Luka 3:1-38
3 Nga ṅwaha wa vhufumi-ṱhanu (15) hu tshi vhusa Kesare* Tiberio, musi Pontio Pilato e muvhusi wa Yudea, Herode e muvhusi wa tshiṱiriki wa Galilea, fhedzi Filipo mukomana wawe e muvhusi wa tshiṱiriki shangoni ḽa Iturea na Traxoniti, nahone Lisania e muvhusi wa tshiṱiriki tsha Abilene
2 misini ya Tshifhe Muhulu Anasi na Kayafa, fhungo ḽa Mudzimu ḽa ḓela Yohane murwa wa Sakaria e sogani.
3 O ya mashangoni oṱhe u mona na Yorodane, a tshi huwelela uri vhathu vha lovhedzwe sa tshiga tsha u rembuluwa uri vha hangwelwe zwivhi,
4 samusi zwo ṅwalwa buguni ya muporofita Yesaya musi a tshi ri: “Thetshelesani! Hu na muthu ane a khou vhidzelela e sogani, u ri: ‘Lugisani nḓila ya Yehova, kunakisani nḓila dzawe.
5 Miedzi yoṱhe i ḓo ḓadzwa, nahone thavha dzoṱhe na zwikwara zwi ḓo phusulwa, na nḓila dzoṱhe dzo kombamaho dzi ḓo kombamululwa, fhethu hu si havhuḓi hu ḓo vha havhuḓi,
6 nahone vhathu vhoṱhe vha ḓo vhona u tshidzwa ha Mudzimu.’”
7 Nga zwenezwo, a thoma u amba na gogo ḽe ḽa vha ḽi tshi khou ḓa khae uri ḽi lovhedzwe a ri: “Inwi vhana vha mavuluvulu, ndi nnyi o ni vhudzaho uri ni ḓo ponyoka vhuhali vhune ha khou ḓa?
8 Ngauralo, aṋwani mitshelo yo fanelaho u rembuluwa. Nahone ni songo amba uri, ‘Khotsi ashu ndi Abrahamu.’ Ngauri ndi a ni vhudza ndi ri Mudzimu u na maanḓa a u vusela Abrahamu vhana kha haya matombo.
9 Ndi ngoho uri mbaḓo yo no ḓi vhewa tsindeni ḽa muri. Ngauralo, muri muṅwe na muṅwe u sa aṋwiho mitshelo yavhuḓi u ḓo remiwa wa kudzwa muliloni.”
10 Gogo ḽa mu vhudzisa ḽa ri: “Nga zwenezwo, ri ite mini?”
11 Musi a tshi vha fhindula o vha a tshi ri: “Muthu a re na zwiambaro zwivhili kha kovhele a si na, na a re na zwiḽiwa a ite zwi fanaho.”
12 Na vhathelisi vha ḓa khae uri vha lovhedzwe, nahone vha amba nae vha ri: “Mufunzi, ri fanela uri ri ite mini?”
13 A amba navho a ri: “Ni songo ṱoḓa muthelo une wa fhira we na tendelwa wone nga mulayo.”
14 Vhadzia-mmbi na vhone vha mu vhudzisa vha ri: “Ri ite mini?” A vha fhindula a ri: “Ni songo ṱangula muthu kana u pomoka muthu mazwifhi, fhedzi ni fushee nga zwine na zwi wana.”
15 Samusi vhathu vho vha vho lindela Kristo, vhoṱhe vho vha vha tshi khou elekanya nga ha Yohane mbiluni dzavho vha tshi ri, “Kani a nga vha e ene Kristo?”
16 Yohane a fhindula vhoṱhe a ri: “Nṋe ndi ni lovhedza maḓini, fhedzi a mphiraho nga maanḓa u khou ḓa, ane ndi si fanelee uri ndi vhofholole thambo dza thovho dzawe. Onoyo u ḓo ni lovhedza nga muya mukhethwa na nga mulilo.
17 O fara luselo lwawe uri a kunakise tshoṱhe luvhata lwawe, goroi yawe a i kuvhanganyela ḓuluni ḽawe, fhedzi mungu u ḓo u fhisa nga mulilo u sa dzimi.”
18 Nga zwenezwo, Yohane a dovha a ṋea nyeletshedzo nnzhi na u bvela phanḓa a tshi ḓivhadza mafhungo maḓifha kha vhathu.
19 Fhedzi Herode muvhusi wa tshiṱiriki nge a kaidzwa malugana na Herodia mufumakadzi wa mukomana wawe, na nga mishumo yoṱhe mivhi ye a vha a tshi i ita,
20 a tou ṋaṋisa zwenezwo nga u valela Yohane dzhele.
21 Musi vhathu vha tshi lovhedzwa, na Yesu a lovhedzwa-vho. Nahone musi a tshi khou rabela, ḽiṱaḓulu ḽa vulea,
22 nahone muya mukhethwa wa tsela khae u tshi nga ḽiivha, ha pfala ipfi ḽi bvaho ṱaḓulu ḽi tshi ri: “U Murwa wanga, ane nda mu funa; ndi a u takalela.”
23 Zwiṅwe hafhu, musi Yesu a tshi thoma u funza o vha e na miṅwaha i ṱoḓaho u vha furaru (30), vhaṅwe vho vha vha tshi ri ndi murwawa Yosefa,murwa wa Eli,
24 murwa wa Mathathe,murwa wa Levi,murwa wa Melki,murwa wa Yanna,murwa wa Yosefa,
25 murwa wa Mahathe,murwa wa Amosi,murwa wa Nahume,murwa wa Esli,murwa wa Nangai,
26 murwa wa Maathi,murwa wa Mahathe,murwa wa Simei,murwa wa Yoseke,murwa wa Yoda,
27 murwa wa Yohanani,murwa wa Resa,murwa wa Serubabele,murwa wa Sealathiele,murwa wa Neri,
28 murwa wa Melki,murwa wa Adi,murwa wa Kosama,murwa wa Elmadama,murwa wa Heri,
29 murwa wa Yesu,murwa wa Eliezere,murwa wa Yorima,murwa wa Mathathe,murwa wa Levi,
30 murwa wa Simioni,murwa wa Yudasi,murwa wa Yosefa,murwa wa Yonamu,murwa wa Eliakima,
31 murwa wa Melea,murwa wa Mainane,murwa wa Mathathane,murwa wa Nathani,murwa wa Davida,
32 murwa wa Isai,murwa wa Obede,murwa wa Boasi,murwa wa Salmoni,murwa wa Nahasoni,
33 murwa wa Abinadaba,murwa wa Arini,murwa wa Esiromo,murwa wa Perese,murwa wa Yuda,
34 murwa wa Yakobo,murwa wa Isaka,murwa wa Abrahamu,murwa wa Thara,murwa wa Nahoro,
35 murwa wa Saruga,murwa wa Ragahu,murwa wa Phelege,murwa wa Ebere,murwa wa Sala,
36 murwa wa Kenani,murwa wa Arapahasada,murwa wa Semu,murwa wa Noaxe,murwa wa Lamexe,
37 murwa wa Methusala,murwa wa Henoxe,murwa wa Yarede,murwa wa Mahalalele,murwa wa Kenani,
38 murwa wa Enosi,murwa wa Sethe,murwa wa Adamu,
murwa wa Mudzimu.
Ṱhaluso dzi re magumoni a siaṱari
^ Khosi.
