Luka 12:1-59
12 Nga tshenetsho tshifhinga, musi ho kuvhangana gogo ḽa vhathu vha zwigidi zwo vhalaho nahone ḽi tshi khou pwanyeledzana, Yesu a thoma nga u vhudza vhafunziwa vhawe a ri: “Ni thanyele mbiliso ya Vhafarisei, ine ya vha muhoyo.
2 Fhedzi a hu na tsho dzumbwaho tshine tsha sa ḓo dzumbululwa, kana naho tshi tshini tsho dzumbwaho tshine tsha sa ḓo ḓivhiwa.
3 Ngauralo, zwine na zwi amba swiswini zwi ḓo pfala tshedzani, na zwine na zwi pfa tshiphirini zwi ḓo huwelelwa kha ṱhanga dza nnḓu.
4 Ndi a ni vhudza khonani dzanga: Ni songo ofha avho vhane vha vhulaha muvhili nga murahu ha zwenezwo vha si kone u ita tshiṅwe tshithu.
5 Fhedzi ndi ḓo ni sumbedza ane na fanela u mu ofha: Ofhani uyo ane a ri o no vhulaha, a dovha a vha na maanḓa a u posa Gehena.* Ngoho ndi a ni vhudza, ofhani Onoyo.
6 Naa zwiṋoni zwiṱanu zwiṱuku* a zwi rengwi nga mapeni mavhili? Naho zwo ralo, a hu na na tshithihi tshazwo tshine Mudzimu a tshi hangwa.
7 Fhedzi na mavhudzi oṱhe a re ṱhohoni dzaṋu o vhalwa. Ni songo ofha; inwi ni vha ndeme vhukuma u fhira zwiṋoni zwiṱuku zwinzhi.
8 “Ngauralo, ndi a ni vhudza ndi ri: Muṅwe na muṅwe ane a nnyamba phanḓa ha vhathu uri u na vhuthihi na nṋe, na Murwa-muthu u ḓo mu amba phanḓa ha vharuṅwa vha Mudzimu.
9 Fhedzi ane a nndandula phanḓa ha vhathu u ḓo landulwa phanḓa ha vharuṅwa vha Mudzimu.
10 Muṅwe na muṅwe ane a amba luvhi nga ha Murwa-muthu, u ḓo hangwelwa, fhedzi ane a sema muya mukhethwa ha nga hangwelwi.
11 Musi vha tshi ni fara uri vha ni ise holoni ya Magota na ha vhavhusi na vha maanḓa, ni songo vhilaela nga uri ni ḓo ḓiimelela hani kana ni ḓo amba mini,
12 ngauri muya mukhethwa u ḓo ni funza zwine na fanela u zwi amba nga tshenetsho tshifhinga.”
13 Muṅwe we a vha e vhukati ha gogo a amba na Yesu a ri: “Mufunzi, vhudza mukomana wanga uri a nkovhele ifa.”
14 A amba nae a ri: “Ndo vhewa nga nnyi uri ndi vhe muhaṱuli na mukovhekanyi wa ifa ḽa inwi vhavhili?”
15 Nga murahu ha zwenezwo, a amba navho a ri: “Ni dzule no fhaṱuwa nahone ni ḓilinde kha vhupangwa hoṱhe ngauri naho arali muthu e na zwinzhi, vhutshilo hawe a vhu ḓitiki nga thundu ine a vha nayo.”
16 Nga zwenezwo, a vha vhudza tshiṅwe tshifanyiso a ri: “Tsimu ya muṅwe munna wa mupfumi yo vha i na zwiliṅwa zwinzhi.
17 Nga zwenezwo, a thoma u elekanya a ri, ‘Zwino ndi ḓo ita mini ngauri a thi na fhethu hune nda ḓo kuvhanganyela hone zwiliṅwa zwanga?’
18 Nga zwenezwo a ri, ‘Ndi ḓo ita hezwi: Ndi ḓo thutha maḓulu anga nda fhaṱa mahulwane, nahone henefho ndi ḓo kuvhanganya goroi yanga na zwithu zwanga zwoṱhe zwavhuḓi,
19 ndi hone ndi tshi ḓo ri: “Ndi na zwithu zwinzhi zwavhuḓi zwe nda zwi vhulungela miṅwaha minzhi i ḓaho; kha ndi awele, ndi ḽe, ndi nwe, ndi ḓiphiṋe.”’
20 Fhedzi Mudzimu a amba nae a ri, ‘Tsilu ndi iwe, vhusiku vhuno u ḓo vhulahwa. Zwithu zwoṱhe zwe wa zwi kuvhanganya zwi ḓo sala na nnyi?’
21 Zwi ḓo tou ralo nga muthu ane a ḓikuvhanganyela lupfumo, fhedzi a songo pfuma Mudzimuni.”
22 Nga zwenezwo, a amba na vhafunziwa vhawe a ri: “Litshani u vhilaelela vhutshilo haṋu uri ni ḓo ḽa’ni kana ni ḓo ambara’ni.
23 Ngauri vhutshilo ndi ha ndeme u fhira zwiḽiwa, na muvhili ndi wa ndeme u fhira zwiambaro.
24 Lavhelesani mahunguvhu. Ha zwali kana u kaṋa; ha na tshisiku kana ḓulu. Naho zwo ralo, Mudzimu u ḓi a ṋea zwiḽiwa. Naa inwi a ni vha ndeme u fhira zwiṋoni?
25 Ndi nnyi kha inwi ane a nga engedza vhutshilo hawe nga u vhilaela?
26 Ngauralo, arali ni tshi kundwa u ita zwithu zwiṱuku-ṱuku, ndi ngani ni tshi vhilaedziswa nga zwiṅwe zwithu?
27 Ṱhogomelani nḓila ine maluvha a aluwa ngayo; ha shumi kana u luka tshithu, hone ndi a ni vhudza ndi ri: Naho Salomo o vha o pfuma vhukuma, o vha a sa ambari u fana na ḽiṅwe ḽa maluvha eneo.
28 Arali Mudzimu a tshi ambadza zwimela zwa ḓaka zwine zwa vha hone ṋamusi, matshelo zwa kudzwa tshivhasoni, naa na inwi ha nga ni ambadzi u fhira zwenezwo zwimela, inwi vha re na lutendo luṱuku?
29 Ngauralo, litshani u vhilaela nga ha zwine na ḓo ḽa na zwine na ḓo nwa, nahone ni songo vhilaela lwo kalulaho,
30 ngauri hezwo zwoṱhe ndi zwithu zwine vhannḓa vha zwi tovhola nga maanḓa, fhedzi Khotsi aṋu u a ḓivha uri zwenezwi zwithu zwoṱhe ni a zwi shaya.
31 Naho zwo ralo, dzulani ni tshi ṱoḓa Muvhuso wawe, nahone zwenezwi zwithu ni ḓo engedzwa ngazwo.
32 “Ni songo ofha, inwi sambi ḽiṱuku, ngauri Khotsi aṋu u takalela u ni ṋea Muvhuso.
33 Rengisani thundu dzaṋu, nahone ni ṋee vhashai. Ni ḓiitele zwikwama zwa tshelede zwi sa ṱahali, lupfumo lu sa fheli lwa ngei ṱaḓulu, hune mbava ya sa sendele tsini nalwo nahone lu sa ḽiwi nga tshifheṱi.
34 Ngauri hune lupfumo lwaṋu lwa vha hone, ndi hune mbilu dzaṋu dza ḓo vha hone.
35 “Ambarani ni ḓilugise nahone ni funge mbone dzaṋu,
36 ni fane na vhanna vho lindelaho muṋe wavho uri a vhuye mbinganoni uri musi a tshi swika nahone a tshi khokhonya, vha mbo ḓi mu vulela nga khathihi.
37 Hu takala vhalanda vhane musi muṋe a tshi vhuya a wana vho fhaṱuwa! Ngoho ndi a ni vhudza ndi ri: U ḓo ḓilugisa uri a shume nahone a vha dzudza zwiḽiwani a ḓa a vha shumela.
38 Hu takala vhane muṋe wavho a tshi swika nga tshifhinga tsha vhuvhili,* naho hu nga tshifhinga tsha vhuraru,* a ḓi vha wana vho fhaṱuwa.
39 Fhedzi ḓivhani uri arali muṋe wa muḓi o vha a tshi ḓivha tshifhinga tshine mbava ya ḓo ḓa ngatsho, o vha a tshi ḓo dzula o fhaṱuwa nahone o vha a sa ḓo tenda nnḓu yawe i tshi pwashiwa.
40 Na inwi, ni dzule no ḓilugisa, ngauri Murwa-muthu u ḓo ḓa nga tshifhinga tshine ni si tshi humbulele.”
41 Ngauralo, Petro a ri: “Murena, itshi tshifanyiso u khou tshi vhudza riṋe fhedzi kana vhathu vhoṱhe?”
42 Murena a ri: “Ndi nnyi zwa vhukuma ane a vha mulanda a fulufhedzeaho, wa vhuṱali, we Muṋe wawe a mu vhea uri a ṱhogomele tshigwada tshawe tsha vhaḓinḓa uri a dzule a tshi vha ṋea zwiḽiwa zwo eḓanaho nga tshifhinga tsho teaho?
43 Mulanda onoyo u ḓo takala arali Muṋe wawe a mu wana a tshi khou ita nga u ralo!
44 Ngoho ndi a ni vhudza uri: U ḓo mu vhea uri a lange thundu yawe yoṱhe.
45 Fhedzi arali onoyo mulanda a vhuya a amba mbiluni yawe a ri, ‘Muṋe wanga u khou lenga,’ nahone a thoma u rwa vhashumeli vha vhanna na vha vhafumakadzi, a ḽa, a nwa, nahone a kambiwa,
46 Muṋe wa onoyo mulanda u ḓo ḓa nga ḓuvha ḽe a si ḽi lavhelele na nga tshifhinga tshine a sa tshi ḓivhe, nahone u ḓo mu pfisa vhuṱungu na u mu dzudza na vha sa fulufhedzei.
47 Nga zwenezwo, onoyo mulanda we a pfesesa zwine muṋe wawe a zwi funa, fhedzi a si ḓilugise kana u dzhia vhukando u tendelana na zwine muṋe wawe a zwi funa, u ḓo rwiwa vhukuma.
48 Fhedzi we a si pfesese nahone a ita zwithu zwine zwa ita uri a rwiwe, u ḓo wana ṱhamu dzi si gathi. Vhukuma, muṅwe na muṅwe o ṋewaho zwinzhi, u ḓo vhilwa zwinzhi, na muthu we a vhewa nga vhathu uri a ṱhogomele zwithu zwinzhi, vha ḓo ṱoḓa zwinzhi khae u fhira zwo ḓoweleaho.
49 “Ndo ḓa u funga mulilo kha ḽifhasi, nahone ndi tou tama lungafhani arali wo vha u tshi vho duga!
50 Ndi na ndovhedzo ine nda fanela u lovhedzwa ngayo, nahone ndi ḓo dzula ndo tsikeledzea u swika i tshi fhela!
51 Naa ni humbula uri ndo ḓisa mulalo kha ḽifhasi? Na kathihi, ndo ḓisa phambano.
52 Ngauri zwino vhaṱanu vha re nḓuni nthihi vha ḓo fhandekana, vhararu vha vutshela vhavhili nahone vhavhili vha vutshela vhararu.
53 Vha ḓo fhandekana, khotsi u ḓo lwa na murwa nahone murwa a lwa na khotsi, mme u ḓo lwa na ṅwananyana nahone ṅwananyana u ḓo lwa na mme awe, mazwale a lwa na mazwale.”
54 A dovha a amba na gogo a ri: “Musi ni tshi vhona gole ḽi tshi takuwa vhukovhela, ni mbo ḓi ri, ‘Hu ḓo na mvula ya tshirulu,’ nangoho zwa ralo.
55 Musi ni tshi vhona muya u tshi vhudzula u tshi bva tshipembe, ni mbo ḓi ri, ‘Ḽi ḓo fhisa,’ nangoho zwa ralo.
56 Vhadzia-muhoyo ndi inwi, ni a kona u ṱalukanya zwa mutsho wa shango, fhedzi ndi ngani ni sa koni u ṱalukanya zwa tshino tshifhinga?
57 Ndi ngani ni sa ṱalukanyi zwo lugaho?
58 Sa tsumbo, musi ni tshi ya musanda na we a ni hwelela mulandu, ni pfumedzane nae musi ni tshee nḓilani uri a si ni ise ha muhaṱuli, nahone muhaṱuli a si ni ise ha muḓinḓa wa khothe, muḓinḓa wa khothe a si ni ise dzhele.
59 Ndi a ni vhudza ndi ri: A ni nga ḓo vhuya na bva henefho ni sa athu lifha na peni ya u fhedzisela.”
Ṱhaluso dzi re magumoni a siaṱari
^ Ndi fhethu he ha vha hu tshi fhiswa mathukhwi nnḓa ha Yerusalema.
^ Ṱhongola.
^ U bva hu ṱoḓaho u vha nga awara ya vhuṱahe nga madekwana u swika vhukati ha vhusiku.
^ U bva vhukati ha vhusiku u swika hu ṱoḓaho u vha nga awara ya vhuraru nga maḓautsha.
