Marko 10:1-52
10 Ndi hone Yesu a tshi ṱuwa henefho a ya mikanoni ya Yudea seli ha Yorodane, nahone gogo ḽa mu kuvhanganela. A dovha a vha funza samusi o vha o ḓowela u ita nga u ralo.
2 Vhafarisei vha ḓa khae uri vha mu linge, vha mu vhudzisa arali zwo tendelwa uri munna a ṱale mufumakadzi wawe.
3 A vha fhindula a ri: “Mushe o ni laya a ri mini?”
4 Vha ri: “Mushe o tenda uri hu ṅwalwe luṅwalo lwa u mu pandela na u mu ṱala.”
5 Yesu a amba navho a ri: “O ni ṅwalela mulayo wonoyo nga nṱhani ha mbilu dzaṋu dzo rindilaho.
6 Naho zwo ralo, u bva mathomoni a tsiko, ‘O sika munna na musadzi.
7 Ndi ngazwo munna a tshi ḓo ṱutshela khotsi awe na mme awe,
8 nahone vhuvhili havho vha ḓo vha ṋama nthihi,’ a vha tsha ḓo vha vhavhili, fhedzi vha ḓo vha ṋama nthihi.
9 Nga zwenezwo, zwo vhofhekanywaho nga Mudzimu, muthu a songo zwi fhandekanya.”
10 Musi vhe nḓuni, vhafunziwa vhawe vha thoma u mu vhudzisa malugana na zwenezwo.
11 A amba navho a ri: “Ane a vhuya a ṱala mufumakadzi wawe a vhinga muṅwe, u vha a tshi khou itela mufumakadzi wawe vhuṱonḓolo,
12 na mufumakadzi arali a vhuya a ṱala munna wawe a vhingwa nga muṅwe, u ita vhuṱonḓolo.”
13 Vhathu vha thoma u mu ḓisela vhana khae uri a vha kwame, fhedzi vhafunziwa vha vha kaidza.
14 Musi Yesu a tshi vhona zwenezwo, a sinyuwa nahone a amba navho a ri: “Litshani vhana vha ḓe ha nṋe; ni songo vha dzivhisa, ngauri Muvhuso wa Mudzimu ndi wa vhane vha nga vhenevho.
15 Ngoho ndi a ni vhudza ndi ri: Muthu naho e ufhio ane a sa ṱanganedze Muvhuso wa Mudzimu u fana na ṅwana, a nga si dzhene khawo na luthihi.”
16 A vha kuvhatedza nahone a thoma u vha fhaṱutshedza o vha vhea zwanḓa.
17 Musi e nḓilani a tshi khou ṱuwa, muṅwe munna a mu gidimela a gwadama phanḓa hawe nahone a mu vhudzisa a ri: “Mufunzi wavhuḓi, ndi tea u ita mini uri ndi wane vhutshilo vhu sa fheli?”
18 Yesu a amba nae a ri: “Ndi ngani u tshi ri ndi wavhuḓi? Ndi Mudzimu fhedzi ane a vha wavhuḓi.
19 U a ḓivha milayo ine ya ri: ‘U songo vhulaha; u songo ṱonḓola; u songo tswa; u songo amba vhuṱanzi ha u zwifha; u songo fhura; hulisa khotsi au na mme au.’”
20 Uyo munna a amba nae a ri: “Mufunzi, zwithu zwoṱhe hezwo ndo zwi ita u bva vhuṱukuni hanga.”
21 Yesu a mu lavhelesa, a mu funa nahone a amba nae a ri: “Hu na tshithu tshithihi tshine tsha khou ṱahela kha iwe: Tshimbila u ye u rengise zwithu zwine wa vha nazwo u ṋee vhashai, nahone u ḓo vha na lupfumo ṱaḓulu, u kone u ḓa u vhe mutevheli wanga.”
22 Fhedzi phindulo yeneyo yo mu pfisa vhuṱungu nahone a ṱuwa o ṱungufhala, ngauri o vha e na thundu nnzhi.
23 Yesu a rembuluwa a lavhelesa vhafunziwa vhawe a ri: “Zwi ḓo konḓa vhukuma kha vho pfumaho uri vha dzhene Muvhusoni wa Mudzimu!”
24 Fhedzi vhafunziwa vhawe vha kanukiswa nga zwe a zwi amba. Yesu a amba navho a ri: “Vhana vhanga, zwi ḓo konḓa vhukuma u dzhena Muvhusoni wa Mudzimu!
25 Zwi ḓo leluwa uri gamela i dzhene nga lubuli lwa ṋeleṱe nṱhani ha uri mupfumi a dzhene Muvhusoni wa Mudzimu.”
26 Vha dovha vha mangala zwihulu nahone vha amba nae vha ri: “Ndi nnyi ane a nga tshidzwa?”
27 Yesu a vha lavhelesa, a ri: “Kha vhathu a zwi konadzei, fhedzi a zwo ngo ralo nga Mudzimu, ngauri zwithu zwoṱhe zwi a konadzea kha Mudzimu.”
28 Petro a amba nae a ri: “Ro ṱutshela zwoṱhe ra u tevhela.”
29 Yesu a ri: “Ngoho ndi a ni vhudza ndi ri, A hu na we a ṱutshela nnḓu, vharathu kana vhakomana kana dzikhaladzi kana mme kana khotsi kana vhana kana masimu a tshi itela nṋe na mafhungo maḓifha
30 ane a sa ḓo wana kaḓana kha tshino tshifhinga—dzinnḓu, vharathu na vhakomana, dzikhaladzi, vhomme, vhana, na masimu, na u tovholwa—kha maitele a zwithu a ḓaho, u ḓo wana vhutshilo vhu sa fheli.
31 Naho zwo ralo, vhanzhi vhane vha vha vha u thoma vha ḓo vha vha u fhedza, vha u fhedza vha ḓo vha vha u thoma.”
32 Musi vhe nḓilani vha tshi khou gonya Yerusalema, Yesu o vha o ranga phanḓa vhafunziwa vhawe, nahone vho vha vho mangala, na vhe vha vha vha tshi khou vha tevhela vha thoma u ofha. A dovha a vhidzela vha fumi-mbili (12) thungo, a thoma u vha vhudza zwithu zwine zwa ḓo itea khae:
33 “Zwino ri khou gonya Yerusalema, Murwa-muthu u ḓo kumedzwa vhotshifhe vhahulu na vhamaṅwalo. Vha ḓo mu haṱulela lufu na u mu kumedza kha vhathu vha dzitshaka,
34 vhenevho vha ḓo mu goḓa, vha mu pfela mare, vha mu rwa, nahone vha mu vhulaha, fhedzi u ḓo vuwa nga murahu ha maḓuvha mararu.”
35 Ha mbo ḓa Yakobo na Yohane, vharwa vha Sebedeo, vha amba nae vha ri: “Mufunzi, ri ṱoḓa u tshi ri itela tshithu tshiṅwe na tshiṅwe tshine ra u humbela tshone.”
36 A amba navho a ri: “Ni ṱoḓa ndi tshi ni itela mini?”
37 Vha amba nae vha ri: “Ri tendele uri muṅwe a dzule thungo ya tshanḓa tshau tsha u ḽa muṅwe a dzule thungo ya tsha monde vhugalani hau.”
38 Fhedzi Yesu a amba navho a ri: “A ni ḓivhi zwine na khou humbela zwone. Naa ni nga kona u nwa tshinwelo tshine nda khou ya u tshi nwa kana u lovhedzwa nga ndovhedzo ine nda ḓo lovhedzwa ngayo?”
39 Vha amba nae vha ri: “Ri nga kona.” Musi vha tshi ralo, Yesu a amba navho a ri: “Tshinwelo tshine nda ḓo tshi nwa, ni ḓo tshi nwa, na ndovhedzo ine nda ḓo lovhedzwa ngayo, ni ḓo lovhedzwa-vho ngayo.
40 Naho zwo ralo, u dzula thungo ya tshanḓa tshanga tsha u ḽa kana thungo ya tsha monde a si zwine nda nga ni ṋea zwone, fhedzi ndi zwa vhe vha lugiselwa nga Khotsi anga.”
41 Musi vhaṅwe vha fumi vha tshi zwi pfa, vha sinyutshela Yakobo na Yohane.
42 Musi Yesu o no vha vhidza, a amba navho a ri: “Ni a zwi ḓivha uri vhane vha dzhiiwa vhe vhavhusi vha dzitshaka vha a dzi vhusa nahone vharangaphanḓa vhadzo vha a dzi langa.
43 A zwo ngo ralo kha inwi, fhedzi ane a ṱoḓa u vha muhulwane kha inwi u fanela u vha mushumeli waṋu,
44 muṅwe na muṅwe ane a ṱoḓa u vha wa u thoma u fanela u vha mulanda waṋu noṱhe.
45 Ngauri na Murwa-muthu ho ngo ḓela u shumelwa, fhedzi o ḓela u shumela vhaṅwe na u ṋekedza vhutshilo hawe uri vhu vhe tshirengululi a tshi itela vhanzhi.”
46 Ngauralo, Yesu a swika Yeriko na vhafunziwa vhawe. Musi vha tshi vho ṱuwa vhe na gogo, vha ṱangana na Baratimeo murwa wa Timeo, we a vha o pofula, o dzula thungo ha nḓila a tshi khou humbela.
47 Musi a tshi pfa uri ho vha hu Yesu wa Nazareta, a thoma u vhidzelela a ri: “Yesu, Murwa wa Davida, nkhathutshele!”
48 Vha tshi pfa zwenezwo, vhanzhi vha thoma u mu kaidza uri a fhumule, fhedzi a tou ṋaṋa u vhidzelela a ri: “Murwa wa Davida, nkhathutshele!”
49 Ngauralo, Yesu a mbo ḓi ima a ri: “Mu vhidzeni.” Vha amba na onoyo munna o pofulaho vha ri khae: “U songo ofha! Takuwa; u khou u vhidza.”
50 A bvula tshiambaro tshawe tsha nga nnḓa, a ya khae nga u ṱavhanya.
51 Nga zwenezwo, Yesu a amba nae a ri: “U ṱoḓa ndi tshi u itela mini?” Munna o pofulaho a amba nae a ri: “Mufunzi,* ita uri ndi dovhe ndi vhone.”
52 Yesu a amba nae a ri: “Tshimbila. Lutendo lwau lwo u fhodza.” A mbo ḓi vhona na zwenezwo, a thoma u mu tevhela.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “Raboni.”
