Luka 5:1-39
5 Musi gogo ḽo thetshelesa Yesu a tshi khou funza ipfi ḽa Mudzimu, tsini na dzivha ḽa Genetsareta, ḽa thoma u mu pwanyeledza.
2 A vhona zwikepe zwivhili zwo ima khunzi-khunzini ya dzivha, fhedzi vharei vha khovhe vho vha vho tsa khazwo vha tshi khou ṱanzwa mambule avho.
3 A ṋamela tshiṅwe tsha zwenezwo zwikepe, nahone a humbela Simoni, we a vha e muṋe wa tshikepe uri a tshi sendedzele kule ha khunzi-khunzi. A dzula henefho tshikepeni a thoma u funza gogo.
4 Musi o no fhedza u funza, a amba na Simoni a ri: “Sendedza tshikepe hu re na tivha, ni ṱharamudze mambule aṋu uri ni kone u fasha.”
5 Fhedzi Simoni a fhindula a ri: “Mufunzi, ro ḓinetisa vhusiku hoṱhe nahone ri si fashe tshithu, fhedzi samusi wo amba, ri ḓo ṱharamudza mambule.”
6 Musi vho no ita nga u ralo, vha fasha khovhe nnzhi vhukuma. Mambule avho a thoma u kheruwa.
7 Ngauralo, vha vhidza vhashumisani navho vhe vha vha vhe kha tshiṅwe tshikepe uri vha ḓe vha vha thuse, musi vha tshi swika, vha ḓadza zwikepe zwavho, nahone zwa thoma u nupela.
8 Simoni Petro a tshi vhona zwenezwi, a gwadama phanḓa ha Yesu a ri: “Murena, a tho ngo fanelea u vha tsini hau, ngauri ndi muitazwivhi.”
9 Ngauri ene na vhoṱhe vhe a vha e navho vho vha vho mangadzwa zwihulu nga khovhe dze vha dzi fasha,
10 nahone zwa dovha zwa mangadza Yakobo na Yohane vharwa vha Sebedeo, vhe vha vha vha tshi shumisana na Simoni. Fhedzi Yesu a amba na Simoni a ri: “U songo ofha. U bva zwino u ḓo vha murei wa vhathu.”
11 Nga zwenezwo, vha humisela zwikepe khunzi-khunzini, vha ṱutshela zwithu zwoṱhe vha mu tevhela.
12 Nga tshiṅwe tshifhinga musi e kha muṅwe muḓi, ha ḓa muṅwe munna we a vha o ḓala mapele! Musi a tshi vhona Yesu, a gwadama a mu humbela a ri: “Murena, arali u tshi funa, u nga mphodza.”
13 A isa tshanḓa tshawe a mu kwama, a ri: “Ndi a funa. Fhola.” Mapele a mbo ḓi mu ṱutshela nga u ṱavhanya.
14 A laya onoyo munna uri a songo vhudza muthu, a ri: “Fhedzi tshimbila u ye kha tshifhe a u vhone, nahone u ṋekedze tshifhiwa malugana na u fhodzwa hau, samusi Mushe o laedza, uri zwi vhe vhuṱanzi khavho.”
15 Fhedzi bvumo ḽa Yesu ḽa phaḓalala, nahone gogo ḽo vha ḽi tshi ḓa u itela u mu thetshelesa na uri ḽi fhodzwe malwadze aḽo.
16 Naho zwo ralo, a ya fhethu hu re thungo uri a rabele.
17 Ḽiṅwe ḓuvha musi a tshi khou funza, nahone Vhafarisei na vhagudisi vha Mulayo vha bvaho miḓini yoṱhe ya Galilea, Yudea, na Yerusalema vho dzula henefho, Yehova o mu ṋea maanḓa a u fhodza.
18 Ha ḓa vhanna vho hwala munna o omaho lurumbu o lala kha vhulalo, vha tshi ṱoḓa nḓila ya u mu ḓisa phanḓa ha Yesu.
19 Nge vha vha vha sa koni u mu isa he Yesu a vha e hone nga nṱhani ha gogo, vha ṋamela kha ṱhanga, vha i fuḓulula vha tsitsa vhulalo hawe, vha vhu vhea tsini ha vhathu vhe vha vha vhe phanḓa ha Yesu.
20 Musi a tshi vhona lutendo lwavho, a ri: “Wo hangwelwa zwivhi zwau.”
21 Nga zwenezwo, vhamaṅwalo na Vhafarisei vha thoma u elekanya vha ri: “Ndi nnyi ane a khou semana? Ndi nnyi ane a nga kona u hangwela zwivhi arali e si Mudzimu e eṱhe?”
22 Nge Yesu a vha a tshi ḓivha zwe vha vha vha tshi khou zwi elekanya, a vha fhindula a ri: “Ni khou elekanya mini mbiluni dzaṋu?
23 Ndi zwifhio zwine zwa leluwa? Naa ndi uri, ‘Wo hangwelwa zwivhi zwau,’ kana ndi uri, ‘Takuwa u tshimbile’?
24 Fhedzi uri ni ḓivhe uri Murwa-muthu u na maanḓa kha ḽifhasi a u hangwela zwivhi—” a amba na munna o omaho lurumbu a ri: “Takuwa u hwale vhulalo hau, u ye hayani.”
25 Nga u ṱavhanya a takuwa phanḓa havho, a hwala vhulalo, a ya hayani, a tshi khou renda Mudzimu.
26 Ngauralo, vhathu vhoṱhe vha kanuka zwihulu, vha thoma u renda Mudzimu, vha dzhenwa nga nyofho vha ri: “Ṋamusi ro vhona zwithu zwi kanukisaho.”
27 Nga murahu ha zwenezwo zwiitea, a ṱuwa, a vhona muthelisi ane a pfi Levi o dzula ofisini ya vhathelisi, a amba nae a ri: “Ivha mutevheli wanga.”
28 A sia zwithu zwoṱhe, a mbo ḓi takuwa a mu tevhela.
29 Nga zwenezwo, Levi a itela Yesu tshimima tshihulu nḓuni yawe, ho vha hu na vhathelisi vhanzhi na vhaṅwe vhe vha vha vho dzula navho zwiḽiwani.
30 Vhafarisei na vhamaṅwalo vhavho vha tshi vhona zwenezwo, vha thoma u gungulela vhafunziwa vhawe vha ri: “Ndi ngani ni tshi ḽa na u nwa na vhathelisi na vhaitazwivhi?”
31 Yesu a vha fhindula a ri: “Vhathu vha re na mutakalo wavhuḓi a vha ṱoḓi ṅanga,* fhedzi i ṱoḓwa nga vha lwalaho.
32 Ngauri a tho ngo ḓela u vhidza vhathu vho lugaho, fhedzi ndo ḓela vhaitazwivhi uri vha rembuluwe.”
33 Vha amba nae vha ri: “Vhafunziwa vha Yohane vha a ḓidzima zwiḽiwa tshifhinga tshoṱhe na u rabela, na vhafunziwa vha Vhafarisei vha ita nga u ralo, fhedzi vhau vha a ḽa na u nwa.”
34 Yesu a amba navho a ri: “Naa ni nga ita uri khonani dza mukwasha dzi ḓidzime zwiḽiwa musi mukwasha a tshi kha ḓi vha nadzo?
35 Fhedzi hu ḓa maḓuvha ane mukwasha a ḓo dzhiiwa khavho; nga zwenezwo, ndi hone vha tshi ḓo ḓidzima nga eneo maḓuvha.”
36 Zwiṅwe hafhu, a vha vhudza tshifanyiso a ri: “A hu na ane a nga kherula labi kha tshiambaro tshiswa tsha nga nnḓa nahone a tshi rungelela kha tshiambaro tsha nga nnḓa tsha kale. Arali a ita nga u ralo, tshihaswa tshiswa tshi ḓo kheruwa nahone tshi nga si fane na tshiambaro tsha kale.
37 A dovha a ri: A hu na muthu ane a nga shela waini ntswa kha mikhwama ya kale ya u shela waini.* Arali a ita nga u ralo, waini ntswa i ḓo ita uri mikhwama i balee nahone i ḓo tevhuwa, mikhwama ya tshinyala.
38 Fhedzi waini ntswa i fanela u shelwa kha mikhwama miswa ya u shela waini.
39 A hu na we a vhuya a nwa waini ya kale nahone a ṱoḓa ntswa, ngauri u ri, ‘Ya kale i a ḓifha.’”
