Luka 7:1-50
7 Musi o no fhedza u amba zwe a vha a tshi ṱoḓa u vha vhudza zwone, a dzhena Kapernaume.
2 Muṅwe mulangammbi o vha e na mulanda we a vha a tshi mu funa, we a vha a tshi khou lwala vhukuma, e tsini na u fa.
3 Musi a tshi pfa nga ha Yesu, a ruma vhahulwane vha Vhayuda uri vha ye vha mu humbele uri a ḓe a fhodze mulanda wawe.
4 Nga zwenezwo, vhe vha ḓa kha Yesu vha thoma u mu kwengweledza vha ri: “Zwo fanela u tshi mu itela zwenezwi,
5 ngauri u funa lushaka lwashu nahone o ri fhaṱela sinagogo.”
6 Ngauralo, Yesu a huma navho. Fhedzi musi e tsini na u dzhena muḓini wawe, mulangammbi o vha o no rumela khonani uri dzi mu vhudze uri: “Muṋe wanga, u songo tsha ḓidina, ngauri a thi fanelei uri ni nga dzhena nḓuni yanga.
7 Nga nṱhani ha zwenezwo, na nṋe a thi fanelei u ḓa ha iwe. Fhedzi amba ipfi ḽithihi fhedzi, nahone mulanda wanga u ḓo fhola.
8 Ngauri na nṋe ndi muthu a vhuswaho, ndi na maswole ane nda a vhusa, nahone ndi amba na uyu nda ri, ‘Ṱuwa!’ nahone a ṱuwa, nda amba na muṅwe nda ri, ‘Iḓa!’ a ḓa, nda amba na mulanda wanga nda ri, ‘Ita itshi!’ a ita.”
9 Musi Yesu a tshi pfa zwenezwo, a mangala nahone a rembuluwa a lavhelesa gogo ḽe ḽa vha ḽi tshi khou mu tevhela a ri: “Ndi a ni vhudza ndi ri: A thi athu wana muthu na muthihi kha ḽa Isiraele a re na lutendo lungafha.”
10 Hone vhaḽa vhe vha vha vho rumiwa, vha tshi humela hayani vha wana mulanda o fhola.
11 Nga murahu ha zwenezwo, a ya muḓini wa Naini, a tshi khou tshimbila na vhafunziwa vhawe na gogo.
12 Musi a tshi vho sendela tsini ha khoro ya muḓi a ṱangana na vhathu vho hwala tshitumbu tsha muṱhannga, we a vha e ene ṅwana e eṱhe kha mme awe. Nahone mme awe vho vha vhe tshilikadzi. Vhathu vhanzhi vha muḓini wonoyo vho vha vhe henefho.
13 Musi Murena a tshi mu vhona, a mu pfela vhuṱungu nahone a amba nae a ri: “Litsha u lila.”
14 A sendela a kwama hingo, nahone vhahwali vhaḽo vha ima. Ngauralo, Yesu a ri: “Muṱhannga, vuwa!”
15 Muṱhannga a vuwa a dzula a thoma u amba, a mu ṋea mme awe.
16 Vhoṱhe vha dzhenwa nga nyofho, vha thoma u renda Mudzimu vha ri: “Ro vuselwa muporofita muhulu,” na uri “Mudzimu o pfela vhathu vhawe vhuṱungu.”
17 Enea mafhungo a phaḓalala na ḽoṱhe ḽa Yudea na kha maṅwe mashango a tsini.
18 Vhafunziwa vha Yohane vha mu vhudza zwenezwi zwithu zwoṱhe.
19 Ngauralo, Yohane a ruma vhaṅwe vhafunziwa vhawe vhavhili uri vha ye vha vhudzise Murena uri: “Naa ndi iwe we ha pfi u ḓo ḓa, kana ri fanela u lavhelela muṅwe?”
20 Vhenevho vhanna musi vha tshi swika khae vha ri: “Yohane Mulovhedzi o ri ruma kha iwe uri ri vhudzise uri, ‘Naa ndi iwe we ha pfi u ḓo ḓa, kana ri fanela u lavhelela muṅwe?’”
21 Nga tshenetsho tshifhinga, Yesu o vha a tshi khou fhodza vhathu vhanzhi vha lwalaho, nahone a tshi khou pandela mimuya mivhi na u bonyolosa vhanzhi vho pofulaho.
22 Ngauralo, a fhindula vhenevho vhavhili a ri: “Tshimbilani, ni vhudze Yohane zwe na zwi vhona na zwe na zwi pfa: Vho pofulaho vha khou vhona, vho holefhalaho vha vho tshimbila, vha mapele vha khou fhodzwa, vho dzingaho nḓevhe vha vho pfa, vhafu vha khou vuswa, vha shayaho vha khou funzwa mafhungo maḓifha.
23 Hu takala ane a si khukhuliswe nga nṋe.”
24 Musi vhaḓinḓa vha Yohane vho no ṱuwa, a thoma u amba na gogo nga ha Yohane a ri: “No vha no ya sogani u vhona mini? Luṱanga lu vhudzulwaho nga muya?
25 No vha no ya u vhona mini? Naa no vha no ya u vhona muthu o ambaraho zwiambaro zwi ḓuraho? Vhane vha ambara zwiambaro zwavhuḓi vha pfamoni dza khosi.
26 Ndi ri no vha no ya u ita mini? No vha no ya u vhona muporofita? Ndi a ni vhudza, o vha e wa ndeme vhukuma u fhira na vhaporofita.
27 Ndi ene we ha ṅwalwa nga hae ha pfi: ‘Ndi ruma muḓinḓa wanga phanḓa hau, uri a u lugisele nḓila!’
28 Ndi a ni vhudza uri: Kha vho bebwaho nga vhafumakadzi, a hu athu vhuya ha vha na muthu a fhiraho Yohane, fhedzi a re muṱuku Muvhusoni wa Mudzimu u a mu fhira.”
29 (Vhathu vhoṱhe na vhathelisi, musi vha tshi pfa zwenezwo, vha amba uri Mudzimu o luga, ngauri vho vha vho lovhedzwa nga ndovhedzo ya Yohane.
30 Fhedzi Vhafarisei na vhaḓivhi vha Mulayo vho nyadza nyeletshedzo ya Mudzimu nge vha si lovhedzwe nga Yohane.)
31 “Uyu murafho ndi nga u vhambedza na mini, u fana na vhonnyi?
32 U fana na vhana vho dzulaho makete vhane vha vhidzelela vhane vha tamba navho vha ri, ‘Ro ni lidzela tshiṱiringo, fhedzi inwi na hana u tshina; ro lila, fhedzi inwi ni si lile.’
33 Nga hu fanaho, Yohane Mulovhedzi o ḓa a si ḽe tshinkwa na u nwa waini, fhedzi inwi na ri: ‘U na dimoni.’
34 Murwa-muthu o ḓa a ḽa na u nwa, fhedzi inwi na ri: ‘Vhonani! Muthu wa u ḽesa na wa u nwesa waini, khonani ya vhathelisi na vhaitazwivhi!’
35 Naho zwo ralo, vhuṱali vhu vhonala u luga nga vhana vhaho vhoṱhe.”*
36 Muṅwe wa Vhafarisei o vha a tshi dzulela u mu humbela uri a ḓe a ḽe nae. Nga zwenezwo, a ya nḓuni ya onoyo Mufarisei a ḽa nae zwiḽiwa.
37 Mufumakadzi we a vha a tshi ḓivhiwa henefho muḓini uri ndi muitazwivhi, a tshi pfa uri u khou ḽa zwiḽiwa nḓuni ya Mufarisei a ḓa na mudzio wa mapfura a nukhelelaho,
38 a ḓa a gwadama tsini na milenzhe ya Yesu, a lila nahone a thoma u ṋukadza milenzhe ya Yesu nga miṱodzi yawe, a i phumula nga mavhudzi a ṱhohoni yawe. A dovha a khisa na milenzhe yawe na u i ḓodza mapfura a nukhelelaho.
39 Mufarisei we a mu ramba a tshi vhona zwenezwi, a ambela mbiluni a ri: “Arali onoyu munna a vhe e muporofita, o vha a tshi ḓo ḓivha uri ndi mufumakadzi-ḓe ane a khou mu kwama, o vha a tshi ḓo ḓivha uri ndi muitazwivhi.”
40 Fhedzi Yesu a mu fhindula a ri: “Simoni, ndi khou ṱoḓa u amba na iwe.” A ri: “Mufunzi, amba!”
41 “Ho vha hu na vhaṅwe vhanna vhavhili vhe vha vha vha tshi koloda muṅwe muhadzimisi; muṅwe o vha a tshi mu koloda dinari dza maḓana maṱanu, fhedzi muṅwe a tshi khou koloda dza fuṱhaṋu (50).
42 Musi vha si na tsha u mu lifhela, a mbo ḓi vha hangwela vhoṱhe. Ngauralo, ndi ufhio kha avho vhavhili ane a ḓo funa muhadzimisi u fhira muṅwe?”
43 Simoni a fhindula a ri: “Ndi humbula u nga ndi uyo we a hangwelwa mulandu muhulwane.” A amba nae a ri: “Wo amba zwone.”
44 A tshi fhedza u amba zwenezwo a rembuluwa a lavhelesa onoyo mufumakadzi nahone a amba na Simoni a ri: “U khou mu vhona uyu mufumakadzi? Ndo dzhena muḓini wau; a wo ngo nṋea maḓi a u ṱamba milenzhe. Fhedzi hoyu mufumakadzi o ṋukadza milenzhe yanga nga miṱodzi yawe nahone a i phumula nga mavhudzi awe.
45 Iwe a wo ngo nkhisa; fhedzi hoyu mufumakadzi ho ngo litsha u khisa milenzhe yanga u bva tshee nda swika.
46 A wo ngo ḓodza ṱhoho yanga mapfura, fhedzi uyu mufumakadzi o ḓodza milenzhe yanga mapfura a nukhelelaho.
47 Nga nṱhani ha zwenezwo, ndi a u vhudza ndi ri, naho zwivhi zwawe zwi zwinzhi, o hangwelwa, ndi ngazwo e na lufuno luhulwane, fhedzi ane a hangwelwa zwiṱuku na lufuno lu vha luṱuku.”
48 Ngauralo, a amba nae a ri: “Wo hangwelwa zwivhi zwau.”
49 Vha tshi pfa zwenezwo, vhe a vha o dzula navho zwiḽiwani vha thoma u ambela mbiluni vha ri: “Uyu munna ndi nnyi ane a kona na u hangwela zwivhi?”
50 Fhedzi Yesu a amba na onoyo mufumakadzi a ri: “Lutendo lwau lwo u tshidza; ṱuwa nga mulalo.”
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “vhu vhonala nga zwine ha zwi bveledza.”
