Marko 1:1-45
1 U thoma ha mafhungo maḓifha a ambaho nga ha Yesu Kristo:
2 Samusi zwo ṅwalwa nga muporofita Yesaya musi a tshi ri: “(Ndi ruma muḓinḓa wanga phanḓa hau uri a u lugisele nḓila);
3 Thetshelesani! Hu na muthu ane a khou vhidzelela e sogani, u ri: ‘Lugisani nḓila ya Yehova! Kunakisani nḓila dzawe,’”
4 Yohane Mulovhedzi o ya sogani, a huwelela uri vhathu vha lovhedzwe sa tshiga tsha u rembuluwa u itela u hangwelwa zwivhi.
5 Ngauralo, vha muḓini wa Yudea na vhadzulapo vhoṱhe vha Yerusalema vha ya khae, a vha lovhedza Mulamboni wa Yorodane, vha tshi ḓibula zwivhi zwavho khagala.
6 Yohane o vha a tshi ambara zwiambaro zwa vhukuse ha gamela, a tshi ḓivhofha khundu nga luzwa, a tshi ḽa nzie na mutoli wa ṋotshi dza ḓaka.
7 O vha a tshi huwelela a tshi ri: “A mphiraho nga maanḓa u khou ḓa, ane ndi si fanelee na u kotama phanḓa hawe, nda vhofholola thambo dza thovho dzawe.
8 Nṋe ndo ni lovhedza nga maḓi, fhedzi ene u ḓo ni lovhedza nga muya mukhethwa.”
9 Misini yeneyo Yesu a bva Nazareta shangoni ḽa Galilea a lovhedzwa mulamboni wa Yorodane nga Yohane.
10 A tshi tou bva maḓini a vhona ḽiṱaḓulu ḽi tshi vulea, a vhona muya wa Mudzimu u tshi tsa u tshi ḓa khae u tshi nga ḽiivha,
11 ha pfala ipfi ḽi bvaho ṱaḓulu ḽi tshi ri: “U Murwa wanga ane nda mu funa; ndi a u takalela.”
12 Nga u ṱavhanya muya mukhethwa wa mu kombetshedza uri a ye sogani.
13 Ngauralo, a dzula henefho sogani maḓuvha a fuiṋa (40), a tshi khou lingwa nga Sathane. O vha e vhukati ha zwivhanda, fhedzi vharuṅwa vho vha vha tshi khou mu shumela.
14 Musi Yohane o no farwa, Yesu a ya Galilea u itela u huwelela mafhungo maḓifha a Mudzimu
15 a ri: “Tshifhinga tsho vhewaho tsho swika, hone Muvhuso wa Mudzimu u tsini. Rembuluwani, ni vhe na lutendo kha mafhungo maḓifha.”
16 Musi a tshi khou tshimbila tsini na Lwanzhe lwa Galilea, a vhona murathu na mukomana, Simoni a vhidzwaho Petro na Andrea murathu wawe, vha tshi khou posa mambule lwanzheni, ngauri vho vha vhe vharei vha khovhe.
17 Yesu a amba navho a ri: “Ntevheleni, ndi ḓo ni ita vharei vha vhathu.”
18 Vha mbo ḓi sia mambule avho nga u ṱavhanya, vha mu tevhela.
19 Musi a tshi tou fhirela phanḓanyana, a vhona Yakobo murwa wa Sebedeo na murathu wawe Yohane vhe tshikepeni vha tshi khou luka mambule avho,
20 a vha vhidza nga u ṱavhanya. Ngauralo, vha sia khotsi avho Sebedeo na vhashumi tshikepeni vha mu tevhela.
21 Vha ya Kapernaume.
Nga Sabatha a dzhena sinagogoni a thoma u funza.
22 Vha mangadzwa nga nḓila ye a vha a tshi funza ngayo, ngauri o vha a tshi vha funza sa muthu ane a vha na maanḓa, nahone a sa fani na vhamaṅwalo.
23 Henefho sinagogoni yavho ho vha hu na muṅwe munna we a vha a tshi langwa nga muya muvhi, a zhamba,
24 a ri: “Wo ḓela mini iwe Yesu wa Nazareta? Naa wo ḓela u ri lozwa? Ndi a ḓivha zwavhuḓi uri u Mukhethwa wa Mudzimu.”
25 Fhedzi Yesu a u kaidza a ri: “Fhumula u bve khae!”
26 Musi onoyo munna o no dzungudzwa nga muya muvhi, wa zhamba zwihulu wa bva khae.
27 Vhathu vha kanuka nahone vha thoma u amba nga tshavho, vha ri: “Ndi mini izwi? Ndi pfunzo ntswa! U na maanḓa a u pandela mimuya mivhi, nahone i a mu thetshelesa.”
28 Bvumo ḽawe ḽa phaḓalala mashangoni oṱhe u mona na Galilea.
29 Nga u ṱavhanya vha ṱuwa sinagogoni vha ya hayani ha Simoni na Andrea vhe na Yakobo na Yohane.
30 Nga tshenetsho tshifhinga, mme a mufumakadzi wa Simoni o vha o eḓela a tshi khou lwala zwihulu.*
31 A ya khae a mu fara tshanḓa, a mu vusa; a mbo ḓi fhola, a thoma u vha shumela.
32 Musi ḽo no kovhela, vhathu vha ḓisa vhoṱhe vha lwalaho na vha re na madimoni,
33 vhathu vha muḓi wonoyo vho vha vho kuvhangana muṋangoni.
34 A fhodza vhathu vhanzhi vhe vha vha vhe na malwadze o fhamba-fhambanaho, a pandela madimoni manzhi, fhedzi ho ngo tendela madimoni a tshi amba, ngauri o vha a tshi mu ḓivha uri ndi Kristo.
35 Nga matsheloni-tsheloni, hu tshi kha ḓi vha ho swifhala, a bva a ya fhethu hu re thungo, a tshi swika henefho a thoma u rabela.
36 Huno Simoni na vhe a vha e navho vha ya vha mu ṱoḓa
37 vha tshi mu wana vha ri: “Vhathu vhoṱhe vha khou u ṱoḓa.”
38 Fhedzi a vha fhindula a ri: “Kha ri ye miḓini ya tsini uri ndi ye u huwelela na henefho, ngauri ndi zwenezwo zwe nda ḓela zwone.”
39 A ya a huwelela sinagogoni dzavho u mona na ḽoṱhe ḽa Galilea na u pandela madimoni.
40 Ha dovha ha ḓa muthu a re na mapele, a gwadama a ri: “Arali u tshi funa, u nga mphodza.”
41 A mu pfela vhuṱungu, a isa tshanḓa tshawe a mu kwama, a ri: “Ndi a funa. Fhola.”
42 Mapele a mbo ḓi mu ṱutshela nga u ṱavhanya nahone a mbo ḓi fhola.
43 A mu ṋea ndaela nahone a mu vhudza uri a ṱuwe,
44 a amba nae a ri: “U songo vhudza muthu, fhedzi tshimbila u ye kha tshifhe a u vhone nahone u ṋekedze tshipfumelelo tshe wa laedzwa nga Mushe, uri zwi vhe vhuṱanzi khavho.”
45 Musi onoyo munna o no ṱuwa, a thoma u amba na u phaḓaladza mafhungo eneo, zwa vho konḓela Yesu u dzhena muḓini a tshi vhonwa, fhedzi a bvela phanḓa a tshi dzula fhethu hu re thungo. Naho zwo ralo, vhathu vha ḓi dzula vha tshi ḓa khae vha tshi bva thungo dzoṱhe.
Ṱhaluso dzi re magumoni a siaṱari
^ O vha e na mudinyane.
