a vhona muruṅwa wa Yehova o ima thungo ya tsha u ḽa tsha aletare ya zwioro.
12 Fhedzi Sakaria a mangadzwa nga zwe a zwi vhona, nahone a dzhenwa nga nyofho.
13 Naho zwo ralo, muruṅwa a amba nae a ri: “U songo ofha Sakaria, ngauri thabelo yau yo pfiwa, hone mufumakadzi wau Elisabetha u ḓo u bebela murwa, nahone u tea u mu ira dzina ḽine ḽa pfi Yohane.
14 Iwe u ḓo takala zwihulu, na vhanzhi vha ḓo takalela u bebwa hawe,
15 ngauri u ḓo vha muhulwane phanḓa ha Yehova. Fhedzi ho ngo tea u nwa waini na zwiṅwe zwi kambaho, u ḓo ḓadzwa nga muya mukhethwa u bva musi a tshi tou bebwa,
16 nahone u ḓo ita uri vharwa vhanzhi vha Isiraele vha rembulutshele kha Yehova, Mudzimu wavho.
17 Zwiṅwe hafhu, u ḓo ḓa u thoma e na maanḓa a ngaho a Elia, u itela u pfumedzanya vhokhotsi na vhana vhavho na uri vha sa thetshelesi vha tevhedze vhuṱali ha vho lugaho uri vhathu vha dzule vho lugela Yehova.”
18 Sakaria a amba na muruṅwa a ri: “Ndi ḓo vha hani na vhuṱanzi ha zwenezwi? Ngauri ndo no kalaha, na mufumakadzi wanga o no kegula.”
19 Muruṅwa a mu fhindula a ri: “Ndi nṋe Gabriele, ane a ima tsini na Mudzimu, ndo rumiwa uri ndi ḓe ndi ambe na iwe na u u ḓivhadza mafhungo maḓifha nga ha zwenezwi zwithu.
20 Fhedzi a u nga koni u amba u swika musi zwenezwi zwithu zwi tshi ḓadzea, ngauri a wo ngo tenda zwe nda u vhudza, zwine zwa ḓo ḓadzea nga tshifhinga tshazwo tsho vhewaho.”
21 Nga tshenetsho tshifhinga, vhathu vho vha vho lindela Sakaria nahone vho mangala uri u khou lengiswa nga mini thembeleni.
22 Musi a tshi bvela nnḓa, ho ngo kona u amba navho, nahone vha humbula uri a nga vha o vhona bono thembeleni. A amba navho nga zwanḓa, huno a ḓi bvela phanḓa a sa koni u amba.
23 Musi maḓuvha a mushumo wawe mukhethwa a tshi fhela, a ya hayani hawe.
24 Fhedzi nga murahu ha tshifhinga tshenetsho, Elisabetha mufumakadzi wawe a vhifha muvhilini, a fhedza miṅwedzi miṱanu a sa bvi nḓuni, nahone a tshi ri:
25 “Zwenezwi ndi zwe Yehova a nnyitela zwone misini yeneyi musi a tshi livhisa ṱhogomelo kha nṋe u itela u fhelisa u nyadziwa hanga nga vhathu.”
26 Nga ṅwedzi wawe wa vhurathi wa musi o vhifha muvhilini, muruṅwa Gabriele a rumiwa nga Mudzimu uri a ye muḓini wa Galilea une wa pfi Nazareta,
27 kha musidzana* o fulufhedziswaho u vhingwa nga munna ane a pfi Yosefa wa nnḓu ya Davida, nahone onoyo musidzana o vha a tshi pfi Maria.
28 Gabriele a ima phanḓa hawe a ri: “Ri a vusa, iwe a takalelwaho, Yehova u na iwe.”
29 Musi a tshi pfa zwenezwo a mangala, nahone a lingedza u pfesesa uri yeneyo ndi ndumeliso ya mufuda-ḓe.
30 Ngauralo, muruṅwa a ri: “Maria, u songo ofha, ngauri Mudzimu o u tonda.
31 U ḓo vhifha muvhilini wa beba murwa, ane wa ḓo mu ira dzina ḽine ḽa pfi Yesu.
32 U ḓo vha muhulwane nahone u ḓo vhidzwa Murwa wa Wa-Ṱaḓulu-ṱaḓulu, nahone Yehova Mudzimu u ḓo mu ṋea khuluṋoni ya Davida khotsi awe,
33 nahone u ḓo vhusa sa Khosi nḓuni ya Yakobo nga hu sa fheli, nahone Muvhuso wawe a u nga vhi na magumo.”
34 Fhedzi Maria a amba na muruṅwa a ri: “Izwo zwi ḓo itea hani, samusi ndi sa athu ita zwa vhudzekani?”
35 Muruṅwa a mu fhindula a ri: “Muya mukhethwa u ḓo ḓa kha iwe, na maanḓa a Wa-Ṱaḓulu-ṱaḓulu a ḓo ḓa kha iwe. Nga zwenezwo, ane a ḓo bebwa u ḓo vhidzwa mukhethwa, Murwa wa Mudzimu.
36 Elisabetha shaka ḽau we a vha e wa muumba, u na miṅwedzi ya rathi o vhifha muvhilini nga ṅwana wa mutukana, naho o no kegula,
37 ngauri a hu na tshithu tshine Mudzimu a si tshi kone.”
38 Nga zwenezwo, Maria a ri: “Tshukhwi! Nṋe mulanda wa Yehova! Zwe wa amba kha zwi itee.” Nga zwenezwo, muruṅwa a mu ṱutshela.
39 Nga tshenetsho tshifhinga, Maria a takuwa nga u ṱavhanya a ya dzithavhani muḓini wa Yuda,
40 a swika muḓini wa Sakaria, a lumelisa Elisabetha.
41 Musi Elisabetha a tshi pfa Maria a tshi mu lumelisa, ṅwana we a vha e mbumbeloni yawe a thoma u tamba-tamba, Elisabetha a ḓala muya mukhethwa
42 a fhululedza a ri: “Nga hu fhaṱutshedzwe iwe vhukati ha vhafumakadzi vhoṱhe, nahone hu fhaṱutshedzwe na ṅwana a re mbumbeloni yau!
43 Zwi ḓa hani uri ndi vhe na ndugelo yo raloho, ya u dalelwa nga mme a Murena wanga?
44 Ngauralo, musi ndi tshi pfa u tshi nndumelisa ṅwana a re mbumbeloni yanga o mbo ḓi tamba-tamba nga dakalo ḽihulu.
45 Nga hu takale we a tenda uri zwithu zwe Yehova a mu vhudza zwone zwi ḓo ḓadzea zwoṱhe.”
46 Ngauralo, Maria a ri: “Ndi hulisa Yehova,
47 ndi nga si litshe u takalela Mudzimu Mutshidzi wanga
48 ngauri o vhona u ḓiṱukufhadza ha mulanda wawe. U bva zwino, mirafho yoṱhe i ḓo amba uri ndi muthu o fhaṱutshedzwaho
49 ngauri wa maanḓa o nyitela mishumo mihulwane, nahone dzina ḽawe ndi ḽikhethwa,
50 nahone u khathutshela vhathu vha mirafho yoṱhe vhane vha mu ofha.
51 O ita mishumo ya maanḓa nga tshanḓa tshawe; o balanganya vhane vha ḓikukumusa mbiluni dzavho.
52 O wisa vhavhusi vhe kha khuluṋoni dzavho, nahone a hulisa vha ḓiṱukufhadzaho;
53 o fusha vha re na nḓala nga zwithu zwavhuḓi nahone a humisa vho pfumaho vho nembeledza zwanḓa.
54 O thusa Isiraele mulanda wawe, uri a humbule khathutshelo,
55 sa zwe a vhudza vhomakhulukuku washu, na Abrahamu na mbeu yawe, nga hu sa fheli.”
56 Maria o fhedza miṅwedzi miraru e na Elisabetha, nahone a kona u humela hayani hawe.
57 Tshifhinga tsha uri Elisabetha a vhofholowe tsha mbo ḓi swika, a mbo ḓi beba ṅwana wa mutukana.
58 Musi vhahura na mashaka awe vha tshi pfa nga ha nḓila ye Yehova a mu khathutshela ngayo, vha mbo ḓi takala nae.
59 Nga ḓuvha ḽa vhumalo vha ḓa u fumbisa ṅwana, nahone vho vha vha tshi ṱoḓa u mu ira dzina ḽa khotsi awe, Sakaria.
60 Fhedzi mme awe a fhindula a ri: “Hai, na kathihi! U ḓo pfi Yohane.”
61 Vha tshi pfa zwenezwi vha amba na Elisabetha vha ri: “Huufha hu si na shaka na ḽithihi ḽau ḽine ḽa vhidzwa nga ḽeneḽi dzina.”
62 Ndi hone vha tshi ya vha amba na khotsi a ṅwana nga zwanḓa vha tshi mu vhudzisa uri u ṱoḓa ṅwana a tshi pfi nnyi.
63 A humbela lubaba a ṅwala uri: “U pfi Yohane.” Vha tshi pfa zwenezwo vha kanuka vhoṱhe.
64 Nga khathihi fhedzi, mulomo wawe wa mbo ḓi vulea nahone lulimi lwawe lwa vhofholowa a mbo ḓi thoma u amba, a renda Mudzimu.
65 Vhahura vhawe vhoṱhe vha dzhenwa nga nyofho, nahone vhathu vhe vha vha vha tshi dzula miḓini i re dzithavhani ngei Yudea vha thoma u amba nga ha zwenezwi zwithu zwoṱhe,
66 na vhoṱhe vhe vha zwi pfa vha dzula vha tshi elekanya nga hazwo vha ri: “Onoyo ṅwana u ḓo vha muthu-ḓe?” Ngauri Yehova o vha e nae.
67 Sakaria khotsi awe, a ḓadzwa nga muya mukhethwa nahone a porofita a ri:
68 “Nga hu rendwe Yehova Mudzimu wa Isiraele, ngauri o livhisa ṱhogomelo kha vhathu vhawe nahone a vha tshidza.
69 O ri vusela luṋanga lwa u ri tshidza nḓuni ya Davida mulanda wawe,
70 sa zwe a amba musi a tshi shumisa vhaporofita vhakhethwa vha misini ya kale
71 uri u ḓo ri tshidza kha maswina ashu na kha vhoṱhe vhane vha ri vhenga,
72 u itela u khathutshela vhomakhulukuku washu na u humbula mulanga wawe mukhethwa,
73 muano we a u anela Abrahamu makhulukuku washu,
74 uri nga murahu ha u ri tshidza zwanḓani zwa maswina, a ri ṋee ndugelo ya u mu itela tshumelo khethwa ri sa ofhi tshithu
75 nga u ita nga u ralo nga u fulufhedzea na u luga phanḓa hawe misini yashu yoṱhe.
76 Fhedzi iwe ṅwana’nga, u ḓo pfi muporofita wa Wa-Ṱaḓulu-ṱaḓulu, ngauri u ḓo tshimbila phanḓa ha Yehova u itela u mu lugisela nḓila,
77 na u ṋea vhathu vhawe nḓivho ya u tshidza nga u vha hangwela zwivhi zwavho
78 nge Mudzimu washu a ri pfela vhuṱungu. Nga u ri pfela vhuṱungu u ḓo ri ṱavhisela ḓuvha ḽi bvaho ṱaḓulu
79 u itela u vhonetshela vho dzulaho swiswini na murunzini wa lufu, na u livhisa milenzhe yashu nḓilani ya mulalo nga hu bvelelaho.”
80 Nahone onoyo ṅwana a aluwa a vha na maanḓa, a bvela phanḓa a tshi dzula sogani u vhuya u swika ḓuvha ḽe a ḓibvisela khagala kha Vhaisiraele.
Ṱhaluso dzi re magumoni a siaṱari
^ Ipfi ḽa Lugerika ḽi ambela kha muthu wa tshisadzini a sa athu ita zwa vhudzekani.
