Marko 11:1-33
11 Musi vha tshi vho sendela tsini na Yerusalema vha ima Betfage na Bethania Thavhani ya Miṱwari, Yesu a ruma vhafunziwa vhawe vhavhili
2 a vha vhudza a ri: “Iyani muḓanani u re afho phanḓa haṋu, musi ni tshi swika ni ḓo wana mbongolana yo vhofhiwa, i sa athu ṋamelwa nga muthu; ni i vhofholole ni i ḓise.
3 Arali muṅwe muthu a amba na inwi a ri, ‘Ndi ngani ni tshi khou i vhofholola?’ Inwi ni mu vhudze uri, ‘Murena u khou i ṱoḓa nahone u ḓo i vhuisa nga u ṱavhanya.’”
4 Ngauralo, vhafunziwa vha ṱuwa nahone vha wana mbongolana yo vhofhiwa muṋangoni, nnḓa thungo ha nḓila, vha i vhofholola.
5 Fhedzi vhaṅwe vhe vha vha vho ima henefho vha amba navho vha ri: “Ndi ngani ni tshi khou vhofholola mbongolana?”
6 Vha vha vhudza zwe Yesu a zwi amba, nahone vha vha tendela vha ṱuwa.
7 Vha ḓisa mbongolana kha Yesu, vha kapea zwiambaro zwavho zwa nga nnḓa khayo, a i ṋamela.
8 Vhathu vhanzhi vha adza zwiambaro zwavho zwa nga nnḓa nḓilani, ngeno vhaṅwe vha tshi khou rema matavhi masimuni.
9 Vhe vha vha vho mu ranga phanḓa na vhe vha vha vho mu sala murahu vha bvela phanḓa vha tshi vhidzelela vha tshi ri: “Ri rabela uri u mu tshidze! Nga hu rendwe a ḓaho nga dzina ḽa Yehova!
10 Nga hu rendwe Muvhuso u ḓaho wa khotsi ashu Davida! Ri rabela uri u mu tshidze, u ngei ṱaḓulu-ṱaḓulu!”
11 A dzhena Yerusalema, thembeleni, a lavhelesa zwithu zwoṱhe, samusi ḽo vha ḽi tshi vho kovhela, a ṱuwa a ya Bethania na vha fumi-mbili (12).
12 Nga ḽa matshelo, musi vha tshi khou bva Bethania, Yesu a farwa nga nḓala.
13 A tshi kha ḓi vha kule a vhona muhuyu we wa vha u na maṱari, a ya a tshi ri khamusi u ḓo wana u na tshithu. Fhedzi a tshi swika khawo, a wana u songo aṋwa u na maṱari fhedzi, ngauri ho vha hu si tshifhinga tsha mahuyu.
14 A amba na muhuyu a ri: “Hu songo tsha vha na ane a ḽa mitshelo i bvaho kha iwe lini na lini.” Nahone vhafunziwa vho vha vho thetshelesa.
15 Vha dzhena Yerusalema. Henefho a dzhena thembeleni a thoma u pandela vhoṱhe vhe vha vha vha tshi khou renga na u rengisa thembeleni, a thudzekanya maṱafula a vhatshintshi vha tshelede na bannga dza vhe vha vha vha tshi khou rengisa maivha,
16 a si tendele muthu a tshi fhira nga thembeleni o hwala thundu.
17 A vha funza a ri: “Naa a ho ngo ṅwalwa u pfi: ‘Nnḓu yanga i ḓo pfi nnḓu ya thabelo ya tshaka dzoṱhe’? Fhedzi inwi ni i ita bako ḽa mavemu.”
18 Vhotshifhe vhahulu na vhamaṅwalo vha zwi pfa, vha thoma u ṱoḓa nḓila dza u mu vhulaha, ngauri vho vha vha tshi mu ofha, nga nṱhani ha uri gogo ḽo vha ḽi tshi kanukiswa nga pfunzo yawe.
19 Musi ḽi tshi kovhela vho vha vha tshi bva muḓini.
20 Musi vha tshi fhira nga matsheloni-tsheloni, vha vhona muhuyu wo oma u bva midzini.
21 Ngauralo, Petro a humbula zwe zwa itea, a amba nae a ri: “Rabi,* vhona! Uḽa muhuyu we wa u sema wo oma.”
22 Yesu a fhindula a ri: “Ivha na lutendo kha Mudzimu.
23 Ngoho ndi a u vhudza ndi ri ane a vhudza thavha iyi a ri, ‘Takuwa u ḓipose lwanzheni,’ a sa timatimi mbiluni yawe, e na lutendo lwa uri zwe a zwi amba zwi ḓo itea, zwi ḓo itea nga u ralo.
24 Ndi ngazwo ndi tshi ni vhudza uri: Zwithu zwoṱhe zwine na zwi rabelela na u zwi humbela, ni vhe na lutendo, zwi nge no no zwi wana, nahone ni ḓo zwi wana.
25 Musi no ima ni tshi khou rabela, hangwelani vhoṱhe vhe vha ni khakhela, uri na Khotsi aṋu wa ṱaḓulu a ni hangwele vhutshinyi haṋu.”
26 * ——
27 Vha dovha vha dzhena Yerusalema. Musi a tshi khou tshimbila thembeleni, vhotshifhe vhahulu na vhamaṅwalo na vhahulwane vha ḓa khae
28 vha thoma u amba nae vha ri: “Izwi zwithu zwoṱhe u zwi ita nga maanḓa a nnyi? Kana ndi nnyi o u ṋeaho eneo maanḓa a u ita zwenezwi zwithu?”
29 Yesu a amba navho a ri: “Na nṋe ndi ḓo ni vhudzisa mbudziso nthihi. Musi ni tshi mphindula ndi hone ndi tshi ḓo ni vhudza uri zwenezwi zwithu ndi zwi ita nga maanḓa a nnyi.
30 Naa maanḓa a Yohane a u lovhedza o vha a tshi bva ṱaḓulu kana kha vhathu? Mphinduleni.”
31 Vha thoma u amba nga tshavho vha ri: “Arali ra amba uri, ‘A bva ṱaḓulu,’ u ḓo ri vhudzisa a ri, ‘Ndi ngani ni songo mu tenda?’
32 Ri songo vhuya ra amba uri, ‘A bva kha vhathu.’” Vho vha vha tshi ofha gogo, ngauri vhoṱhe vho vha vha tshi dzhia Yohane e muporofita wa vhukuma.
33 Vha fhindula Yesu vha ri: “A ri ḓivhi.” Yesu a amba navho a ri: “Na nṋe a thi nga ni vhudzi uri ndi ita zwenezwi zwithu nga maanḓa a nnyi.”
Ṱhaluso dzi re magumoni a siaṱari
^ Ndi dzina ḽa u hulisa mufunzi wa Muyuda.
