Luka 9:1-62
9 Yesu a kuvhanganya vhafunziwa vhawe vha fumi-mbili (12) a vha ṋea maanḓa na uri vha kone u pandela madimoni oṱhe na u fhodza malwadze.
2 Nga zwenezwo, a vha ruma uri vha ye u huwelela nga ha Muvhuso wa Mudzimu na u fhodza,
3 a amba navho a ri: “Ni tshi fara lwendo ni songo ṱuwa na tshithu, ni songo ṱuwa na lubaḓa na mukhwama wa u fara zwiḽiwa, tshinkwa kana tshelede na zwiambaro zwo engedzeaho.
4 Muḓini muṅwe na muṅwe une na ḓo dzhena khawo, ni dzule henefho u swika ni tshi ṱuwa.
5 Huṅwe na huṅwe hune vhathu vha si ni ṱanganedze, musi ni tshi ṱuwa kha wonoyo muḓi ni fhufhure buse ḽi re milenzheni yaṋu uri zwi vhe vhuṱanzi khavho.”
6 Vha bva vha tshimbila fhethu hoṱhe vha tshi dzhena miḓanani, vha tshi khou huwelela mafhungo maḓifha na u fhodza.
7 Herode muvhusi wa tshiṱiriki, a pfa nga ha zwithu zwoṱhe zwe zwa vha zwi tshi khou itea, a hanganea zwihulu ngauri vhaṅwe vho vha vha tshi khou ri Yohane o vuswa vhafuni,
8 fhedzi vhaṅwe vho vha vha tshi ri Elia o vuwa, nahone vhaṅwe vha tshi ri ho vuwa muṅwe wa vhaporofita vha kale.
9 Herode a ri: “Yohane ndo mu tumula ṱhoho. Zwino ndi nnyi uyu ane nda pfa hu tshi ambiwa nga hae?” Nga zwenezwo, o vha a tshi ṱoḓa u mu vhona.
10 Musi vhaapostola vha tshi vhuya, vha mu vhudza zwoṱhe zwe vha zwi ita. A ṱuwa na vhaapostola fhedzi, a ya muḓini une wa pfi Betsaida.
11 Fhedzi gogo ḽa zwi ḓivha, ḽa mu tevhela. A ḽi ṱanganedza nga vhulenda a thoma u amba naḽo nga ha Muvhuso wa Mudzimu, a fhodza vha lwalaho.
12 Ḓuvha ḽo vha ḽi tshi vho kovhela. Vha fumi-mbili vha ḓa vha amba nae vha ri: “Litsha gogo ḽi ṱuwe, uri ḽi kone u ya miḓanani na mivhunduni uri ḽi ḓiṱoḓele vhudzulo na zwiḽiwa, ngauri ri fhethu hu re thungo.”
13 A amba navho a ri: “Inwi vha ṋeeni zwiḽiwa.” Vha mu fhindula vha ri: “A ri na zwiṅwe zwiḽiwa nga nnḓa ha zwinkwa zwiṱanu na khovhe mbili, khamusi ri nga ya ra rengela avha vhathu vhoṱhe zwiḽiwa.”
14 Ho vha hu na vhanna vha ṱoḓaho u vha zwigidi zwiṱanu. A amba na vhafunziwa vhawe a ri: “Vha dzudzeni nga zwigwada zwa vhathu vha ṱoḓaho u vha fuṱhaṋu (50).”
15 Vha ita nga u ralo, vha dzudza vhathu vhoṱhe fhasi.
16 A dzhia zwiḽa zwinkwa zwiṱanu na khovhe mbili, a lavhelesa ṱaḓulu, a zwi fhaṱutshedza, a zwi ṅwatekanya nahone a ṋea vhafunziwa vhawe uri vha ṋee gogo.
17 Vhoṱhe vha ḽa vha fura, vha kuvhanganya matshakatshaka o salaho, a ḓadza zwirundu zwa fumi-mbili (12).
18 Musi a tshi khou rabela e eṱhe, vhafunziwa vha ḓa khae, nahone a vha vhudzisa a ri: “Gogo ḽi ri ndi nṋe nnyi?”
19 Vha mu fhindula vha ri: “Ḽi ri ndi iwe Yohane Mulovhedzi, fhedzi vhaṅwe vha ri ndi iwe Elia, ngeno vhaṅwe vha tshi ri u muṅwe wa vhaporofita vha kale o vuswaho.”
20 A amba navho a ri: “Inwi ni ri ndi nṋe nnyi?” Petro a fhindula a ri: “Ndi iwe Muḓodzwa* wa Mudzimu.”
21 A vha laya uri vha si vhudze muthu na muthihi,
22 fhedzi a ri: “Murwa-muthu u tea u tambudzwa nga maanḓa na u landulwa nga vhahulwane na nga vhotshifhe vhahulu, na vhamaṅwalo na u vhulahwa nahone a vuswa nga ḓuvha ḽa vhuraru.”
23 A amba na vhoṱhe a ri: “Arali muthu a tshi ṱoḓa u ntevhela, nga a ḓihangwe nahone a hwale danda ḽawe ḽa tshengedzo ḓuvha ḽiṅwe na ḽiṅwe, a ntevhele tshifhinga tshoṱhe.
24 Ngauri ane a ṱoḓa u tshidza vhutshilo hawe u ḓo vhu lozwa, fhedzi ane a lozwa vhutshilo hawe a tshi itela nṋe u ḓo tshidzwa.
25 Ngauri muthu u ḓo vhuyelwa nga’ni arali a tshi wana zwithu zwoṱhe shangoni, fhedzi a lovha kana a ḓitshinyadza ene muṋe?
26 Ngauri muthu ane a shona nṋe na pfunzo yanga, Murwa-muthu u ḓo mu shona musi a tshi swika vhugalani hawe na ha Khotsi awe e na vharuṅwa vhakhethwa.
27 Ngoho ndi a ni vhudza ndi ri: Hu na vhaṅwe vho imaho henefha vhane vha sa ḓo fa vha songo thoma vha vhona Muvhuso wa Mudzimu.”
28 Nga murahu ha maḓuvha a ṱoḓaho u vha malo o no amba eneo mafhungo, a ṱuwa na Petro, Yohane na Yakobo, a gonya navho thavhani u itela u rabela.
29 Musi a tshi khou rabela, tshifhaṱuwo tshawe tsha shanduka nahone zwiambaro zwawe zwa tshena sa tshedza.
30 Ho vha hu na vhanna vhavhili vhe vha vha vha tshi khou amba nae; ho vha hu Mushe na Elia.
31 Vhenevho vho vhonala vhe vhugalani vha tshi khou amba nae nga ha u ṱuwa hawe he ha vha ho dzudzanywa uri hu ḓadzee Yerusalema.
32 Petro na vhe a vha e navho vho vha vho farwa nga khofhe, fhedzi musi vha tshi karuwa, vha vhona vhugala hawe na vhanna vhavhili vhe a vha o ima navho.
33 Musi vhenevho vhanna vha tshi vho ṱuwa, Petro a amba na Yesu a ri: “Mufunzi, ndi zwavhuḓi musi ri fhano, ngauralo kha ri athe madennde mararu, ḽiṅwe ḽi ḓo vha ḽau, ḽiṅwe ḽa vha ḽa Mushe, ḽiṅwe ḽa vha ḽa Elia.” O vha a sa ḓivhi zwine a amba.
34 Musi a tshi kha ḓi amba zwenezwo zwithu, ha vha na gole, ḽa vha tibedza. Musi ḽi tshi khou vha tibedza, vha ofha zwihulu.
35 Ha pfala ipfi ḽi tshi bva kha gole ḽi tshi ri: “Hoyu ndi Murwa wanga, we nda mu nanga. Ni mu thetshelese.”
36 Musi hu tshi pfala ipfi, vha mbo ḓi vhona Yesu e eṱhe. Fhedzi vha fhumula, misini yeneyo vha si vhudze muthu na muthihi zwithu zwe vha zwi vhona.
37 Nga ḓuvha ḽi tevhelaho, musi vha tshi khou tsa nṱha ha thavha, vha ṱanganedzwa nga gogo.
38 Muṅwe we a vha e vhukati ha gogo a huwelela a ri: “Mufunzi, ndi a u humbela uri u ḓe u vhone murwa wanga muthihi fhedzi,
39 musi muya muvhi u tshi mu vutshela, nga khathihi fhedzi u a zhamba, u a mu khwiḓukanya, a bvisa bulo nga mulomo, u a mu vhaisa nahone a u ṱoḓi u ṱuwa khae.
40 Ndo humbela vhafunziwa vhau uri vha u pandele, fhedzi vho kundwa.”
41 Yesu a vha fhindula a ri: “Murafho uyu u si na lutendo na wo tshinyalaho, ndi ḓo vha na inwi u swika lini, ndi ḓo ni konḓelela u swika lini? Ḓisa murwa wau ngeno.”
42 Musi mutukana a tshi khou ya kha Yesu, dimoni ḽa mu wisela fhasi nahone ḽa mu khwiḓukanya. Fhedzi Yesu a kaidza wonoyo muya muvhi, a fhodza onoyo mutukana nahone a mu ṋea khotsi awe.
43 Vhathu vhoṱhe vha kanukiswa nga maanḓa mahulwane a Mudzimu.
Musi vha tshe vho kanukiswa nga zwoṱhe zwe a vha a tshi khou zwi ita, a amba na vhafunziwa vhawe a ri:
44 “Thetshelesani nga vhuronwane nahone ni dzule ni tshi zwi humbula, ngauri Murwa-muthu u ḓo kumedzwa zwanḓani zwa vhathu.”
45 Fhedzi vha ḓi bvela phanḓa vha sa zwi pfesesi. Naho zwo ralo, vho vha vho dzumbelwa zwone uri vha si zwi pfesese, nahone vho vha vha tshi ofha u mu vhudzisa.
46 Ha vuwa khani vhukati havho ya uri muhulwane kha vhoṱhe ndi nnyi.
47 Nge Yesu a vha a tshi ḓivha zwi re mbiluni dzavho, a dzhia ṅwana, a mu imisa vhukati havho,
48 a amba navho a ri: “Naho e nnyi ane a ṱanganedza uyu ṅwana nga nṱhani ha dzina ḽanga u ṱanganedza nṋe, nahone muthu muṅwe na muṅwe ane a nṱanganedza u ṱanganedza na we a nthuma. Ane a ḓiita muṱuku vhukati haṋu noṱhe ndi ene muhulwane.”
49 Yohane a ri: “Mufunzi, ro vhona muṅwe munna a tshi khou pandela madimoni a tshi shumisa dzina ḽau, nahone ra lingedza u mu thivhela ngauri a si muṅwe washu.”
50 Yesu a amba nae a ri: “Ni songo lingedza u mu thivhela, ngauri a sa lwi na inwi u ima na inwi.”
51 Musi maḓuvha a tshi vho sendela a uri a gonye ṱaḓulu, a ḓiimisela u ya Yerusalema.
52 Ngauralo, a ruma vhaḓinḓa uri vha mu range phanḓa. Vha ṱuwa vha swika muḓanani wa Vhasamaria uri vha mu lugiselele hone,
53 fhedzi vha si mu ṱanganedze ngauri o vha o ḓiimisela u ya Yerusalema.
54 Musi vhafunziwa vhawe Yakobo na Yohane vha tshi vhona zwenezwi, vha ri: “Murena, naa u a ṱoḓa ri tshi vhidza mulilo u bvaho ṱaḓulu uri u vha fhelise?”
55 A rembulutshela khavho a vha kaidza.
56 Ngauralo, vha ya kha muṅwe muḓana.
57 Musi vhe nḓilani, muṅwe muthu a amba nae a ri: “Ndi ḓo u tevhela huṅwe na huṅwe hune wa ya hone.”
58 Yesu a amba nae a ri: “Phunguhwe dzi na milindi na zwiṋoni zwa ṱaḓulu zwi na zwiṱaha, fhedzi Murwa-muthu ha na fhethu hune a eḓela hone.”
59 A amba na muṅwe a ri: “Ivha mutevheli wanga.” Onoyo munna a ri: “Ntendele ndi thome ndi ye u vhulunga khotsi anga.”
60 A amba nae a ri: “Litsha vhafu vha vhulunge vhafu vhavho, hone iwe tshimbila u ḓivhadze Muvhuso wa Mudzimu fhethu hoṱhe.”
61 Muṅwe a ri: “Ndi ḓo u tevhela, Murena, fhedzi ntendele ndi thome u onesana na vhahashu.”
62 Yesu a amba nae a ri: “Muthu ane a vhea tshanḓa tshawe kha dzembe nahone a lavhelesa zwi re murahu, ho ngo fanelwa nga Muvhuso wa Mudzimu.”
Ṱhaluso dzi re magumoni a siaṱari
^ Kristo.
