Luka 20:1-47
20 Ḽiṅwe ḓuvha musi a tshi khou funza vhathu thembeleni na u ḓivhadza mafhungo maḓifha, vhotshifhe vhahulu na vhamaṅwalo vhe na vhahulwane vha ḓa khae,
2 vha amba nae vha ri: “Ri vhudze uri izwi zwithu u zwi ita nga maanḓa a nnyi kana ndi nnyi o u ṋeaho eneo maanḓa?”
3 A vha fhindula a ri: “Na nṋe ndi ḓo ni vhudzisa mbudziso, ni mphindule:
4 Naa maanḓa a Yohane a u lovhedza o vha a tshi bva ṱaḓulu kana kha vhathu?”
5 Vha amba nga tshavho vha ri: “Arali ra amba uri, ‘A bva ṱaḓulu,’ u ḓo ri vhudzisa a ri, ‘Ndi ngani ni songo mu tenda?’
6 Fhedzi arali ra amba uri, ‘A bva kha vhathu,’ vhathu vha ḓo ri kanḓa nga matombo, ngauri vho vha vha tshi tenda uri Yohane ndi muporofita.”
7 Vha ri a vha ḓivhi hune maanḓa awe a bva hone.
8 Yesu a amba navho a ri: “Na nṋe a thi nga ni vhudzi uri ndi ita zwenezwi zwithu nga maanḓa a nnyi.”
9 A thoma u vhudza vhathu hetshi tshifanyiso a ri: “Ho vha hu na muṅwe munna we a vha e na tsimu ya minḓirivhe nahone a i kumedza vhalimi, a ya shangoni ḽa kule tshifhinga tshilapfu.
10 Fhedzi musi tshifhinga tshi tshi swika a ruma mulanda wawe kha vhalimi uri vha mu ṋee miṅwe ya mitshelo ya yeneyo tsimu ya minḓirivhe. Naho zwo ralo, vhalimi vha mu rwa vha mu humisa a songo fara tshithu.
11 A dovha a ruma muṅwe mulanda. Na onoyo vha mu rwa, vha mu holedza, a huma a songo fara tshithu.
12 A dovha a ruma mulanda wa vhuraru; na onoyo vha mu huvhadza vha mu sukumedzela nnḓa ha tsimu.
13 A tshi vhona zwenezwi muṋe wa tsimu ya minḓirivhe a ri, ‘Ndi ḓo ita mini? Ndi ḓo ruma murwa wanga ane nda mu funa. Khamusi vha ḓo mu ṱhonifha.’
14 Musi vhalimi vha tshi mu vhona, vha amba nga tshavho vha ri, ‘Uyu ndi ene muḽaifa; kha ri mu vhulahe uri ifa ḽi vhe ḽashu.’
15 Vha mu khurumedzela nnḓa ha tsimu ya minḓirivhe vha mu vhulaha. Ngauralo, muṋe wa tsimu ya minḓirivhe u ḓo ita mini nga vhenevho vhalimi?
16 U ḓo ḓa a vhulaha vhalimi vhenevho a ṋea vhaṅwe vhathu yeneyo tsimu ya minḓirivhe.”
Musi vha tshi pfa zwenezwo, vha ri: “Zwi nga si vhuye zwa itea!”
17 A vha lavhelesa a ri: “Zwiḽa zwe zwa ṅwalwa zwi amba mini musi hu tshi pfi: ‘Tombo ḽe ḽa laṱwa nga vhafhaṱi, ndi ḽone ḽe ḽa vha thikho ya tshifhaṱo’?
18 Muthu muṅwe na muṅwe a welaho nṱha ha ḽeneḽo tombo u ḓo vunḓekana. Ane ḽa mu wela, ḽi ḓo mu pwaṱula.”
19 Vhamaṅwalo na vhotshifhe vhahulu vho vha vha tshi ṱoḓa u mu fara nga tshenetsho tshifhinga, fhedzi vho vha vha tshi ofha vhathu, ngauri vho zwi ṱhogomela uri o vha a tshi khou amba nga tshifanyiso a tshi khou humbula nga havho.
20 Nga murahu ha u mu vhea iṱo, vha rumela vhanna vhe vha vha vho tholwa uri vha ḓiite vhavhuya, uri vha kone u mu fasha nga zwine a amba uri vha kone u mu isa kha muvhuso na kha maanḓa a muvhusi.
21 Vha mu vhudzisa vha ri: “Mufunzi, ri a zwi ḓivha zwa uri zwine wa zwi amba na u zwi funza ndi zwone nahone a u ṱaluli muthu, u funza nḓila ya Mudzimu u tendelana na ngoho:
22 Naa zwo tendelwa u bvisela Kesare* muthelo kana a zwo ngo tendelwa?”
23 Fhedzi a vhona vhukwila havho nahone a amba navho a ri:
24 “Ntsumbedzeni dinari.* Tshifanyiso itshi na dzina ndi zwa nnyi?” Vhone vha ri: “Ndi zwa Kesare.”
25 A amba navho a ri: “Ngauralo, Kesare mu ṋeeni zwi re zwa Kesare, Mudzimu ni mu ṋee zwi re zwa Mudzimu.”
26 Vha si kone u mu fasha kha zwe a vha a tshi khou amba phanḓa ha vhathu, fhedzi nge vha mangadzwa nga phindulo yawe, vha fhumula.
27 Naho zwo ralo, ha ḓa vhaṅwe Vhasadukei vhane vha amba uri a hu na mvuwo vha mu vhudzisa
28 vha ri: “Mufunzi, Mushe o ri ṅwalela a ri: ‘Arali mukomana we a vha o vhinga mufumakadzi, a fa a si na vhana, murathu wawe u fanela u vhinga onoyo mufumakadzi uri a bebele mukomana wawe vhana.’
29 Zwino ho vha hu na vhanna vha sumbe, vhana vha muthu, wa tanzhe a vhinga, a lovha a si na vhana.
30 Ngauralo na wa vhuvhili
31 na wa vhuraru a mu vhinga. Vhoṱhe vha sumbe vha mu vhinga, vha fa vha si na vhana.
32 Mafheleloni na mufumakadzi onoyo a fa.
33 Zwino musi vhafu vha tshi vuswa, mufumakadzi uyo u ḓo vha wa ufhio? Ngauri o vha e mufumakadzi wa vhenevho vha sumbe.”
34 Yesu a vha fhindula a ri: “Vhana vha ano maitele a zwithu vha a vhinga na u vhingwa,
35 fhedzi vhane vha fanelea u tshila kha eneo maitele a zwithu na vhane vha fanelea u vuswa vhafuni a vha vhingi na u vhingwa.
36 A vha tsha ḓo fa, ngauri vha ḓo nga vharuṅwa, vha ḓo vha vhana vha Mudzimu vhe a vha vusa vhafuni.*
37 Mushe o amba nga ha u vuswa ha vhafu kha mafhungo a tshiṱaka tsha mipfa, musi a tshi vhidza Yehova uri ‘ndi Mudzimu wa Abrahamu, Mudzimu wa Isaka na Mudzimu wa Yakobo.’
38 A si Mudzimu wa vho faho, fhedzi ndi wa vha tshilaho, ngauri khae vhoṱhe vha khou tshila.”
39 Vhaṅwe vhamaṅwalo vha ri: “Mufunzi, wo amba zwavhuḓi.”
40 Ngauri vho vha vha si na tshivhindi tsha u dovha vha mu vhudzisa dziṅwe mbudziso.
41 A amba navho a ri: “Zwo ḓa hani uri vha ambe uri Kristo ndi murwa wa Davida?
42 Ngauri Davida o amba kha bugu ya Dzipsalme a ri: ‘Yehova o amba na Murena wanga a ri: “Dzula kha tshanḓa tshanga tsha u ḽa
43 ndi vhuye ndi ite maswina au vhukando ha milenzhe yau.”’
44 Davida o mu vhidza Murena; fhedzi zwi ḓa hani uri a vhe murwa wawe?”
45 Musi vhathu vhoṱhe vho thetshelesa, a amba na vhafunziwa vhawe a ri:
46 “Thanyelani vhamaṅwalo vhane vha tama u tshimbila vho ambara khanzu na u ṱoḓa u lumeliswa mimakete na u dzula zwiduloni zwa phanḓa dzisinagogoni na u dzudzwa zwiduloni zwo vhetshelwaho vhaeni vha vhuimo ha nṱha zwimimani
47 na vhane vha dzhia thundu dza tshilikadzi, vha kanganyedza nga thabelo ndapfu. Vhenevho vha ḓo wana khaṱulo i vhavhaho vhukuma.”
Ṱhaluso dzi re magumoni a siaṱari
^ Khosi.
^ Ndi tshelede ya Vharoma ya tsimbi.
^ Kana “vhana vha mvuwo.”
