Luka 18:1-43
18 A thoma u vha vhudza tshifanyiso nga ha ṱhoḓea ya u dzula vha tshi rabela vha sa neti,
2 a ri: “Kha muṅwe muḓi ho vha hu na muhaṱuli we a vha a sa ofhi Mudzimu nahone a sa ṱhonifhi muthu.
3 Kha wonoyo muḓi, ho vha hu na tshilikadzi ye ya vha i tshi dzulela u ya khae i tshi ri, ‘Ita vhungoho ha uri ndi wane khaṱulokwayo kha swina ḽanga mulayoni.’
4 A fhedza tshifhinganyana a sa ṱoḓi u ita nga u ralo, fhedzi nga murahu a elekanya a ri, ‘Naho ndi sa ofhi Mudzimu kana u ṱhonifha muthu,
5 fhedzi ngauri yeneyi tshilikadzi i khou ndina, ndi ḓo ita vhungoho ha uri i wane khaṱulokwayo uri i si dzulele u ḓa i tshi nnetisa nga luhumbelo lwayo lu sa gumi.’”
6 Nga zwenezwo, Murena a ri: “Ipfani zwe muhaṱuli a zwi amba naho a songo luga!
7 Vhukuma, naa Mudzimu a nga si ite uri hu vhe na khaṱulokwayo kha vhanangiwa vhawe vhane vha mu lilela vhusiku na masiari a sa vha fheleli mbilu?
8 Ndi a ni vhudza ndi ri: U ḓo ita uri vha wane khaṱulokwayo nga u ṱavhanya. Musi Murwa-muthu a tshi vhuya, naa zwa vhukuma u ḓo wana hu na lutendo lu ngaho sa lwonolu ḽifhasini?”
9 Ho vha hu na vhaṅwe vhe vha vha vha tshi ḓifulufhela uri vho luga nahone vha tshi dzhia vhaṅwe vhe si tshithu. A vha vhudza tshifanyiso a ri:
10 “Ho vha hu na vhanna vhavhili vhe vha gonya thembeleni u itela u rabela, muṅwe o vha e Mufarisei muṅwe e muthelisi.
11 Mufarisei a ima nahone a thoma u rabelela mbiluni yawe a ri, ‘Mudzimu, ndi livhuha uri a thi fani na vhaṅwe vhathu vha mavemu, vha songo lugaho, vhadzia-vhuṱonḓolo—kana na hoyu muthelisi.
12 Ndi ḓidzima zwiḽiwa luvhili nga vhege; ndi bvisa tshafumi kha zwoṱhe zwine nda zwi wana.’
13 Fhedzi muthelisi o vha o ima kule, a sa ṱoḓi na u lavhelesa ṱaḓulu a tshi khou ḓirwa khana, a tshi ri, ‘Mudzimu, nkhathutshele nṋe muitazwivhi.’
14 Ndi a ni vhudza ndi ri: Onoyo munna o humela hayani hawe e muthu o lugaho u fhira Mufarisei, ngauri muṅwe na muṅwe ane a ḓihudza u ḓo ṱukufhadzwa, fhedzi ane a ḓiṱukufhadza u ḓo huliswa.”
15 Vhathu vha thoma u mu ḓisela vhana* vhavho uri a vha kwame, fhedzi musi vhafunziwa vhawe vha tshi zwi vhona, vha thoma u vha kaidza.
16 Naho zwo ralo, Yesu a vhidza vhana, a ri: “Litshani vhana vha ḓe ha nṋe, ni songo lingedza u vha thivhela. Ngauri Muvhuso wa Mudzimu ndi wa vhane vha nga vhenevho.
17 Ngoho ndi a ni vhudza ndi ri: Muthu naho e ufhio ane a sa ṱanganedze Muvhuso wa Mudzimu u fana na ṅwana, a nga si dzhene khawo na luthihi.”
18 Muṅwe muvhusi a mu vhudzisa a ri: “Mufunzi wavhuḓi, ndi fanela u ita mini uri ndi wane vhutshilo vhu sa fheli?”
19 Yesu a amba nae a ri: “Ndi ngani u tshi ri ndi wavhuḓi? Ndi Mudzimu fhedzi ane a vha wavhuḓi.
20 U a ḓivha milayo ine ya ri: ‘U songo ṱonḓola; u songo vhulaha; u songo tswa; u songo amba vhuṱanzi ha u zwifha; hulisa khotsi au na mme au.’”
21 Nga zwenezwo, onoyo munna a ri: “Zwithu zwoṱhe hezwo ndo zwi ita u bva vhuṱukuni hanga.”
22 Musi Yesu a tshi pfa zwenezwo, a amba nae a ri: “Hu na tshithu tshithihi tshine tsha khou ṱahela kha iwe: Rengisa zwithu zwoṱhe zwine wa vha nazwo u ṋee vhashai, hone u ḓo vha na lupfumo ṱaḓulu, u kone u ḓa u vhe mutevheli wanga.”
23 Musi a tshi pfa zwenezwo, a ṱungufhala zwihulu, ngauri o vha o pfumesa.
24 Yesu a mu sedza a ri: “Zwi ḓo konḓa vhukuma kha vho pfumaho uri vha dzhene Muvhusoni wa Mudzimu!
25 Zwi ḓo leluwa uri gamela i dzhene nga lubuli lwa ṋeleṱe nṱhani ha uri mupfumi a dzhene Muvhusoni wa Mudzimu.”
26 Vhe vha zwi pfa vha ri: “Ndi nnyi ane zwa nga konadzea uri a tshidzwe?”
27 Yesu a ri: “Zwithu zwi sa konadzei kha vhathu zwi a konadzea kha Mudzimu.”
28 Fhedzi Petro a ri: “Ro ṱutshela zwoṱhe ra u tevhela.”
29 Yesu a amba navho a ri: “Ngoho ndi a ni vhudza ndi ri: A hu na we a ṱutshela nnḓu, mufumakadzi, vharathu na vhakomana, vhabebi, kana vhana a tshi itela Muvhuso wa Mudzimu
30 ane a sa ḓo wana zwithu zwinzhi kha tshino tshifhinga, kha maitele a zwithu a ḓaho u ḓo wana vhutshilo vhu sa fheli.”
31 A vhidzela vha fumi-mbili (12) thungo a amba navho a ri: “Ri khou gonya Yerusalema, nahone zwoṱhe zwe zwa ṅwalwa nga vhaporofita vha tshi amba Murwa-muthu zwi ḓo ḓadzea.
32 Sa tsumbo, vha ḓo mu kumedza vhathu vha dzitshaka nahone vha ḓo mu goḓa, vha ḓo mu nyadza vha mu pfela nga mare,
33 musi vho no mu rwa, vha ḓo mu vhulaha; fhedzi u ḓo vuwa nga ḓuvha ḽa vhuraru.”
34 Naho zwo ralo, a vho ngo pfesesa zwe a vha a tshi khou zwi amba, ngauri vho vha vha sa ḓivhi zwe a vha a tshi khou zwi amba.
35 Musi a tshi swika tsini na Yeriko, a ṱangana na muṅwe munna we a vha o pofula o dzula thungo ha nḓila a tshi khou humbela.
36 Musi a tshi pfa gogo ḽi tshi khou fhira henefho, a vhudzisa uri hu khou itea mini.
37 Vha mu vhudza uri: “Yesu wa Nazareta u khou fhira!”
38 Musi a tshi pfa vha tshi ralo, a vhidzelela a ri: “Murena, Murwa wa Davida, nkhathutshele!”
39 Vhe vha vha vha tshi khou tshimbila phanḓa ha Yesu vha mu kaidza uri a fhumule, fhedzi a tou ṋaṋa u vhidzelela a ri: “Murwa wa Davida, nkhathutshele!”
40 Yesu a ima a amba uri vha ḓise onoyo munna khae. Musi o no sendela tsini, Yesu a mu vhudzisa uri:
41 “U ṱoḓa ndi tshi u itela mini?” Ene a ri: “Murena, ita uri ndi dovhe ndi vhone.”
42 Ngauralo, Yesu a amba nae a ri: “Dovha u vhone; lutendo lwau lwo u fhodza.”
43 Nga khathihi fhedzi a mbo ḓi vhona, a thoma u mu tevhela, a tshi khou renda Mudzimu. Vhathu vhoṱhe vha tshi vhona zwenezwo, vha renda Mudzimu.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “vhushie.”
