Luka 21:1-38
21 Musi a tshi lavhelesa, a vhona vhapfumi vha tshi khou longa zwifhiwa zwavho mbulungeloni.
2 A vhona tshilikadzi i shayaho i tshi khou longela zwipeni zwivhili henefho, zwe zwa vha zwi si na ndeme,
3 a ri: “Ngoho ndi a ni vhudza ndi ri: Iyi tshilikadzi, naho i tshi shaya, yo longela zwinzhi u fhira vhoṱhe.
4 Ngauri vhoṱhe vho longa vha tshi bvisa kha zwinzhi zwine vha vha nazwo, fhedzi naho e mushai, onoyu mufumakadzi o longela zwoṱhe zwe a vha a tshi ḓitshidza ngazwo.”
5 Nga murahu, musi vhaṅwe vha tshi khou amba nga ha thembele, nga ha nḓila ye ya khavhiswa ngayo nga matombo avhuḓi na nga zwifhiwa zwo ṋekedzwaho Mudzimu,
6 Yesu a ri: “Zwenezwi zwithu zwine na khou zwi vhona, hu ḓo ḓa maḓuvha ane ha sa ḓo sala tombo ḽi nṱha ha ḽiṅwe ḽi songo piḓimulwa.”
7 Ngauralo, vha mu vhudzisa vha ri: “Mufunzi, izwi zwithu zwi ḓo itea lini, nahone tshiga tsha uri zwenezwi zwi ḓo itea tshi ḓo vha tshifhio?”
8 A vha fhindula a ri: “Ni ṱhogomele uri ni si xedzwe, ngauri vhanzhi vha ḓo ḓa nga dzina ḽanga, vha ri, ‘Ndi nṋe onoyo,’ vha dovha vha ri: ‘Tshifhinga tsho vhewaho tsho swika.’ Ni songo vha tevhela.
9 Hone musi ni tshi pfa nga ha dzinndwa na dzikhakhathi, ni songo tshuwa. Ngauri zwenezwi zwithu zwi fanela u itea u thoma, fhedzi vhufhelo a vhu nga vhi hone nga tshenetsho tshifhinga.”
10 A amba navho a ri: “Lushaka lu ḓo lwa na luṅwe lushaka, muvhuso wa lwa na muṅwe muvhuso,
11 hu ḓo vha na midzinginyo mihulu na malwadze, na u ṱahela ha zwiḽiwa fhethu ho fhamba-fhambanaho, vhathu vha ḓo vhona zwi ofhisaho na maṱula a bvaho ṱaḓulu.
12 “Musi zwenezwi zwithu zwoṱhe zwi sa athu itea, vhathu vha ḓo ni fara vha ni tovhola, vha ni isa dzisinagogoni na dzidzhele. Ni ḓo iswa phanḓa ha mahosi na vhavhusi nga nṱhani ha dzina ḽanga.
13 Zwi ḓo ni ṋea tshibuli tsha u ṱanziela.
14 Ni songo humbula hu tshee nga phanḓa nga ha nḓila ine na ḓo fhindula ngayo,
15 ndi ḓo ni ṋea vhuṱali nahone ndi ḓo ni thusa uri ni ḓivhe zwine na ḓo zwi amba, vhahanedzi vhaṋu vhoṱhe vha nga si kone u ni pikisa kana u ni hanedza.
16 Zwiṅwe hafhu, ni ḓo hwelelwa nga vhabebi, vharathu na vhakomana, mashaka na dzikhonani, nahone vha ḓo vhulaha vhaṅwe vhaṋu,
17 ni ḓo vhengwa nga vhathu vhoṱhe nga nṱhani ha dzina ḽanga.
18 Naho zwo ralo, a hu nga ṱhukhuwi na luvhudzi na luthihi lwa ṱhohoni dzaṋu.
19 Nga u konḓelela ni ḓo ḓitshidza.
20 “Musi ni tshi vhona Yerusalema wo tangwa nga dzimmbi, ni ḓivhe uri u fheliswa hawo hu tsini.
21 Ngauralo, vha re Yudea kha vha thome u shavhela dzithavhani, vha re nga ngomu kha vha bve, nahone vha re nnḓa ha muḓi vha songo dzhena nga ngomu,
22 ngauri ndi maḓuvha a uri Mudzimu a lifhedze vhathu uri zwithu zwoṱhe zwo ṅwalwaho zwi ḓadzee.
23 Khombo vhathu vho vhifhaho muvhilini na vha mamisaho misini yeneyo! Ngauri hu ḓo vha na vhuṱungu vhuhulu shangoni nahone vhenevha vhathu vha ḓo pfiswa vhuṱungu,
24 vha ḓo vhulahwa nga banga na u thubwa nga tshaka dzoṱhe, nahone Yerusalema u ḓo kandekanywa nga dzitshaka, u swikela zwifhinga zwo vhewaho zwa dzitshaka zwi tshi ḓadzea.
25 “Hu ḓo vha na maṱula kha ḓuvha, ṅwedzi, na ṋaledzi nahone tshaka dza kha ḽifhasi dzi ḓo pfa vhuṱungu, dzi sa ḓivhi uri dzi ite mini nga nṱhani ha u unga ha lwanzhe na u halifha halwo,
26 vhathu vha ḓo ṋoka nga nyofho na u lindela zwithu zwine zwa ḓo itea kha ḽifhasi, ngauri na maanḓa a maṱaḓulu a ḓo dzinginyea.
27 Ndi hone vha tshi ḓo vhona Murwa-muthu a tshi ḓa e kha gole e na maanḓa na vhugala vhuhulu.
28 Musi zwenezwi zwithu zwi tshi thoma u itea, ivhani na maanḓa na tshivhindi, ngauri u vhofhololwa haṋu hu tsini.”
29 A vha vhudza tshifanyiso a ri: “Lavhelesani muhuyu na miri yoṱhe.
30 Musi ni tshi vhona yo ṱuma lurere, ni ḓivha uri tshilimo tshi tsini.
31 Nga hu fanaho, musi ni tshi vhona zwenezwi zwithu zwi tshi itea, ni ḓivhe uri Muvhuso wa Mudzimu u tsini.
32 Ngoho ndi a ni vhudza ndi ri: Murafho uyu u nga si lovhe hezwi zwithu zwoṱhe zwi sa athu itea.
33 Ḽiṱaḓulu na ḽifhasi zwi ḓo lovha, fhedzi maipfi anga ha nga lovhi.
34 “Ni ṱhogomele uri mbilu dzaṋu dzi sa ḓo lemelwa nga u ḽesa, u nwesa, na mbilaelo dza vhutshilo, ḽeneḽo ḓuvha ḽa ni ḓela nga u ṱavhanya
35 sa tshikwekwe. Ngauri ḽi ḓo ḓela vhoṱhe vha re kha ḽifhasi.
36 Ngauralo, dzulani no fhaṱuwa, ni tshi rabela tshifhinga tshoṱhe uri ni kone u ponyoka zwenezwi zwithu zwoṱhe zwine zwa ḓo itea nahone ni kone u ima phanḓa ha Murwa-muthu.”
37 Nga masiari o vha a tshi funza thembeleni, fhedzi nga madekwana o vha a tshi bva muḓini a ya u eḓela Thavhani ya Miṱwari.
38 Vhathu vhoṱhe vho vha vha tshi ḓa thembeleni nga matsheloni-tsheloni u itela u mu thetshelesa.
