Luka 4:1-44
4 Nga zwenezwo, Yesu a ṱuwa Yorodane o ḓadzwa nga muya mukhethwa, wa mu livhisa sogani
2 a fhedza maḓuvha a fuiṋa (40) a tshi khou lingwa nga Diabolo a sa ḽi tshithu. Nga zwenezwo, musi eneo maḓuvha a tshi fhela o vha o no farwa nga nḓala.
3 Ndi hone Diabolo a tshi amba nae a ri: “Arali u murwa wa Mudzimu, amba na heḽi tombo ḽi shanduke ḽi vhe tshinkwa.”
4 Fhedzi Yesu a mu fhindula a ri: “Ho ṅwalwa u pfi: ‘Muthu ha tshili nga tshinkwa fhedzi.’”
5 Ndi hone Diabolo a tshi isa Yesu nṱha ha thavha ndapfu nahone nga khathihi fhedzi a mu sumbedza mivhuso yoṱhe ya ḽifhasi.
6 Diabolo a amba nae a ri: “Ndi ḓo u ṋea enea maanḓa kha yeneyi mivhuso yoṱhe na vhugala hayo ngauri zwo ṋewa nṋe, nahone ndi ṋea ane nda funa.
7 Nga zwenezwo, arali wa nthabela, zwoṱhe zwi ḓo vha zwau.”
8 Yesu a mu fhindula a ri: “Ho ṅwalwa u pfi: ‘U tea u rabela Yehova Mudzimu wau, ngauri ndi ene e eṱhe ane wa tea u mu itela tshumelo khethwa.’”
9 A mu isa Yerusalema nahone a mu imisa kha ṱhanga ya thembele a amba nae a ri: “Arali u murwa wa Mudzimu, ḓipose fhasi,
10 ngauri ho ṅwalwa u pfi: ‘U ḓo vhudza vharuṅwa vhawe uri vha ḓe vha u tsireledze,
11 nahone vha u takule nga zwanḓa zwavho, uri u si khukhulwe nga tombo.’”
12 Yesu a mu fhindula a ri: “Ho ṅwalwa u pfi: ‘U songo linga Yehova Mudzimu wau.’”
13 Musi Diabolo o no fhedza u mu linga, a mu ṱutshela u swikela nga tshiṅwe tshifhinga tsho teaho.
14 Yesu a vhuyelela Galilea e na muya wa Mudzimu. Vhathu vho vha vha tshi khou amba mafhungo avhuḓi nga hae u mona na shango ḽeneḽo.
15 A thoma u funza sinagogoni dzavho nahone o vha a tshi huliswa nga vhoṱhe.
16 A swika Nazareta, he a alutshela hone, a dzhena sinagogoni nga Sabatha samusi o vha o ḓowela u ita nga u ralo, a ima nahone a thoma u vhala.
17 Ngauralo, vha mu ṋekedza mupombo wa muporofita Yesaya, nahone a u vula a wana he ha vha ho ṅwalwa u pfi:
18 “Muya wa Yehova u kha nṋe, ngauri o nḓodza uri ndi ḓivhadze vhashai mafhungo maḓifha, o nthuma uri ndi ye ndi huwelele uri mathubwa o vhofhololwa na uri vho pofulaho vha vho vhona, na u vhofholola vho tsikeledzeaho,
19 u itela u huwelela nga ha tshifhinga tsha Yehova tshi ṱanganedzeaho.”
20 Nga zwenezwo, a peta mupombo, a u ṋekedza muḓinḓa a dzula fhasi, nahone vhoṱhe vhe vha vha vhe sinagogoni vho vha vho mu lavhelesa.
21 A amba navho a ri: “Ṋamusi luṅwalo lune na kha ḓi tou bva u lu pfa lwo ḓadzea.”
22 Nahone vhoṱhe vha thoma u amba zwavhuḓi nga hae na u mangala maipfi a vhulenda e a vha a tshi bva mulomoni wawe, vha ri: “Naa uyu a si murwa wa Yosefa?”
23 Nga zwenezwo, a amba navho a ri: “A zwi timatimisi uri ni ḓo mmbudza nga ha tshifanyiso hetshi: ‘Ṅanga* ḓialafhe; zwithu zwe ra pfa uri wo zwi ita Kapernaume, zwi ite na fhano muḓini wa hau.’”
24 Fhedzi a amba navho a ri: “Ngoho ndi a ni vhudza ndi ri, a hu na muporofita ane a ṱanganedzwa muḓini wa hawe.
25 Sa tsumbo, ngoho ndi a ni vhudza ndi ri: Ho vha hu na tshilikadzi nnzhi ngei Isiraele misini ya Elia musi maṱaḓulu o valea miṅwaha miraru na miṅwedzi ya rathi, nahone ha vha na nḓala khulu shangoni ḽoṱhe.
26 Naho zwo ralo, Elia o vha a songo rumiwa na kha muthihi wa havho vhafumakadzi, fhedzi o vha o rumiwa kha tshilikadzi ya ngei Sarepata shangoni ḽa Sidoni.
27 Zwiṅwe hafhu, ho vha hu na vha mapele vhanzhi ngei Isiraele tshifhingani tsha muporofita Elisa; nahone a hu na na muthihi khavho we a fhodzwa, fhedzi ho fhodzwa Naemani, munna wa Siria.”
28 Vhoṱhe vhe vha pfa zwenezwo zwithu ngei sinagogoni vha sinyuwa zwihulu,
29 vha mu vutshela vha mu sukumedzela nnḓa ha muḓi, vha mu isa luwani lwa thavha ye muḓi wavho wa vha wo fhaṱwa khayo, vha tshi ṱoḓa u mu posa nga ṱhoho.
30 Fhedzi a bva nga vhukati havho a ṱuwa.
31 A ya Kapernaume, muḓini wa Galilea. Nahone o vha a tshi khou vha funza nga Sabatha,
32 nahone vho vha vha tshi mangadzwa nga nḓila ye a vha a tshi funza ngayo ngauri o vha a tshi funza sa muthu ane a vha na maanḓa.
33 Nga zwenezwo, henefho sinagogoni ho vha hu na munna we a vha e na muya muvhi wa dimoni, a zhamba a ri:
34 “Wo ḓela mini iwe Yesu wa Nazareta? Naa wo ḓela u ri lozwa? Ndi a ḓivha zwavhuḓi uri u Mukhethwa wa Mudzimu.”
35 Fhedzi Yesu a u kaidza a ri: “Fhumula u bve khae.” Musi dimoni ḽo no mu wisela fhasi, ḽa bva khae ḽi songo mu huvhadza.
36 Vhathu vhoṱhe vha kanuka, nahone vha thoma u amba nga tshavho, vha ri: “Ndi zwithu-ḓe zwine a zwi amba, ngauri u na maanḓa a u pandela mimuya mivhi, nahone ya bva?”
37 Ngauralo, mafhungo awe a phaḓalala u mona na ḽeneḽo shango ḽoṱhe.
38 A tshi ṱuwa henefho sinagogoni a mbo ḓi ya muḓini wa Simoni. Mme a mufumakadzi wa Simoni o vha a tshi khou lwala zwihulu,* nahone vhafunziwa vha humbela Yesu uri a mu thuse.
39 A ima tsini nae nahone a mu fhodza. A mbo ḓi vuwa nga u ṱavhanya a thoma u vha shumela.
40 Fhedzi musi ḓuvha ḽi tshi khou kovhela, vhoṱhe vhe vha vha vhe na vhathu vha lwalaho malwadze o fhamba-fhambanaho vha vha ḓisa khae. O vha a tshi vha fhodza nga u tou vha vhea zwanḓa.
41 Madimoni o vha a tshi bva kha vhathu vhanzhi, a tshi zhamba a tshi ri: “U Murwa wa Mudzimu.” Fhedzi a a kaidza nahone a si a tendele a tshi amba, ngauri o vha a tshi mu ḓivha uri ndi Kristo.
42 Naho zwo ralo, nga ḓuvha ḽi tevhelaho a ya fhethu hu re thungo. Fhedzi gogo ḽa thoma u mu ṱoḓa, ḽa vhuya ḽa swika he a vha e hone, nahone ḽa lingedza u mu thivhela uri a si ṱuwe.
43 A amba naḽo a ri: “Ndi fanela uri ndi ye na kha miṅwe miḓi u itela uri ndi ḓivhadze mafhungo maḓifha a Muvhuso wa Mudzimu, ngauri ndo rumiwa u ita zwenezwo.”
44 Nga zwenezwo, a ya a huwelela sinagogoni dza Yudea.
