Luka 16:1-31
16 Nga murahu a dovha a amba na vhafunziwa a ri: “Muṅwe munna wa mupfumi o vha e na mukoma we a pomokwa uri ha londi thundu ya muṋe wawe.
2 Nga zwenezwo, a mu vhidza a amba nae a ri: ‘Ndi mafhungo-ḓe ane nda a pfa nga ha iwe? Ḓisa muvhigo u sumbedzaho nḓila ye wa shumisa ngayo thundu, ngauri a u tsha ḓo vha mukoma wa u langula zwa nḓuni yanga.’
3 Ngauralo, mukoma a elekanya a ri: ‘Ndi ḓo ita mini musi muṋe wanga a tshi ḓo ndzhiela vhuimo ha u vha mukoma? A thi na maanḓa a u bwa, nahone ndi farwa nga ṱhoni musi ndi tshi humbela.
4 Zwino ndi vho ḓivha zwine nda ḓo zwi ita musi ndi tshi bviswa kha vhukoma uri vhathu vha nṱanganedze nḓuni dzavho.’
5 A vhidza vhoṱhe vhe vha vha vha tshi koloda muṋe wawe, a amba na wa u thoma a ri: ‘Mulandu une na koloda muṋe wanga ndi mungafhani?’
6 A ri: ‘Zwikumbu* zwa ḓana zwa mapfura a muṱwari.’ Mukoma a amba nae a ri: ‘Dzhia thendelano yau u dzule fhasi nahone u ṱavhanye u ṅwale fuṱhanu (50).’
7 A dovha a amba na muṅwe a ri, ‘Mulandu wau ndi mungafhani?’ A ri: ‘Magokoko a ḓana a goroi.’ Mukoma a amba nae a ri, ‘Dzhia thendelano yau yo ṅwalwaho, nahone u ṅwale fumalo (80).’
8 Muṋe a khoḓa mukoma wawe naho o vha a songo luga, ngauri o shumisa vhuṱali; vhathu vha ḽino shango vho ṱalifha kha mafhungo avho u fhira vha re tshedzani.
9 “Ndi ri kha inwi: Ḓiiteleni dzikhonani nga lupfumo lwa ḽino shango uri musi lu tshi fhela, vha ni ṱanganedze vhudzuloni ha lini na lini.
10 Muthu a fulufhedzeaho kha zwiṱuku u a fulufhedzea na kha zwinzhi, nahone muthu a sa fulufhedzei kha zwiṱuku ha fulufhedzei kha zwinzhi.
11 Ngauralo, arali ni songo sumbedza uri ni a fulufhedzea kha lupfumo lwa ḽino shango, ndi nnyi ane a nga ni kumedza lupfumo lwa vhukuma?
12 Arali ni songo fulufhedzea kha lupfumo lwa muṅwe muthu, ndi nnyi ane a ḓo ni ṋea lupfumo lwaṋu?
13 A hu na mushumeli ane a nga shumela vhaṋe vhavhili, ngauri u ḓo vhenga muṅwe nahone a funa muṅwe kana a tevhedza zwa muṅwe nahone a nyadza zwa muṅwe. Ni nga si kone u vha vhalanda vha Mudzimu na vha lupfumo.”
14 Nga tshenetsho tshifhinga, Vhafarisei vhe vha vha vha tshi funa tshelede, vho vha vho thetshelesa zwe a vha a tshi khou zwi amba, nahone vha thoma u mu holedza.
15 Nga zwenezwo, a amba navho a ri: “Ndi inwi vhane na amba uri no luga phanḓa ha vhathu, fhedzi Mudzimu u a ḓivha zwi re mbiluni dzaṋu, ngauri zwine vhathu vha zwi dzhiela nṱha, zwi a nengisa maṱoni a Mudzimu.
16 “Mulayo na Vhaporofita* zwo vha hone u swika kha Yohane. U bva misini yeneyo, Muvhuso wa Mudzimu u khou huwelelwa sa mafhungo maḓifha, nahone vhathu vhoṱhe vha khou ṱoḓa u dzhena khawo.
17 Ndi ngoho, zwi ḓo leluwa uri ḽiṱaḓulu na ḽifhasi zwi fhele, fhedzi a hu na na kuswayo na kuthihi kha Mulayo kune kwa sa ḓo ḓadzea.
18 “Muṅwe na muṅwe ane a ṱala mufumakadzi wawe nahone a dovha a vhinga muṅwe u ita vhuṱonḓolo, na a malaho mufumakadzi o ṱalwaho nga munna wawe, u ita vhuṱonḓolo.
19 “Ho vha hu na muṅwe munna wa mupfumi we a vha a tshi ambara zwiambaro zwitswuku zwa thengo khulu, we a vha a tshi ḓiphiṋa nga madzanga ḓuvha ḽiṅwe na ḽiṅwe.
20 Fhedzi ho vha hu na muṅwe munna wa muhumbeli we a vha a tshi pfi Lazaro, we a vha a tshi anzela u vhewa khoroni yawe, o ḓala zwilonda
21 nahone a tshi tama u fushwa nga matshakatshaka a waho ṱafulani ḽa mupfumi. Na mmbwa dzo vha dzi tshi ḓa dza ṋanzwa zwilonda zwawe.
22 Nga u ya ha tshifhinga munna wa muhumbeli a fa, a hwalwa nga vharuṅwa vha mu vhea uri a ḓisendeke nga khana ya Abrahamu.
“Na mupfumi a fa nahone a vhulungwa.
23 Musi e Vhudzulavhafu,* a sedza nṱha a tshi khou pfa vhuṱungu, a vhona Abrahamu e kule, na Lazaro o ḓisendeka nga khana yawe.
24 A vhidzelela a ri, ‘Khotsi anga Abrahamu, nkhathutshele nahone u rume Lazaro a ṋange munwe wawe maḓini nahone a ḓe a rothodze lulimi lwanga, ngauri ndi khou tambula hafha muliloni.’
25 Fhedzi Abrahamu a ri, ‘Ṅwana’nga, humbula uri wo wana nga vhuḓalo zwithu zwau zwavhuḓi vhutshiloni hau hoṱhe, Lazaro a tshi khou tambula. Zwino u khou ḓiphiṋa, iwe u khou tambula.
26 Nga nnḓa ha zwenezwo, hu na luwa luhulu vhukati ha riṋe na inwi, uri vhane vha ṱoḓa u pfukela kha inwi vha tshi bva ngeno vha si kone, na vhathu vha bvaho ngeo vha tshi ḓa kha riṋe, vha si kone.’
27 Nga zwenezwo a ri: ‘Arali zwo ralo, ndi khou humbela uri u mu rume nḓuni ya khotsi anga,
28 ngauri ndi na vharathu vhaṱanu, uri a vha ṱanziele nga vhuḓalo uri na vhone vha si ḓe afha fhethu ha u tambudzwa.’
29 Fhedzi Abrahamu a ri: ‘Vha na Mushe na Vhaporofita; vha litshe vha thetshelese vhenevho.’
30 Mupfumi a ri: ‘Aiwa, khotsi anga Abrahamu, arali muṅwe muthu a bvaho vhafuni a ya khavho, vha ḓo rembuluwa.’
31 Fhedzi Abrahamu a mu fhindula a ri, ‘Arali vha sa thetshelesa Mushe na Vhaporofita, vha nga si thetshelese naho ha vuwa muthu vhafuni.’”
Ṱhaluso dzi re magumoni a siaṱari
^ Nga Lugerika ndi baʹtos. Muelo u lingana na ḽithara dza fumbili-mbili (22).
^ Mubulo une wa ri “Mulayo na Vhaporofita” u ambela kha Maṅwalo oṱhe a Luheberu.
^ Nga Lugerika ndi haiʹdes. Sedzani Ṱhumetshedzo 7.
