Luka 6:1-49
6 Nga Sabatha musi a tshi khou fhira nga masimuni a goroi, vhafunziwa vhawe vha ṱhukhula ṱhotshe dza goroi, vha dzi swoṱa nga zwanḓa vha dzi ḽa.
2 Nga zwenezwo, vhaṅwe Vhafarisei vha ri: “Ndi ngani ni tshi ita zwithu zwi songo tendelwaho nga Sabatha?”
3 Fhedzi Yesu a amba navho a ri: “Naa a ni athu vhala zwe Davida na vhanna vhe a vha e navho vha zwi ita musi vho farwa nga nḓala?
4 Musi a tshi dzhena nḓuni ya Mudzimu a dzhia zwinkwa zwo ṋekedzwaho Mudzimu a ḽa, zwiṅwe a zwi ṋea vhanna vhe a vha e navho. Vho vha vha songo tendelwa uri vha zwi ḽe, fhedzi zwo vha zwi tshi tea u ḽiwa nga vhotshifhe vhe vhoṱhe.”
5 A amba navho a ri: “Murwa-muthu ndi ene Murena wa Sabatha.”
6 Nga tshiṅwe tshifhinga nga Sabatha, a dzhena sinagogoni a thoma u funza. Henefho ho vha hu na muṅwe munna we a vha o oma tshanḓa tsha u ḽa.
7 Vhamaṅwalo na Vhafarisei vha mu vhea iṱo u itela u vhona arali o vha a tshi ḓo fhodza onoyu munna nga Sabatha, uri vha mu vhone mulandu.
8 Naho zwo ralo, o vha a tshi ḓivha zwe vha vha vha tshi khou zwi elekanya, ngauralo a amba na munna o omaho tshanḓa a ri: “Takuwa u ḓe ngeno vhukati.” A mbo ḓi takuwa a ima.
9 Nga zwenezwo, Yesu a vha vhudzisa a ri: “Naa zwo tendelwa uri nga Sabatha muthu a ite mishumo yavhuḓi kana i si yavhuḓi, a tshidze kana a vhulahe?”
10 Musi o no vha lavhelesa vhoṱhe, a amba na onoyo munna a ri: “Onyolosa tshanḓa tshau.” A tshi onyolosa, nahone tsha fhola.
11 Fhedzi vha sinyuwa zwihulu, vha thoma u amba nga tshavho nga ha zwine vha nga zwi ita kha Yesu.
12 Nga tshenetsho tshifhinga, a ya u rabela thavhani, a fhedza vhusiku hoṱhe a tshi khou rabela Mudzimu.
13 Fhedzi musi ḽi tshi tsha, a vhidza vhafunziwa vhawe a nanga vha fumi-mbili (12) vhukati havho, a vha vhidza uri ndi vhaapostola:
14 Ho vha hu Simoni we a vha a tshi mu vhidza Petro; Andrea, murathu wawe; Yakobo; Yohane; Filipo; Baratholomeo;
15 Mateo; Thomasi; Yakobo murwa Alifeo; Simoni ane a vhidzwa a fhiseaho;
16 Yudasi murwa wa Yakobo; na Yudasi Iskariote, we a mu fheṱa.
17 A tsa navho a ima fhethu ho itaho mudavhi, henefho ho vha hu na vhafunziwa vhawe vhanzhi, na gogo ḽi bvaho Yudea na Yerusalema, vhaṅwe vha tshi bva thungo dza Tiro na Sidoni tsini na lwanzhe, vho ḓa u mu thetshelesa na u fhodzwa malwadze avho.
18 O fhodza na vhe vha vha vha tshi khou tambudzwa nga mimuya mivhi.
19 Hone gogo ḽo vha ḽi tshi ṱoḓa u mu kwama, ngauri maanḓa o vha a tshi bva khae nahone a tshi fhodza vhoṱhe.
20 A lavhelesa vhafunziwa vhawe a ri:
“Hu takala inwi ni shayaho, ngauri Muvhuso wa Mudzimu ndi waṋu.
21 “Hu takala inwi vhane na vha na nḓala zwino, ngauri ni ḓo fushwa.
“Hu takala inwi ni lilaho zwino, ngauri ni ḓo sea.
22 “Ni takale musi vhathu vha tshi ni vhenga, vha tshi ni pandela, na u ni sema, vha tshi ni nyadza nga nṱhani ha Murwa-muthu.
23 Nga ḽeneḽo ḓuvha ni takale nahone ni pembele, ngauri malamba aṋu ndi manzhi ngei ṱaḓulu, ngauri vhomakhulukuku wavho vho vha vha tshi ita zwithu zwi fanaho na zwenezwo kha vhaporofita.
24 “Fhedzi khombo kha inwi no pfumaho, ngauri no no ḓi wana madzanga oṱhe.
25 “Khombo inwi no furaho zwino, ngauri ni ḓo farwa nga nḓala.
“Khombo inwi ni seaho zwino, ngauri ni ḓo ṱungufhala na lila.
26 “Khombo musi vhathu vhoṱhe vha tshi ni khoḓa, ngauri na vhomakhulukuku wavho vho vha vha tshi ita zwithu zwi fanaho na zwenezwo kha vhaporofita vha mazwifhi.
27 “Fhedzi ndi a ni vhudza inwi no thetshelesaho ndi ri: Bvelani phanḓa ni tshi funa maswina aṋu, ni tshi itela zwivhuya vhane vha ni vhenga,
28 ni tshi fhaṱutshedza vha ni semaho, ni tshi rabelela vhane vha ni tambudza.
29 Arali muthu a tshi ni vhanda kha shama ni mu ṋekedze na ḽiṅwe, ane a ni dzhiela tshiṅwe tshiambaro ni mu fhe na tshiṅwe.
30 Ṋeani vhoṱhe vha ni humbelaho, ni songo vhila ane a dzhia tshithu tshaṋu.
31 “Zwiṅwe hafhu, zwine na ṱoḓa vhathu vha tshi ni ita, na inwi ni vha ite zwenezwo.
32 “Arali ni tshi funa vhane vha ni funa, ni ḓo vhuyelwa nga’ni? Ngauri na vhaitazwivhi vha a funa vhane vha vha funa.
33 Arali ni tshi itela zwivhuya vhane vha ni itela zwivhuya, ni ḓo vhuyelwa nga’ni? Ngauri na vhaitazwivhi vha ita zwenezwo.
34 Zwiṅwe hafhu, arali ni tshi hadzima vhane na ḓivha uri vha ḓo ni lifhela, ni ḓo vhuyelwa nga’ni? Na vhaitazwivhi vha hadzima vhaṅwe vhaitazwivhi uri vha vhuyelwe.
35 U fhambana na zwenezwo, bvelani phanḓa ni tshi funa maswina aṋu na u ita zwivhuya na u hadzima ni sa lavheleli nzwalelo nahone malamba aṋu a ḓo vha manzhi, ni ḓo vha vharwa vha Wa-Ṱaḓulu-ṱaḓulu, ngauri u na vhulenda kha vha sa livhuhi na vhavhi.
36 Bvelani phanḓa ni tshi khathutshela, vhunga Khotsi aṋu a tshi khathutshela.
37 “Zwiṅwe hafhu, litshani u haṱula uri na inwi ni sa ḓo haṱulwa-vho, nahone ni litshe u vhona muthu mulandu uri na inwi ni sa ḓo vhonwa mulandu. Dzulani ni tshi hangwela, na inwi ni ḓo hangwelwa.
38 Ḓiḓowedzeni u ṋea, nahone vhathu vha ḓo ni ṋea-vho. Vha ḓo ni shelela kha tshiambaro muelo wo ḓalaho, wo gadelwaho wo khusiwaho, wo itaho muṱumba. Ngauri muelo une na ela ngawo, na inwi vha ḓo ni elela ngawo.”
39 Nga zwenezwo, a vha vhudza tshifanyiso a ri: “Naa vhathu vhavhili vho pofulaho vha nga sumbedzana nḓila? Naa vhuvhili havho a vha nga ḓo wela dindini?
40 Mugudiswa ha fhiri mugudisi wawe, fhedzi muthu muṅwe na muṅwe o gudiswaho zwavhuḓi u ḓo fana na mugudisi wawe.
41 Ndi ngani u tshi sedza lufhanza lu re ḽiṱoni ḽa wahau ngeno iwe u sa vhoni danda ḽi re ḽiṱoni ḽau?
42 U nga amba hani na wahau wa ri, ‘Litsha ndi ṱomole lufhanza ḽiṱoni ḽau,’ ngeno iwe u na danda ḽiṱoni ḽau? Mudzia-muhoyo ndi’we! Thoma u bvise danda ḽi re ḽiṱoni ḽau, ndi hone u tshi ḓo kona u vhona zwavhuḓi musi u tshi bvisa lufhanza lu re ḽiṱoni ḽa wahau.
43 “Ngauri a hu na muri wavhuḓi une wa aṋwa mitshelo i si yavhuḓi, nahone a hu na muri u si wavhuḓi une wa aṋwa mitshelo yavhuḓi.
44 Muri muṅwe na muṅwe wavhuḓi u ḓivhiwa nga mitshelo yawo. Sa tsumbo, vhathu a vha fuli mahuyu kha miri ya mipfa, kana u fula nḓirivhe kha miri ya mipfa.
45 Muthu muvhuya u bvisa zwithu zwavhuḓi kha lupfumo lwawe lwavhuḓi lu re mbiluni yawe, fhedzi muthu muvhi u bvisa zwithu zwivhi kha lupfumo lwawe luvhi, ngauri zwo ḓalaho mbiluni ndi zwine mulomo wa amba zwone.
46 “Ndi ngani ni tshi mmbidza na ri Murena! Murena! fhedzi na si ite zwine nda amba?
47 Muṅwe na muṅwe a ḓaho kha nṋe a thetshelesa zwine nda zwi amba nahone a zwi ita, ndi ḓo ni sumbedza ane a fana nae:
48 U fana na muthu ane a ri a tshi fhaṱa nnḓu a bwa a adza mutheo wayo nṱha ha tombo. Musi hu tshi ḓa mukumbela, wa kuḓa yeneyo nnḓu, fhedzi u si kone u i dzinginyisa, ngauri yo vha yo fhaṱwa zwavhuḓi.
49 Kha ḽiṅwe sia, muthu ane a pfa nahone a sa ite tshithu u fana na muthu ane a fhaṱa nnḓu mavuni hu si na mutheo. Mukumbela wa kuḓa yeneyo nnḓu, nahone nga khathihi fhedzi ya wa, tshinyalelo ya yeneyo nnḓu ya vha khulu.”
