Luka 2:1-52
2 Misini yeneyo Kesare* Augusto a bvisa ndaela ya uri vhathu vhoṱhe vha dzulaho kha ḽifhasi vha ṅwaliswe
2 (honoho u ṅwaliswa ha u thoma ho itea musi Kirenio e muvhusi wa Siria),
3 nahone vhathu vhoṱhe vha ya vha ḓiṅwalisa miḓini ya havho.
4 Na Yosefa a ṱuwa Galilea, muḓini wa Nazareta, a ya Yudea muḓini wa Davida, u vhidzwaho Betlehema, ngauri o vha e muraḓo wa lushaka lwa Davida.
5 O ya a ḓiṅwalisa khathihi na Maria, we a vha o mu vhinga samusi o vha o fulufhedzisa, nga tshenetsho tshifhinga Maria o vha e tsini na u vhofholowa.
6 Musi vhe henefho, tshifhinga tsha swika tsha uri a vhofholowe.
7 Nahone a beba ṅwana wa mutukana wa tanzhe, a mu putela nga labi a mu ladza mukungwani ngauri ho vha hu si na vhudzulo nḓuni ya vhaeni.
8 Kha ḽeneḽo shango ho vha hu na vhalisa vhe vha vha vhe malisoni nahone vha tshi khou lisa masambi avho vhusiku hoṱhe.
9 Nga u ṱavhanya, muruṅwa wa Yehova a ima vhukati havho, vhugala ha Yehova ha vha vhonetshela, vha dzhenwa nga nyofho khulu.
10 Fhedzi muruṅwa a amba navho a ri: “Ni songo ofha, ngauri ndi khou ni ḓivhadza mafhungo maḓifha ane a ḓo ḓisa dakalo ḽihulu kha vhathu vhoṱhe
11 ngauri ṋamusi no bebelwa Mutshidzi, Kristo Murena, muḓini wa Davida.
12 Tshiga tshine na ḓo mu ḓivha ngatsho ndi hetshi: Ni ḓo wana lushie lwo putelwa nga malabi lwo ladzwa mukungwani.”
13 Nga khathihi fhedzi ha mbo ḓi bvelela mmbi ya vharuṅwa ya ṱaḓulu, i tshi khou khoḓa Mudzimu i tshi ri:
14 “Nga hu rendwe Mudzimu wa ṱaḓulu-ṱaḓulu, nahone ḽifhasini nga hu vhe na mulalo vhukati ha vhathu vhane Mudzimu a vha takalela.”
15 Musi vharuṅwa vho no vhuyelela ṱaḓulu, vhalisa vha thoma u amba nga tshavho vha ri: “Kha ri ye Betlehema ri ye u vhona zwithu zwo iteaho zwe Yehova a ri ḓivhadza zwone.”
16 Vha ṱuwa nga u ṱavhanya vha wana Maria na Yosefa, na lushie lwo ladzwa mukungwani.
17 Musi vha tshi lu vhona, vha vha vhudza zwe vha vhudzwa zwone malugana na lushie.
18 Hone vhoṱhe vhe vha zwi pfa vha mangadzwa nga zwe vha vhudzwa nga vhalisa,
19 fhedzi Maria a vhulunga zwenezwi zwithu zwoṱhe, a dzula a tshi elekanya nga ha zwine zwenezwi zwa amba zwone.
20 Nga zwenezwo, vhalisa vha humela murahu, vha tshi renda na u khoḓa Mudzimu nga ha zwithu zwoṱhe zwe vha zwi pfa na u zwi vhona, samusi vho vha vho vhudzwa nga u ralo.
21 Nga murahu ha maḓuvha a malo, musi hu tshifhinga tsha u mu fumbisa, vha mu ira dzina ḽine ḽa pfi Yesu, dzina ḽe a ṋewa ḽone nga muruṅwa musi mme awe a sa athu vhifha muvhilini.
22 Zwiṅwe hafhu, musi tshifhinga tsho swika tsha uri vha kunakiswe u ya nga Mulayo wa Mushe, vha mu isa Yerusalema uri vha mu ṋekedze kha Yehova,
23 samusi zwo vha zwo ṅwalwa kha Mulayo wa Yehova: “Tanzhe ḽiṅwe na ḽiṅwe ḽa mutukana ḽi tea u vhidzwa ḽikhethwa phanḓa ha Yehova.”
24 Vha ṋekedza tshiṱhavhelo u ya nga zwe zwa ambiwa nga Mulayo wa Yehova: “Maivha muronzhe mavhili kana mafhondo mavhili a maivha.”
25 Nahone ho vha hu na muṅwe munna ngei Yerusalema we a vha a tshi pfi Simeoni, munna wa u luga we a vha a tshi ofha Mudzimu, o lindela u fhumudzwa ha Isiraele, nahone muya mukhethwa wo vha u khae.
26 Zwiṅwe hafhu, o vha o no dzumbululelwa nga muya mukhethwa uri ha nga fi a sa athu vhona muḓodzwa wa Yehova.
27 A tshi livhiswa nga muya mukhethwa a ya thembeleni, musi vhabebi vha tshi ḓisa Yesu uri vha tevhedze zwine Mulayo wa amba,
28 a takula ṅwana nahone a renda Mudzimu a ri:
29 “Murena Muvhusahoṱhe, zwino mulanda wau a nga fa o rudza mbilu samusi wo vha wo zwi amba
30 ngauri ndo vhona nḓila yau ya u tshidza
31 ye wa i lugiselela vhathu vhoṱhe,
32 tshedza tsha u vhonetshela vha dzitshaka na u ṋea vhathu vhau vha Isiraele vhugala.”
33 Khotsi na mme a ṅwana vha mangala zwithu zwe Simeoni a vha a tshi khou zwi amba.
34 Simeoni a vha fhaṱutshedza nahone a amba na Maria, mme a ṅwana a ri: “Nga nṱhani hawe, vhaṅwe kha ḽa Isiraele vha ḓo wa nahone vhaṅwe vha ḓo ima, vhanzhi vha ḓo mu amba luvhi naho Mudzimu a tshi ḓo shumisa zwiga u itela u sumbedza uri u nae
35 o vhewa u itela u dzumbulula zwine mbilu dza vhanzhi dza zwi elekanya, (a vha iwe vhuṱungu vhu ḓo u rumbula mbilu zwa tou nga u khou ṱhavhiwa nga banga).”
36 Ho vha hu na muporofita wa mufumakadzi we a vha a tshi pfi Ana, ṅwananyana wa Fanuele, wa lushaka lwa Asere. (Onoyu mufumakadzi o vha o no kegula nahone o dzula na munna wawe miṅwaha ya sumbe fhedzi,
37 o vha e tshilikadzi i re na miṅwaha ya fumalo-iṋa [84]). O vha a tshi dzula e hone thembeleni, a tshi ita tshumelo khethwa vhusiku na masiari, a tshi ḓidzima zwiḽiwa na u rabela.
38 Nga tshenetsho tshifhinga, a sendela tsini a thoma u livhuha Mudzimu, nahone a amba nga ha ṅwana kha vhoṱhe vho lindelaho u tshidzwa ha Yerusalema.
39 Musi vho no ita zwithu zwoṱhe u ya nga Mulayo wa Yehova, vha humela Galilea muḓini wa havho wa Nazareta.
40 Ṅwana a bvela phanḓa a tshi aluwa a vha na maanḓa, a ṱalifha, nahone Mudzimu a dzula a tshi mu takalela.
41 Vhabebi vhawe vho vha vho ḓowela u ya Yerusalema ṅwaha muṅwe na muṅwe vhuṱamboni ha Paseka.
42 Nahone musi e na miṅwaha ya fumi-mbili (12), vha ḓi ya vhuṱamboni samusi vho vha vho ḓowela u ita nga u ralo.
43 Musi vhuṱambo ho no fhela vha tshi khou humela murahu, mutukana Yesu a sala Yerusalema, fhedzi vhabebi vhawe vha si zwi ṱhogomele.
44 Vha tshimbila ḓuvha ḽoṱhe vha tshi humbula u nga u na vhaṅwe, nahone vha thoma u mu ṱoḓa kha mashaka na dzikhonani.
45 Fhedzi samusi vho vha vha sa mu wani, vha humela Yerusalema vha mu ṱoḓa nga vhuronwane.
46 Vha mu wana thembeleni nga murahu ha maḓuvha mararu, o dzula vhukati ha vhagudisi a tshi khou vha thetshelesa na u vha vhudzisa.
47 Hone vhoṱhe vhe vha vha vho mu thetshelesa, tshifhinga tshoṱhe vho vha vha tshi mangadzwa nga nḓila ine a pfesesa ngayo na nga phindulo dzawe.
48 Musi vha tshi mu vhona vha kanuka, nahone mme awe a ri: “Ṅwana’nga, u ri ita mini? Nṋe na khotsi au ro vha ro tsikeledzea vhukuma ri tshi khou u ṱoḓa.”
49 Fhedzi a amba navho a ri: “Ndi ngani no vha ni tshi khou nṱoḓa? Naa a ni zwi ḓivhi uri ndi fanela u vha ndi nḓuni ya Khotsi anga?”
50 Naho zwo ralo, a vho ngo pfesesa zwe a vha a tshi khou zwi amba.
51 A humela Nazareta navho, nahone a bvela phanḓa a tshi ḓiṱukufhadza khavho. Mme awe a dzula a tshi elelwa mbiluni yawe zwoṱhe zwe a vha a tshi zwi amba.
52 Yesu a bvela phanḓa a tshi ṱalifha na u aluwa nahone a tshi takalelwa nga Mudzimu na nga vhathu.
Ṱhaluso dzi re magumoni a siaṱari
^ Khosi.
