Luka 23:1-56
23 Vhoṱhe vha takuwa, vha mu isa ha Pilato.
2 Vha thoma u mu pomoka vha ri: “Hoyu munna ro mu wana a tshi khou xedza lushaka lwashu, u dzivhisa u bvisela Kesare* muthelo nahone o amba uri ndi ene Kristo ane a vha khosi.”
3 Pilato a vhudzisa Yesu a ri: “Naa u Khosi ya Vhayuda?” A mu fhindula a ri: “Ndi iwe ane wa khou amba zwenezwo.”
4 Pilato a amba na vhotshifhe vhahulu na gogo a ri: “Hoyu munna a thi mu vhoni mulandu.”
5 Fhedzi vha simesa u amba vha ri: “U thithisa vhathu nga u funza kha ḽoṱhe ḽa Yudea, na u bva ngei Galilea u swika fhano.”
6 Pilato a tshi pfa zwenezwo, a vhudzisa arali Yesu o vha e Mugalilea.
7 Musi a tshi pfa uri o vha a tshi bva fhethu he ha vha hu tshi vhuswa nga Herode, a mu rumela ha Herode, we a vha e Yerusalema nga tshenetsho tshifhinga.
8 Musi Herode a tshi vhona Yesu, a takala nga maanḓa, ngauri ho vha hu kale a tshi ṱoḓa u mu vhona, ngauri o vha o pfa zwithu zwinzhi nga hae, o vha a tshi ṱoḓa u mu vhona a tshi ita tshiṅwe tshiga.
9 Nga zwenezwo, a thoma u mu vhudzisa mbudziso nnzhi, fhedzi a si mu fhindule.
10 Naho zwo ralo, vhotshifhe vhahulu na vhamaṅwalo vha sokou ima vha mu pomoka vho sinyuwa.
11 Herode na maswole awe vha mu fara nga nḓila i sumbedzaho lunyadzo, vha mu holedza nga u mu ambadza tshiambaro tshi penyaho vha mu humisela ha Pilato.
12 Herode na Pilato vha mbo ḓi vha dzikhonani nga ḽeneḽo ḓuvha, ngauri musi hu sa athu itea zwenezwo, vho vha vhe maswina.
13 Pilato a kuvhanganya vhotshifhe vhahulu na vharangaphanḓa na vhaṅwe vhathu
14 a amba navho a ri: “No ḓisa hoyu munna kha nṋe ni tshi ri u khou ṱuṱuwedza vhathu uri vha vutshele muvhuso. Zwino ndo mu sengisa phanḓa haṋu, fhedzi a tho ngo wana zwiitisi zwa u pomoka hoyu munna.
15 Na Herode ho ngo mu vhona mulandu, ngauri o dovha a mu vhuisa kha riṋe, a hu na mulandu we a u ita une wa nga ita uri a tewe nga u fa.
16 Ndi ḓo mu rwa nda mu vhofholola.”
17 * ——
18 Fhedzi vha huwelela vhe na gogo ḽavho ḽoṱhe vha ri: “Kha vhulahwe nahone hu vhofhololwe Baraba!”
19 (Onoyu munna o vha o valelwa dzhele nga nṱhani ha u vutshela muvhuso na u vhulaha he ha itea muḓini.)
20 Pilato a dovha a amba navho, ngauri o vha a tshi ṱoḓa u vhofholola Yesu.
21 Vha thoma u zhamba vha ri: “Mu ombele kha danda! Mu ombele kha danda!”
22 A amba navho lwa vhuraru a ri: “Ndi ngani uyu munna a tshi fanela u ombelwa kha danda. O tshinya’ni? A tho ngo wana e na mulandu we a u ita une a nga tewa nga u fa; nga zwenezwo, ndi ḓo mu rwa nahone nda mu vhofholola.”
23 Vha tou ṋaṋa u zhamba, vha tshi ṱoḓa uri a ombelwe, lwe Pilato a vhuya a neta.
24 Pilato a haṱula uri vha ṋewe zwine vha khou zwi ṱoḓa:
25 A vhofholola uḽa munna we a vha o valelwa dzhele nge a vutshela muvhuso na u vhulaha, onoyo we vha mu humbela, fhedzi a vha kumedzela Yesu uri vha ite zwine vha funa ngae.
26 Musi vha tshi khou ṱuwa nae, vha fara Simoni wa Kirene, we a vha a tshi bva mahayani, vha mu hwalisa danda ḽa tshengedzo ḽa Yesu uri a mu tevhele.
27 O vha a tshi khou tevhelwa nga gogo na vhafumakadzi vhe vha vha vho ṱungufhala vha tshi khou mu lilela.
28 Yesu a rembuluwa a lavhelesa vhenevho vhafumakadzi a ri: “Vhananyana vha Yerusalema, litshani u ndilela. Hone ḓilileleni ni lilele na vhana vhaṋu
29 ngauri, hu ḓa maḓuvha ane vhathu vha ḓo ri, ‘Hu takala vhafumakadzi vha sa bebi, vha songo mamisaho!’
30 Vha ḓo thoma u amba na dzithavha vha ri, ‘Ri weleni!’ vha amba na zwikwara vha ri, ‘Ri fukedzeni!’
31 Ngauri arali vha tshi ita zwenezwi zwithu musi muri u tshee muṋu, hu ḓo bvelela mini musi wo no oma?”
32 Ho vha hu na vhanna vhavhili vha vhaitazwivhi, vhe na vhone vha vha vha tshi khou ya u vhulahwa.
33 Musi vha tshi swika fhethu hune ha pfi Fhethu ha Madethele, vha mu ombela na vhenevho vhaitazwivhi, muṅwe e nga thungo ya tshanḓa tsha u ḽa, muṅwe e nga thungo ya tsha monde.
34 [[Fhedzi Yesu o vha a tshi khou ri: “Khotsi, vha hangwele, ngauri a vha ḓivhi zwine vha khou zwi ita.”]] Zwiṅwe hafhu, vha kovhekana zwiambaro zwawe nga u ita mamvaṱe.
35 Nahone vha ima vho mu lavhelesa. Fhedzi vharangaphanḓa vho vha vho sinyuwa vha tshi ri: “O tshidza vhaṅwe; mu litsheni a ḓitshidze, arali e ene Muḓodzwa* wa Mudzimu, Munangiwa.”
36 Na maswole o vha a tshi khou mu goḓa, a tshi ḓa a tshi mu ṋea waini yo vhilesaho
37 nahone a ri: “Arali u Khosi ya Vhayuda, ḓitshidze.”
38 Ho vha hu na nḓivhadzo nṱha ha ṱhoho yawe ine ya ri: “Heyi ndi Khosi ya Vhayuda.”
39 Fhedzi muṅwe wa vhaitazwivhi we a vha o ombelwa henefho a thoma u mu sema a ri: “Naa a u Kristo? Ḓitshidze na riṋe u ri tshidze.”
40 Muṅwe a mu kaidza a ri: “Naa a u ofhi Mudzimu, huufha na iwe wo haṱulwa nga nḓila i fanaho?
41 Riṋe ro tewa nga u haṱulwa, ngauri ri khou wana zwo ri fanelaho nga nṱhani ha zwe ra ita; fhedzi uyu munna ho ngo ita tshithu na tshithihi tsho khakheaho.”
42 Ngauralo, a ri: “Yesu, u nkhumbule musi u tshi dzhena Muvhusoni wau.”
43 Yesu a amba nae a ri: “Ngoho ndi a u vhudza ṋamusi, u ḓo vha na nṋe Paradisoni.”
44 Nga tshenetsho tshifhinga ho vha hu tshi vho ṱoḓa u nga tshifhinga tsha vhurathi,* fhedzi ha mbo ḓi vha na swiswi ḽihulu shangoni ḽoṱhe u swika nga tshifhinga tsha vhuṱahe*
45 nga nṱhani ha uri a ho ngo tsha vha na tshedza tsha ḓuvha; nga zwenezwo labi ḽe ḽa vha ḽo tsira fhethu hukhethwa thembeleni ḽa kheruwa nga vhukati.
46 Yesu a vhidzelela nga ipfi ḽihulu a ri: “Khotsi anga, ndi kumedza vhutshilo hanga zwanḓani zwau.” Musi o no amba zwenezwo, a mbo ḓi fa.
47 Nge a vhona zwe zwa bvelela, mulangammbi a thoma u renda Mudzimu a ri: “Ngangoho munna uyu o vha o luga.”
48 Gogo ḽe ḽa vha ḽo kuvhangana henefho ḽo lavhelesa, musi ḽi tshi vhona zwithu zwe zwa itea, ḽa humela mahayani ḽi tshi khou ḓirwa dzikhana nga u pfa vhuṱungu.
49 Vhoṱhe vhe vha vha vha tshi ḓivha Yesu vho vha vho ima kule. Na vhafumakadzi vhe vha tevhela Yesu u bva Galilea, vho vha vho ima henefho vha tshi khou vhona zwenezwi zwithu zwoṱhe.
50 Ho vha hu na muṅwe munna ane a pfi Yosefa, muraḓo wa Khoro, we a vha e munna muvhuya.
51 Onoyu munna ho ngo tikedza vhukwila havho na zwiito zwavho. O vha a tshi bva Arimathia, muḓini wa Vhayuda, nahone o vha o lindela Muvhuso wa Mudzimu.
52 Onoyo munna o ya kha Pilato a humbela tshitumbu tsha Yesu.
53 A tsitsa tshenetsho tshitumbu a tshi putela nga labi ḽavhuḓi, a tshi vhulunga vhiḓani ḽe ḽa vha ḽo korwa kha tombo, ḽe ḽa vha ḽi sa athu vhulunga muthu.
54 Ho vha hu ḓuvha ḽa u Lugiselela, nahone Sabatha i tshi khou swika.
55 Fhedzi vhafumakadzi vhe vha bva nae vha tshi bva Galilea, vha tevhela u itela u vhona vhiḓa na nḓila ye tshitumbu tsha vhulungwa ngayo,
56 vha humela murahu u lugiselela mishonga na mapfura a nukhelelaho. Fhedzi, vha awela nga Sabatha vha tshi tevhedza ndaela.
Ṱhaluso dzi re magumoni a siaṱari
^ Khosi.
^ Kristo.
^ Hu ṱoḓaho u vha nga awara ya vhufumi-mbili (12) nga masiari.
^ Hu ṱoḓaho u vha nga awara ya vhuraru nga masiari.
