Luka 17:1-37
17 Yesu a amba na vhafunziwa vhawe a ri: “Zwikhukhulisi zwi nga si kundwe u vha hone. Hone, khombo ane zwa ḓa ngae!
2 Zwo vha zwi tshi ḓo vha khwine khae arali guyo ḽi vhe ḽo vhofhelelwa mukuloni wawe a poswa lwanzheni nṱhani ha uri a khukhulise muṅwe wa vhenevha vhaṱuku.
3 Ni ḓiṱhogomele. Arali wahau a tshi u khakhela, u mu kaidze, arali a rembuluwa u mu hangwele.
4 Naho arali a u khakhela lwa sumbe nga ḓuvha, a ḓa kha iwe lwa sumbe, a ri, ‘Ndo rembuluwa,’ u fanela u mu hangwela.”
5 Hone vhaapostola vha amba na Murena vha ri: “Ri ṋee lutendo lwo engedzeaho.”
6 Murena a vha fhindula a ri: “Arali ni na lutendo lu ngaho thoro ya luṋonya, no vha ni tshi nga amba na hoyu muthabeila na ri, ‘Tupuwa u ye u ḓiṱavhe lwanzheni!’ wa ni thetshelesa.
7 “Ndi nnyi kha inwi ane a vha na mulanda wa u lima kana wa u lisa zwifuwo ane a nga amba nae musi a tshi vhuya tsimuni a ri, ‘Iḓa u ḽe zwiḽiwa’?
8 Nṱhani hazwo, naa ha nga ḓo amba nae a ri, ‘Nndugisele zwiḽiwa zwanga zwa nga madekwana, u ambare zwiambaro zwa u shuma, u ḓe u ntshumele u swikela ndi tshi fhedza u ḽa na u nwa; nga murahu, u nga kona u ḽa na u nwa’?
9 Naa a nga livhuha onoyo mulanda ngauri o mu itela zwithu zwe a ri a mu itele zwone?
10 Na inwi, musi no no ita zwithu zwoṱhe zwe na vhudzwa uri ni zwi ite, ni ambe ni ri, ‘A ri vhalanda vha tshithu. Ro ita zwe ra vha ro fanela u zwi ita.’”
11 Musi a tshi khou ya Yerusalema, a fhira nga vhukati ha Samaria na Galilea.
12 Musi a tshi dzhena kha muṅwe muḓi, a ṱangana na vhanna vha fumi vha re na mapele, fhedzi vha imela kule.
13 Vha vhidzelela vha ri: “Yesu, Mufunzi, ri khathutshele!”
14 Musi a tshi vha vhona, a amba navho a ri: “Iyani ha vhotshifhe vha ni vhone.” Musi vha tshi khou ya henengei, vha mbo ḓi fhola.
15 Musi muṅwe wavho a tshi vhona uri o fhola, a rembuluwa, a humela murahu a tshi khou renda Mudzimu nga ipfi ḽihulwane.
16 A gwadama milenzheni ya Yesu, a mu livhuha. Zwiṅwe hafhu, o vha e Musamaria.
17 Yesu a mu fhindula a ri: “Naa a si zwone uri ho fhodzwa vha fumi? Vhaṅwe vha ṱahe vha ngafhi?
18 Naa a hu na na muthihi o vhuyaho uri a rende Mudzimu, nga nnḓa ha onoyu munna wa luṅwe lushaka?”
19 A amba nae a ri: “Takuwa u tshimbile; lutendo lwau lwo u fhodza.”
20 Ḽiṅwe ḓuvha Vhafarisei vha mu vhudzisa uri Muvhuso wa Mudzimu u ḓo ḓa lini, a vha fhindula a ri: “Muvhuso wa Mudzimu u nga si ḓe nga nḓila ine ya ḓo vhonala;
21 vhathu a vha nga ambi vha ri, ‘Vhonani khoyu!’ kana, ‘Khouḽaa!’ Ngauri Muvhuso wa Mudzimu u vhukati haṋu.”
22 A amba na vhafunziwa a ri: “Hu ḓo ḓa maḓuvha ane na ḓo tama u vhona ḽiṅwe ḽa maḓuvha a Murwa-muthu, fhedzi a ni nga ḓo ḽi vhona.
23 Vhathu vha ḓo amba na inwi vha ri, ‘Vhonani khouḽaa!’ kana, ‘Vhonani khoyu!’ Ni songo ya kana na vha tevhela.
24 Ngauri vhunga lupenyo lu tshi penya lu tshi bva kha tshiṅwe tshipiḓa tsha ḽiṱaḓulu lu tshi ya kha tshiṅwe, na Murwa-muthu u ḓo tou ralo.
25 Naho zwo ralo, u fanela u thoma a tambudzwa zwinzhi na u landulwa nga wonoyu murafho.
26 Zwiṅwe hafhu, samusi zwo itea misini ya Noaxe, zwi ḓo tou ralo na misini ya Murwa-muthu:
27 Vho vha vha tshi ḽa, vha tshi nwa, vhanna vha tshi vhinga, vhafumakadzi vha tshi vhingwa, u swika ḓuvha ḽa musi Noaxe a tshi dzhena gungwani, ha ḓa Maḓi Mahulu a vha fhelisa vhoṱhe.
28 Vhunga zwo itea misini ya Loto: Vho vha vha tshi ḽa, vha tshi nwa, vha tshi renga, vha tshi rengisa, vha tshi ṱavha, vha tshi fhaṱa.
29 Fhedzi nga ḓuvha ḽe Loto a bva ngaḽo Sodoma, ho na mulilo na matombo a dugaho a bvaho ṱaḓulu zwa vha fhelisa vhoṱhe.
30 Zwi ḓo tou ralo nga ḽeneḽo ḓuvha musi Murwa-muthu a tshi dzumbululwa.
31 “Nga ḽeneḽo ḓuvha, muthu a re kha ṱhanga ane a vha na thundu nḓuni a songo tsa a ya a i dzhia, na muthu a re tsimuni, a songo humela zwithu zwo salaho murahu.
32 Humbulani musadzi wa Loto.
33 Ane a lingedza u ḓivhulungela vhutshilo hawe u ḓo vhu lozwa, ane a lozwa vhutshilo hawe u ḓo tshila.
34 Ndi a ni vhudza ndi ri: Nga honoho vhusiku vhathu vhavhili vha ḓo vha vhe vhulaloni vhuthihi; muṅwe u ḓo dzhiiwa, muṅwe a laṱwa.
35 Vhafumakadzi vhavhili vha ḓo vha vha tshi khou sinḓa mutulini muthihi; muṅwe u ḓo dzhiiwa, muṅwe a laṱwa.”
36 * ——
37 Vha mu fhindula vha ri: “Zwi ḓo itea ngafhi Murena?” Ene a amba navho a ri: “Hune ha vha na mutumbu, ndi hune maanga a kuvhangana hone.”
