Luka 19:1-48
19 Yesu a dzhena Yeriko a fhira nga vhukati hawo.
2 Henefho ho vha hu na muṅwe munna we a vha a tshi pfi Saxeo; o vha e muhulwane wa vhathelisi, nahone o pfuma.
3 O vha a tshi ṱoḓa u vhona uri Yesu ndi ufhio, fhedzi a si kone u mu vhona nga nṱhani ha gogo, ngauri o vha e mupfufhi.
4 Ngauralo, a gidimela phanḓa a gonya muhuyu uri a mu vhone, ngauri Yesu o vha a tshi ḓo fhira nga yeneyo nḓila.
5 Musi Yesu a tshi swika henefho fhethu, a lavhelesa nṱha, a amba nae a ri: “Saxeo, ṱavhanya u tse, ngauri ṋamusi ndi mueni muḓini wau.”
6 A ṱavhanya a tsa a mu ṱanganedza o takala.
7 Musi vhathu vha tshi zwi vhona vha gungula vha ri: “O dalela muitazwivhi.”
8 Fhedzi Saxeo a takuwa a amba na Murena a ri: “Murena, ndi ḓo kovhela vhashai thundu yanga nga vhukati, nahone tshiṅwe na tshiṅwe tshe nda dzhiela muthu muṅwe na muṅwe nga vhufhura, ndi ḓo mu lifhela tsho andiswa luṋa.”
9 Yesu a amba nae a ri: “Ṋamusi Mudzimu o tshidza uyu muṱa, ngauri na Saxeo ndi murwa wa Abrahamu.
10 Murwa-muthu o ḓa u ṱoḓa na u tshidza vho xelaho.”
11 Musi vho thetshelesa zwenezwo, a dovha a amba tshiṅwe tshifanyiso, ngauri o vha e tsini na Yerusalema nahone vho vha vha tshi humbula uri Muvhuso wa Mudzimu wo vha u tshi ḓo vha hone nga tshenetsho tshifhinga.
12 Nga zwenezwo a ri: “Muṅwe munna wa mukololo o ya shangoni ḽa kule uri a vhewe vhuhosi a kone u vhuya.
13 A vhidza vhalanda vhawe vha fumi, a vha ṋea bonndo* dza fumi a vha vhudza a ri, ‘Dzi binduliseni u swika ndi tshi vhuya.’
14 Fhedzi vhathu vha shangoni ḽa hawe vho vha vha tshi mu vhenga, vha rumela tshigwada tsha vhaimeleli uri vha mu vhudze uri, ‘A ri ṱoḓi u tshi vha khosi yashu.’
15 “Musi a tshi vha khosi, a vhidza vhalanda vhawe vhaḽa vhe a vha ṋea dzibonndo. O vha a tshi ṱoḓa u ḓivha zwe vha bindulisa mushumoni wavho.
16 Wa u thoma a ḓa a ri, ‘Muṋe wanga, bonndo yau yo bindulisa dza fumi.’
17 A amba nae a ri, ‘Wo shuma zwavhuḓi, iwe mulanda wavhuḓi! Ngauri wo fulufhedzea kha zwiṱuku, u ḓo vhusa miḓi ya fumi.’
18 Wa vhuvhili a ḓa a ri, ‘Muṋe wanga, bonndo yau yo bindulisa dziṅwe ṱhanu.’
19 A amba na onoyo a ri, ‘Na iwe u ḓo vhusa miḓi miṱanu.’
20 Ha ḓa muṅwe o fhambanaho na vhaṅwe, a ri, ‘Muṋe wanga, bonndo yau kheyi, ndo vha ndo i putela nga labi.
21 Muṋe wanga, ndi a u ofha ngauri u na vhuhali; u dzhia zwe wa si vhulunge, u kaṋa he wa si zwale.’
22 A amba nae a ri, ‘Iwe mulanda muvhi, ndi ḓo u haṱula nga zwe wa amba. Wo vha u tshi zwi ḓivha uri ndi munna wa vhuhali, ndi dzhia he ndi si vhulunge na u kaṋa he ndi si zwale.
23 Nga zwenezwo, ndi ngani u songo vhea tshelede yanga banngani? Ndo vha ndi tshi ḓo ri ndi tshi vhuya nda wana tshelede yanga i na nzwalelo.’
24 “A amba na vho imaho henefho a ri, ‘Mu dzhieleni yeneyo bonndo ni ṋee ane a vha na bonndo dza fumi.’
25 Fhedzi vha amba nae vha ri, ‘Muṋe washu, huufha e na bonndo dza fumi!’—
26 ‘Ndi a ni vhudza ndi ri: Ane a vha nazwo, u ḓo ṋewa zwo engedzeaho, fhedzi ane a si vhe nazwo u ḓo dzhielwa na zwiṱuku-ṱuku zwine a vha nazwo.
27 Zwiṅwe hafhu, ḓisani maswina anga e a vha a sa ṱoḓi ndi tshi a vhusa ni a vhulahe phanḓa hanga.’”
28 Ngauralo, musi Yesu o no fhedza u amba zwenezwo, a gonya Yerusalema.
29 Musi vha tshi vho sendela tsini na Betfage na Bethania Thavhani ya Miṱwari, a ruma vhafunziwa vhawe vhavhili,
30 a vha vhudza a ri: “Iyani muḓanani u re afho phanḓa haṋu, musi ni tshi swika ni ḓo wana mbongolana yo vhofhiwa, i sa athu ṋamelwa nga muthu. Ni i vhofholole ni i ḓise.
31 Arali muṅwe muthu a ni vhudzisa a ri, ‘Ndi ngani ni tshi khou i vhofholola?’ Ni ambe ni ri: ‘Murena u khou i ṱoḓa.’”
32 Vho rumiwaho vha ṱuwa vha wana zwi nga nḓila ye a vha vhudza ngayo.
33 Musi vha tshi khou vhofholola mbongolana, vhaṋe vhayo vha amba navho vha ri: “Ndi ngani ni tshi khou vhofholola mbongolana?”
34 Vha ri: “Murena u khou i ṱoḓa.”
35 Vha i isa kha Yesu, vha kapea zwiambaro zwavho zwa nga nnḓa kha mbongolana vha ṋamedza Yesu khayo.
36 A tshi khou tshimbila vhathu vha adza zwiambaro zwavho zwa nga nnḓa nḓilani.
37 Musi a tshi vho swika nḓilani i tsaho nga Thavhani ya Miṱwari, gogo ḽoṱhe ḽa vhafunziwa ḽa thoma u takala ḽa renda Mudzimu, ḽi tshi takalela mishumo yoṱhe ya maanḓa ye ḽa i vhona,
38 ḽa ri: “Nga hu rendwe a ḓaho sa Khosi dzinani ḽa Yehova! Kha hu vhe na mulalo ngei ṱaḓulu, hu rendwe Mudzimu wa ngei ṱaḓulu-ṱaḓulu!”
39 Naho zwo ralo, vhaṅwe Vhafarisei vhe vha vha vhe vhukati ha gogo vha amba nae vha ri: “Mufunzi, kaidza vhafunziwa vhau.”
40 Fhedzi a fhindula a ri: “Ndi a ni vhudza ndi ri: Arali avha vhathu vha nga fhumula, hu nga vhidzelela matombo.”
41 Musi a tshi vho sendela tsini, a vhona muḓi a u lilela,
42 a ri: “Ndi tama arali wo vha u tshi ṱalukanya zwithu zwe zwa vha zwi tshi ḓo u ḓisela mulalo, fhedzi zwenezwi zwithu wo dzumbelwa zwone.
43 Ngauri hu ḓo ḓa maḓuvha ane maswina au a ḓo u govhela, a u tangela ngomu a u tsikeledza a tshi bva thungo dzoṱhe,
44 vha ḓo u wisela fhasi khathihi na vhana vhau, a vha nga sii tombo ḽi nṱha ha ḽiṅwe, ngauri a wo ngo ṱalukanya tshifhinga tsha u ṱoliwa hau.”
45 Yesu a dzhena thembeleni a thoma u pandela vhoṱhe vhe vha vha vha tshi khou rengisa,
46 a amba navho a ri: “Ho ṅwalwa u pfi, ‘Nnḓu yanga i ḓo vha ya thabelo,’ fhedzi inwi ni i ita bako ḽa mavemu.”
47 A thoma u funza thembeleni ḓuvha ḽiṅwe na ḽiṅwe. Fhedzi vhotshifhe vhahulu na vhamaṅwalo na vharangaphanḓa vha vhathu vho vha vha tshi khou ṱoḓa u mu vhulaha,
48 vha si kone u wana nḓila ya u ita zwenezwo, ngauri vhathu vhoṱhe vho vha vho mu kuvhanganela u itela u mu thetshelesa.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “Mina.”
