Luka 13:1-35
13 Nga tshenetsho tshifhinga vhaṅwe vhathu vha vhudza Yesu nga ha Vhagalilea vhe Pilato a ṱanganyisa malofha avho na zwiṱhavhelo zwavho.
2 Yesu a vha fhindula a ri: “Naa ni humbula uri vhenevho Vhagalilea vho vha vhe vhaitazwivhi u fhira Vhagalilea vhoṱhe nga nṱhani ha uri ho itea zwenezwo zwithu khavho?
3 Na kathihi, ndi a ni vhudza ndi ri, arali na sa rembuluwa ni ḓo fheliswa u fana navho.
4 Kana vhathu vha fumi-malo (18) vhe vha welwa nga mutsheṱo wa Siloa wa vha vhulaha, naa ni humbula uri vho vha vhe vhaitazwivhi u fhira vhathu vhoṱhe vha Yerusalema?
5 Na kathihi, ndi a ni vhudza ndi ri, arali na sa rembuluwa, ni ḓo fheliswa u fana navho.”
6 Nga murahu a vha vhudza tshifanyiso a ri: “Muṅwe munna o vha e na muhuyu wo ṱavhiwaho tsimuni yawe ya minḓirivhe, a bva a tshi ya u fula mitshelo, fhedzi a wana u songo aṋwa.
7 Ngauralo, a amba na mufhonḓi wawe wa nḓirivhe a ri, ‘Ho no fhela miṅwaha miraru ndi tshi ḓa u fula mitshelo kha wonoyu muhuyu, fhedzi nda wana u songo aṋwa. U reme! U u litshela’ni wo sokou vhivha mavu?’
8 A fhindula a ri, ‘Muṋe wanga, u litshe wonoyu ṅwaha ndi thome ndi bwe u mona nawo ndi kone u shela mupfudze,
9 arali wa aṋwa zwi ḓo vha zwavhuḓi; fhedzi wa sa aṋwa, u fanela u u rema.’”
10 Yesu o vha a tshi khou funza kha iṅwe ya dzisinagogo nga Sabatha.
11 Ho vha hu na mufumakadzi we a fhedza miṅwaha ya fumi-malo (18) a tshi khou lwadzwa nga muya muvhi, o vha a tshi dzula o kotama nahone a sa koni u onyolowa na luthihi.
12 Yesu a tshi mu vhona a ri: “Wo vhofhololwa kha vhulwadze hau.”
13 A mu vhea zwanḓa, a onyolowa nga u ṱavhanya, nahone a thoma u renda Mudzimu.
14 Fhedzi muingameli wa sinagogo a sinyuwa ngauri Yesu o fhodza muthu nga Sabatha, a thoma u amba na gogo a ri: “Hu na maḓuvha a rathi ane na nga shuma ngao; ngauralo, iḓani ni fhodzwe nga eneo maḓuvha, hu si nga ḓuvha ḽa Sabatha.”
15 Murena a mu fhindula a ri: “Vhadzia–muhoyo ndi inwi, naa a ni vhofhololi phulu kana mbongola yaṋu nga Sabatha uri i ye u nwa maḓi?
16 Naa a zwo ngo tea uri onoyu mufumakadzi, ṅwananyana wa Abrahamu, we a vha o vhofhiwa nga Sathane miṅwaha ya fumi-malo, a vhofhololwe kha vhuṱungu hawe nga ḽeneḽi ḓuvha ḽa Sabatha?”
17 Musi o no amba zwenezwo zwithu, vhoṱhe vhe vha vha vha tshi khou mu hanedza vha farwa nga ṱhoni, fhedzi gogo ḽoṱhe ḽa thoma u takalela zwithu zwoṱhe zwe a zwi ita.
18 Ngauralo, a bvela phanḓa a ri: “Muvhuso wa Mudzimu u fana na mini, nahone ndi nga u vhambedza na mini?
19 U fana na thoro ya luṋonya ye muthu a i dzhia a i zwala tsimuni yawe, musi yo no mela i vha muri, zwiṋoni zwa ṱaḓulu zwa ḓa zwa fhaṱa zwiṱaha matavhini awo.”
20 A dovha a ri: “Muvhuso wa Mudzimu ndi nga u vhambedza na mini?
21 U fana na mbiliso, ine mufumakadzi a i suka na fulauru kha masambelo mararu, u swika fulauru yoṱhe i tshi kukumuwa.”
22 A fara lwendo a ya miḓini na miḓanani, a funza nahone a bvela phanḓa na lwendo lwawe a ya Yerusalema.
23 Nahone muṅwe munna a amba nae a ri: “Murena, naa hu ḓo tshidzwa vhathu vha si gathi fhedzi?” A amba navho a ri:
24 “Itani vhuḓidini vhuhulwane uri ni dzhene nga muṋango muṱuku, ngauri ndi a ni vhudza, vhanzhi vha ḓo ṱoḓa u dzhena, fhedzi a vha nga koni.
25 Musi muṋe wa nnḓu a tshi takuwa a vala vothi, ndi hone ni tshi ḓo ḓa na ima nnḓa na khokhonya na ri, ‘Muṋe washu, ri vulele.’ Fhedzi u ḓo ni fhindula a ri: ‘A thi ḓivhi hune na bva hone.’
26 Nga zwenezwo, ni ḓo amba na ri, ‘Ro ḽa ra nwa na iwe, nahone wo funza nḓilani khulwane dza muḓini washu.’
27 Fhedzi u ḓo amba na inwi a ri, ‘A thi ḓivhi hune na bva hone. Nṱutsheleni inwi vhaitazwivhi!’
28 Henefho ndi hune na ḓo lila na u shenganya maṋo, musi ni tshi vhona Abrahamu, Isaka, Yakobo, na vhaporofita vhoṱhe vhe Muvhusoni wa Mudzimu, fhedzi inwi no kudzwa nnḓa.
29 Zwiṅwe hafhu, vhathu vha ḓo ḓa vha tshi bva vhubvaḓuvha na vhukovhela na devhula na tshipembe u itela u ḽa zwiḽiwa Muvhusoni wa Mudzimu.
30 Vha u fhedza vha ḓo vha vha u thoma, nahone vha u thoma vha ḓo vha vha u fhedza.”
31 Nga tshenetsho tshifhinga, vhaṅwe Vhafarisei vha ḓa khae vha ri: “Ṱuwa fhano, ngauri Herode u khou ṱoḓa u u vhulaha.”
32 A amba navho a ri: “Tshimbilani ni vhudze heiḽa phunguhwe ni ri, ‘Ndi khou pandela madimoni na u fhodza ṋamusi na matshelo, nahone mbamatshelo ndi ḓo vha ndo fhedza.’
33 Naho zwo ralo, ndi fanela u ṱuwa ṋamusi na matshelo na mbamatshelo, ngauri a zwo ngo tendelwa uri muporofita a vhulahwe huṅwe fhethu nga nnḓa ha Yerusalema.
34 Hee Yerusalema, Yerusalema, iwe muvhulahi wa vhaporofita na mukanḓi wa vho rumiwaho ha iwe—ndi lungana ndi tshi ri ndi kuvhanganye vhana vhau sa khuhu i tshi kuvhanganya zwikukwana zwayo fhasi ha phapha dzayo, fhedzi inwi na hana!
35 Mudzimu u ḓo ṱutshela nnḓu yau. A u tsha ḓo dovha wa mmbona u bva zwino u vhuya u swika u tshi ri: ‘Nga hu rendwe a ḓaho nga dzina ḽa Yehova!’”
