Luka 24:1-53
24 Naho zwo ralo, nga matsheloni-tsheloni, nga ḓuvha ḽa u thoma ḽa vhege, vhenevho vhafumakadzi vha ya vhiḓani vho fara mishonga ye vha i lugiselela.
2 Fhedzi vha wana tombo ḽo phiguluselwa kule ha vhiḓa,
3 vha tshi dzhena vhiḓani, vha wana hu si na tshitumbu tsha Murena Yesu.
4 Musi vha tshee vho mangadzwa nga zwenezwo, ha bvelela vhanna vhavhili vho ambara zwiambaro zwi penyaho.
5 Vhenevho vhafumakadzi vha ofha vha kotamisela zwifhaṱuwo zwavho fhasi, nga zwenezwo, vhenevho vhanna vha ri: “Ndi ngani ni tshi khou ṱoḓa A tshilaho vhukati ha vhafu?
6 [[Haho fhano, fhedzi o vuswa.]] Humbulani zwe a ni vhudza ni ngei Galilea,
7 a tshi amba uri Murwa-muthu u fanela u kumedzwa kha vhaitazwivhi, a ombelwe nahone nga ḓuvha ḽa vhuraru a vuswe.”
8 Ndi hone vha tshi humbula zwe a zwi amba,
9 vha ṱuwa henefho vhiḓani vha vhiga zwenezwo zwithu zwoṱhe kha vha fumi-nthihi (11) na vhaṅwe vhoṱhe.
10 Vhenevho vhafumakadzi ho vha hu Maria Magdalena, Yohana, na Maria mme a Yakobo. Na vhaṅwe vhafumakadzi vhe vha vha vhe navho vho vha vha tshi khou vhudza vhaapostola zwenezwo zwithu.
11 Naho zwo ralo, vhaapostola vha pfa zwe zwa vha zwi tshi khou ambiwa nga vhenevho vhafumakadzi zwi sa pfali, vha si tende.
12 [[Petro a takuwa a gidimela vhiḓani, a kotama a ṱolela, a vhona ho sala malabi fhedzi. A mbo ḓi ṱuwa, a tshi khou ḓivhudzisa nga zwe zwa bvelela.]]
13 Nga ḽeneḽo ḓuvha, ho vha hu na vhaṅwe vhanna vhavhili vhe vha vha vho fara lwendo lwa u ya muḓanani une wa pfi Emausi, we wa vha u khilomithara dzi fhiraho fumi-nthihi u bva Yerusalema,
14 nahone vho vha vha tshi khou amba nga tshavho nga zwithu zwe zwa itea.
15 Musi vha tshi khou amba na u haseledza, Yesu a sendela a thoma u tshimbila navho,
16 fhedzi a vho ngo mu ḓivha.
17 A amba navho a ri: “Ndi mafhungo afhio ane na khou tshimbila ni tshi khou hanedzana ngao?” Vha ima vho ṱungufhala.
18 Kleopa a mu fhindula a ri: “Naa ni tou vha mutsinda ane a si ḓivhe zwe zwa itea maḓuvhani o fhiraho ngei Yerusalema?”
19 A amba nae a ri: “Ndi zwithu zwifhio?” Vha mu fhindula vha ri: “Ndi mafhungo a malugana na Yesu wa Munazareta, we a vha e muporofita a re na maanḓa kha zwine a zwi shuma na u zwi amba phanḓa ha Mudzimu na vhathu vhoṱhe,
20 na nḓila ye vhotshifhe vhashu vhahulu na vharangaphanḓa vhashu vha mu haṱulela ngayo lufu nahone vha mu ombela.
21 Fhedzi ro vha ro fulufhela uri o vha e ene muthu we a vha a tshi fanela u vhofholola Isiraele; nga nnḓa ha zwenezwo zwithu zwoṱhe, ho no ḓi vha ḓuvha ḽa vhuraru u bva tshee zwa itea.
22 Zwiṅwe hafhu, vhaṅwe vhafumakadzi vhane vha vha vhaṅwe nga riṋe vho ri mangadza, ngauri vho ya vhiḓani nga matsheloni-tsheloni
23 fhedzi vha si wane tshitumbu tshawe nahone vha amba uri vho vhona vharuṅwa, vhe vha amba uri u khou tshila.
24 Vhaṅwe nga riṋe vho ya vhiḓani, vha wana zwo tou ralo, zwi tshi nga zwe vhafumakadzi vha amba, ene vha si mu vhone.”
25 A amba navho a ri: “Inwi vhane ni si vhe na ṱhalukanyo, ni khou konḓelwa u tenda zwithu zwoṱhe zwo ambiwaho nga vhaporofita.
26 Naa zwo vha zwi songo fanela uri Kristo a tambudzwe nga u ralo a kone u dzhena vhugalani hawe?”
27 A thoma u vha ṱalutshedza zwithu zwoṱhe zwi re Maṅwaloni zwi ambaho nga hae, u thoma nga maṅwalwa a Mushe na a Vhaporofita vhoṱhe.
28 Vha tshi swika tsini na muḓanani we vha vha vha tshi khou ya khawo, a ita u nga u kha ḓi fhirela phanḓa.
29 Fhedzi vha mu kombetshedza uri a songo fhirela phanḓa, vha ri: “Dzula na riṋe ngauri ḓuvha ḽo no kovhela.” Musi a tshi pfa zwenezwo, a dzhena a dzula navho.
30 Musi a tshi khou ḽa zwiḽiwa navho, a dzhia tshinkwa, a tshi fhaṱutshedza, a tshi ṅwatekanya, a vha ṋea tshone.
31 Zwa tou nga maṱo avho o bonyolowa, vha kona u zwi ṱhogomela uri ndi ene, nahone a mbo ḓi ngalangala vha si tsha mu vhona.
32 Vha amba nga tshavho vha ri: “Naa mbilu dzashu dzo vha dzi sa khou swa musi a tshi khou amba na riṋe nḓilani, musi a tshi khou ri ṱalutshedza Maṅwalo?”
33 Nga tshenetsho tshifhinga vha takuwa vha ya Yerusalema, vha wana vhaapostola vha fumi-nthihi (11) na vhe vha vha vho kuvhangana navho,
34 vha ri: “Na ngoho, Murena o vuswa, o vhonwa nga Simoni!”
35 Nga zwenezwo, vha ṱalutshedza zwe zwa bvelela nḓilani na uri vho mu ḓivha musi a tshi ṅwatekanya tshinkwa.
36 Musi vha tshi khou amba zwenezwo zwithu, a ima vhukati havho [[a amba navho a ri: “Mulalo nga u vhe na inwi.”]]
37 Fhedzi vha ofha, vha tshi humbula uri vha khou vhona tshivhumbwa tsha muya.
38 Ngauralo, a amba navho a ri: “Ni khou ofha mini, ndi ngani ni tshi khou timatima?
39 Vhonani zwanḓa zwanga na milenzhe yanga, uri ni vhone uri ndi nṋe; phuphuledzani ni pfe, ngauri tshivhumbwa tsha muya a tshi na ṋama na marambo samusi ni tshi khou zwi vhona uri nṋe ndi nazwo.”
40 [[Musi a tshi khou amba zwenezwo, a vha sumbedza zwanḓa zwawe na milenzhe.]]
41 Musi vha sa khou tenda nga nṱhani ha dakalo na nga u mangala, a amba navho a ri: “Naa ni na zwiḽiwa?”
42 Vha mu ṋea khovhe yo gotshiwaho,
43 a i dzhia a iḽa vho mu sedza.
44 A amba navho a ri: “Zwenezwi ndi zwe nda ni vhudza musi ndi tshi kha ḓi vha na inwi uri zwithu zwoṱhe zwo ṅwalwaho nga ha nṋe kha Mulayo wa Mushe na kha maṅwalwa a Vhaporofita na kha Dzipsalme zwi tea u ḓadzea.”
45 A ita uri vha kone u pfesesa nga vhuḓalo zwine Maṅwalo a amba zwone,
46 a amba navho a ri: “Ndi zwone zwe ha ṅwalwa u pfi Kristo u ḓo tambudzwa nahone u ḓo vuswa vhafuni nga ḓuvha ḽa vhuraru,
47 kha tshaka dzoṱhe hu ḓo ḓivhadzwa u rembuluwa na u hangwelwa dzinani ḽawe—u thoma Yerusalema.
48 Inwi ni ḓo vha ṱhanzi dza enea mafhungo.
49 Ndi khou ni rumela zwe Khotsi anga a fulufhedzisa. Fhedzi inwi dzulani muḓini u vhuya u swika ni tshi ṋewa maanḓa a bvaho ṱaḓulu.”
50 Fhedzi a vha ranga phanḓa u swika Bethania, nahone a vha fhaṱutshedza.
51 Musi a tshi khou vha fhaṱutshedza a ṱuwa vhukati havho nahone a takulelwa ṱaḓulu.
52 Vha mu losha nahone vha humela Yerusalema vho takala zwihulu.
53 Vho vha vha tshi dzula vhe thembeleni vha tshi khou renda Mudzimu.
