Luka 22:1-71
22 Tshifhinga tsha vhuṱambo ha zwinkwa zwi si na mbiliso, vhune ha pfi Paseka, tsho vha tshi tshi vho sendela tsini.
2 Vhotshifhe vhahulu na vhamaṅwalo vho vha vha tshi khou ṱoḓa nḓila ine vha nga fara ngayo Yesu uri vha mu vhulahe, fhedzi vho vha vha tshi ofha vhathu.
3 Sathane a ṱuṱuwedza Yudasi, we a vha a tshi pfi Iskariote, we a vha e muṅwe wa vha fumi-mbili (12),
4 a ya u amba na vhotshifhe vhahulu na vhalangi vha vhalindathembele nga ha nḓila ya u mu fheṱa.
5 Vha takala nahone vha fulufhedzisa u mu ṋea tshelede ya tsimbi–tseṱha.
6 Ngauralo, a tendelana navho nahone a thoma u ṱoḓa tshibuli tshavhuḓi tsha u mu fheṱa khavho vhathu vha sa zwi ḓivhi.
7 Ha swika ḓuvha ḽa zwinkwa zwi si na mbiliso, nahone ho vha hu tshi fanela u ṱhavhiwa ngwana ya Paseka,
8 a ruma Petro na Yohane, a ri: “Tshimbilani ni ri lugiselele Paseka ri ḽe.”
9 Vha vhudzisa uri: “U ṱoḓa ri tshi u lugiselela ngafhi?”
10 A vha fhindula a ri: “Musi ni tshi dzhena muḓini, ni ḓo ṱangana na muṅwe munna o hwala mudzio wa maḓi. Ni mu tevhele nḓuni ine a ḓo dzhena khayo.
11 Ni fanela u amba na muṋe wa nnḓu ni ri, ‘Mufunzi u ri: “I ngafhi kamara ya vhaeni ine nda ḓo ḽela hone Paseka na vhafunziwa vhanga?”’
12 Onoyo munna u ḓo ni sumbedza kamara khulwane ya nṱha yo dzudzanywaho. Ni ri lugisele henefho.”
13 Ngauralo, vha ṱuwa nahone vha wana zwi nga nḓila ye a vha vhudza ngayo, vha lugiselela Paseka.
14 Musi tshifhinga tshi tshi swika, a dzula ṱafulani na vhaapostola vhawe.
15 A amba navho a ri: “Ndi na lutamo luhulwane lwa u ḽa heyi Paseka na inwi musi ndi sa athu tambudzwa,
16 ngauri ndi a ni vhudza ndi ri, A thi tsha ḓo dovha nda i ḽa u swikela hu tshi ḓadzea zwine ya zwi imela Muvhusoni wa Mudzimu.”
17 A dzhia tshinwelo, a livhuha a ri: “Dzhiani ni nwe ni tshi tou sielisana,
18 ngauri ndi a ni vhudza ndi ri, U bva zwino, a thi tsha ḓo dovha nda nwa waini hu vhuye hu swike Muvhuso wa Mudzimu.”
19 A dovha a dzhia na tshinkwa, a livhuha, a tshi ṅwata, a vha ṋea a ri: “Tshi imela muvhili wanga, une wa ḓo ṋekedzwa u itela inwi. Dzulani ni tshi ita zwenezwi u itela u nkhumbula.”
20 A dzhia tshinwelo a ita zwi fanaho musi vho no ḽa tshilalelo tsha nga madekwana, a ri: “Tshinwelo itshi tshi imela mulanga muswa wa malofha anga ane a ḓo shululelwa inwi.
21 “Fhedzi, ane a ḓo mpheṱa u khou ḽa zwiḽiwa na nṋe.
22 Ngauri Murwa-muthu u ḓo fa nga nḓila ye zwa vha zwo dzula zwo ambiwa ngayo; khombo kha onoyo muthu ane a ḓo mu fheṱa!”
23 Vha thoma u amba nga tshavho uri ndi nnyi khavho ane a ḓo ita zwenezwo zwithu.
24 Naho zwo ralo, ha vuwa khani vhukati havho ya uri ndi nnyi we a vha a tshi vhonala e muhulwane khavho.
25 Fhedzi a amba navho a ri: “Mahosi a vhusa dzitshaka, nahone vhathu vha ṋea madzina o khetheaho vhane vha vha vhusa.
26 Inwi a no ngo fanela u vha nga yeneyo nḓila. Fhedzi ane a ṱoḓa u vha muhulwane vhukati haṋu u fanela u ḓiita muṱuku, ane a ṱoḓa u vha murangaphanḓa a vhe mushumeli.
27 Muhulwane ndi ufhio, ndi ane a khou ḽa zwiḽiwa kana ndi ane a khou mu shumela? Naa ndi ane a khou ḽa zwiḽiwa? Fhedzi nṋe ndi nga muthu ane a khou ni shumela.
28 “Naho zwo ralo, ndi inwi no konḓelelaho na nṋe milingoni,
29 ndi vhofha mulanga na inwi, samusi na Khotsi anga o vhofha mulanga wa Muvhuso na nṋe,
30 uri ni ḽe ni nwe ṱafulani ḽanga Muvhusoni wanga, ni dzule kha dzikhuluṋoni u itela u haṱula tshaka dza fumi-mbili (12) dza Isiraele.
31 “Simoni, Simoni, Sathane o humbela uri a ni linge noṱhe sa mulimi a tshi fhefhera goroi.
32 Fhedzi ndo u rabelela uri lutendo lwau lu si fhele, musi wo no rembuluwa, u khwaṱhise vharathu vhau.”
33 Nga zwenezwo, Simoni a amba nae a ri: “Murena, ndo ḓilugisela u ya na iwe dzhele na u fa na iwe.”
34 Yesu a amba na Petro a ri: “Ndi a u vhudza, ṋamusi mukukulume u sa athu lila, u ḓo vha wo no landula luraru wa ri a u nnḓivhi.”
35 A dovha a vha vhudzisa a ri: “Musi ndi tshi ni ruma ni si na tshipatshi tsha tshelede na mukhwama wa mbuvha na thovho, naa no vhuya na shaya tshithu?” Vha fhindula vha ri: “Hai!”
36 A amba navho a ri: “Fhedzi zwino ane a vha na tshipatshi tsha tshelede nga a tshi dzhie, na a re na mukhwama wa mbuvha a ite nga u ralo, nahone a si na banga nga a rengise nguvho yawe a ḽi renge.
37 Ndi a ni vhudza ndi ri zwo ṅwalwaho zwi fanela u ḓadzea kha nṋe, zwa uri, ‘O baḓekanywa na vhaitazwivhi.’ Ngauri zwine zwa kwama nṋe zwi khou ḓadzea.”
38 Vhone vha ri: “Murena, mabanga mavhili khea.” Ene a amba navho a ri: “O lingana.”
39 A ṱuwa a ya Thavhani ya Miṱwari samusi o vha o ḓowela u ya henefho, nahone vhafunziwa vhawe vha mu tevhela.
40 Musi a tshi swika henefho, a amba navho a ri: “Bvelani phanḓa ni tshi rabela uri ni si dzhene milingoni.”
41 A vha sia nahone a fhirela phanḓanyana, a gwadama a thoma u rabela,
42 a ri: “Khotsi, arali u tshi funa, bvisa tshinwelo itshi kha nṋe. Naho zwo ralo, hu songo itwa zwine nṋe nda zwi funa, fhedzi nga hu itwe zwi funwaho nga iwe.”
43 Ha mbo ḓi bvelela muruṅwa wa ṱaḓulu a ḓa khae a mu khwaṱhisa.
44 Musi a tshi khou pfa vhuṱungu, a bvela phanḓa a tshi rabela zwi tshi bva mbiluni, nahone biko ḽawe ḽa nga marotha a malofha a tshi wela mavuni.
45 Nahone a tshi fhedza u rabela, a ya kha vhafunziwa vhawe a wana vho eḓela nga u ṱungufhala,
46 a amba navho a ri: “Ndi ngani no eḓela? Vuwani ni bvele phanḓa ni tshi rabela, uri ni si dzhene mulingoni.”
47 Musi a tshi kha ḓi amba, ha bvelela munna ane a pfi Yudasi, muṅwe wa vha fumi-mbili (12), o ranga phanḓa gogo, a ya ha Yesu a mu khisa kha shama.
48 Fhedzi Yesu a amba nae a ri: “Yudasi, ni khou fheṱa Murwa-muthu nga u mu khisa?”
49 Musi vhe vha vha vhe nae vha tshi vhona zwe zwa vha zwi tshi khou ṱoḓa u itea, vha ri: “Murena, naa ri vha ṱhavhe nga mabanga?”
50 Muṅwe wavho a tumula nḓevhe ya tsha u ḽa ya mulanda wa tshifhe muhulu.
51 Yesu a fhindula a ri: “Litsha zwine wa khou ita.” Nahone a kwama nḓevhe ya onoyo mulanda a mu fhodza.
52 Nga murahu ha zwenezwo, Yesu a amba na vhotshifhe vhahulu na vhalangi vha vhalinda–thembele na vhahulwane vhe vha vha vho ḓa khae a ri: “Naa no bva no fara mabanga na dzithonga zwa tou nga ni khou ya u fara ḽivemu?
53 Musi ndi na inwi thembeleni ḓuvha ḽiṅwe na ḽiṅwe, a no ngo mpfara. Fhedzi tshino ndi tshifhinga tshaṋu na tsha ane a vha na maanḓa a swiswi.”
54 Ngauralo, vha mu fara vha ṱuwa nae vha mu isa ha tshifhe muhulu; fhedzi Petro o vha a tshi khou tevhela nga kule.
55 Musi vho no vhasa mulilo vhukati ha muṱa vho dzula vhoṱhe, Petro a ḓa a dzula navho.
56 Fhedzi musidzana wa mulanda a mu vhona a tshi khou ora mulilo a mu lavhelesa a ri: “Hoyu munna o vha a tshi tshimbila nae.”
57 Fhedzi Petro a hanedza a ri: “A thi mu ḓivhi.”
58 Nahone nga murahu ha tshifhinganyana, muṅwe muthu a mu vhona a ri: “Na iwe u muṅwe wavho.” Petro a ri: “A thi muṅwe wavho.”
59 Ho no fhela tshifhinga tshi ṱoḓaho u vha awara, muṅwe munna a amba o khwaṱhisa a ri: “Ndi ngoho uri hoyu munna o vha a tshi tshimbila nae, nahone ndi Mugalilea!”
60 Fhedzi Petro a ri: “Zwine wa khou zwi amba a thi zwi ḓivhi.” Nahone nga u ṱavhanya musi a tshi kha ḓi amba, mukukulume wa lila.
61 Murena a rembuluwa a lavhelesa Petro, nahone Petro a humbula zwe Yesu a mu vhudza zwone a tshi ri: “Musi mukukulume u sa athu lila ṋamusi, u ḓo vha wo no nndandula luraru.”
62 A bvela nnḓa a lila lu ṱungufhadzaho.
63 Vhanna vhe vha vha vho fara Yesu vha thoma u mu goḓa, vha mu rwa,
64 musi vho mu thivha tshifhaṱuwo vho vha vha tshi mu vhudzisa vha ri: “Porofita! Ndi nnyi o u rwaho?”
65 Vha bvela phanḓa vha tshi mu sema nga zwithu zwinzhi.
66 Nga matsheloni, ha kuvhangana vhahulwane vha vhathu, vhotshifhe vhahulu na vhamaṅwalo, vha mu isa holoni yavho ya Sanhedrini,* vha ri:
67 “Ri vhudze arali u Kristo.” Fhedzi a vha fhindula a ri: “Naho nda ni vhudza, a ni nga ḓo tenda na luthihi.
68 Naho nda ni vhudzisa, ni nga si fhindule.
69 Naho zwo ralo, u bva zwino Murwa-muthu u ḓo vha o dzula thungo ya tshanḓa tsha u ḽa tsha maanḓa tsha Mudzimu.”
70 Nahone vhoṱhe vha ri: “Naa u Murwa wa Mudzimu?” A vha fhindula a ri: “Ndi inwi vhane na khou amba nga u ralo.”
71 Vha ri: “Ri kha ḓi ṱoḓa ṱhanzi dza mini? Ngauri roṱhe ro zwi pfa zwe a amba.”
Ṱhaluso dzi re magumoni a siaṱari
^ Yo vha i khoro khulwane ya Vhayuda.
