Marko 12:1-44
12 A thoma u amba navho nga zwifanyiso: “Ho vha hu na muṅwe munna we a vha e na tsimu ya minḓirivhe nahone a ita luhura u mona nayo, a bwa hune a ḓo fhonḓela hone nḓirivhe nahone a fhaṱa tshiingamo; a i kumedza vhalimi a ya shangoni ḽa kule.
2 Musi tshifhinga tshi tshi swika a ruma mulanda wawe kha vhalimi uri a wane miṅwe ya mitshelo ya yeneyo tsimu ya minḓirivhe kha vhalimi.
3 Fhedzi vha mu fara vha mu rwa, vha mu humisa a songo fara tshithu.
4 A rumela muṅwe mulanda khavho, na onoyo vha mu rwa kha ṱhoho nahone vha mu holedza.
5 A rumela muṅwe hafhu, na onoyo vha mu vhulaha, na vhaṅwe vhanzhi vha vha ita nga u ralo, vhaṅwe vha vha rwa, vhaṅwe vha vha vhulaha.
6 O vha a tshi kha ḓi vha na muṅwe murwa we a vha a tshi mu funa. A fhedzisela nga u mu ruma khavho, a tshi ri, ‘Vha ḓo ṱhonifha murwa wanga.’
7 Fhedzi vhenevho vhalimi vha amba nga tshavho vha ri, ‘Uyu ndi ene muḽaifa. Kha ri mu vhulahe uri ri wane ifa ḽawe.’
8 Ngauralo, vha mu fara, vha mu khurumedzela nnḓa ha tsimu ya minḓirivhe.
9 Muṋe wa tsimu ya minḓirivhe u ḓo ita mini? U ḓo ḓa a vhulaha vhalimi vhenevho nahone a ṋea vhaṅwe vhathu yeneyo tsimu ya minḓirivhe.
10 Naa a ni athu vhuya na vhala ulu luṅwalo: ‘Tombo ḽe ḽa laṱwa nga vhafhaṱi, ndi ḽone ḽe ḽa vha thikho ya tshifhaṱo.
11 Zwenezwo zwo itwa nga Yehova, ndi zwi mangadzaho maṱoni ashu’?”
12 Nga zwenezwo, vha thoma u ṱoḓa nḓila dza u mu fara, fhedzi vho vha vha tshi ofha gogo, ngauri vho zwi ṱhogomela uri o vha a tshi khou amba nga tshifanyiso o humbula nga havho. Ngauralo, vha mu litsha vha ṱuwa.
13 Nga murahu ha zwenezwo, vha ruma vhaṅwe Vhafarisei na vhatevheli vha Herode uri vha mu fashe nga zwine a amba.
14 Musi vha tshi swika vha amba nae vha ri: “Mufunzi, ri a zwi ḓivha zwa uri a u zwifhi nahone a u ṱoḓi u takadza muthu, ngauri a u sedzi mbonalo ya muthu, fhedzi u funza nḓila ya Mudzimu u tendelana na ngoho: Naa zwo tendelwa u bvisela Kesare* muthelo kana a zwo ngo tendelwa?
15 Naa ri fanela u thela kana u sa thela?” Nge Yesu a vha a tshi ḓivha muhoyo wavho, a amba navho a ri: “Ndi ngani ni tshi nndinga? Nnḓiseleni dinari* ndi i vhone.”
16 Vha ḓisa nthihi. A vha vhudzisa a ri: “Tshifanyiso itshi na dzina iḽi ndi zwa nnyi?” Vhone vha ri: “Ndi zwa Kesare.”
17 Yesu a amba navho a ri: “Kesare mu ṋeeni zwi re zwa Kesare, Mudzimu ni mu ṋee zwi re zwa Mudzimu.” Vha mangala zwihulu.
18 Ha ḓa Vhasadukei vhane vha amba uri a hu na mvuwo, vha mu vhudzisa vha ri:
19 “Mufunzi, Mushe o ri ṅwalela uri arali munna a fa nahone a sia mufumakadzi a si na vhana, murathu wawe u fanela u vhinga onoyo mufumakadzi uri a bebele mukomana wawe vhana.
20 Zwino ho vha hu na vhanna vha sumbe, vhana vha muthu, wa u thoma a vhinga mufumakadzi, fhedzi a fa a si na vhana.
21 Na wa vhuvhili a mu vhinga, fhedzi a fa a si na ṅwana, na wa vhuraru na ene a fa a si na ṅwana.
22 Vhoṱhe vha sumbe vha fa vha si na vhana. Mafheleloni na mufumakadzi onoyo a fa.
23 Musi vhafu vha tshi vuswa, mufumakadzi uyo u ḓo vha wa ufhio? Ngauri o vha e mufumakadzi wa vhenevho vha sumbe?”
24 Yesu a vha fhindula a ri: “No khakha, ngauri a ni ḓivhi Maṅwalo kana maanḓa a Mudzimu.
25 Ngauri musi vhafu vha tshi vuswa, vhanna a vha nga vhingi na vhafumakadzi a vha nga vhingwi, fhedzi vha ḓo nga vharuṅwa vha ngei ṱaḓulu.
26 Fhedzi arali hu malugana na u vuswa ha vhafu, naa a no ngo vhala buguni ya Mushe nga ha tshiṱaka tsha mipfa, musi Mudzimu a tshi mu vhudza uri: ‘Ndi Mudzimu wa Abrahamu, Mudzimu wa Isaka na Mudzimu wa Yakobo’?
27 A si Mudzimu wa vho faho, fhedzi ndi wa vha tshilaho. No khakha nga maanḓa.”
28 Muṅwe wa vhamaṅwalo we a vha e henefho a pfa vha tshi khou mu pikisa, a zwi ṱhogomela uri o vha fhindula nga nḓila yavhuḓi, a mu vhudzisa a ri: “Ndaela khulwane kha dzoṱhe ndi ifhio?”
29 Yesu a fhindula a ri: “Ya u thoma i ri, ‘Thetshelesa Isiraele, Yehova Mudzimu washu ndi ene Yehova e eṱhe,
30 nahone u tea u funa Yehova Mudzimu wau nga mbilu yau yoṱhe, na nga zwoṱhe zwine wa vha zwone, na nga ṱhalukanyo yau yoṱhe, na nga nungo dzau dzoṱhe.’
31 Ya vhuvhili ndi heyi: ‘U tea u funa wahau vhunga u tshi ḓifuna.’ A hu na iṅwe ndaela ine ya fhira yeneyi.”
32 Wa maṅwalo a amba nae a ri: “Mufunzi, wo amba zwavhuḓi u tendelana na ngoho, ‘Mudzimu ndi Muthihi, a hu na muṅwe nga nnḓa ha Ene,’
33 u mu funa nga mbilu yau yoṱhe, na nga u ṱalukanya hau hoṱhe, na nga nungo dzau dzoṱhe na u funa wahau vhunga u tshi ḓifuna ndi zwa ndeme u fhira zwiṱhavhelo zwa u fhiswa na zwiṱhavhelo zwa zwifuwo.”
34 Ngauralo, musi Yesu a tshi ṱhogomela uri o fhindula nga vhuṱali, a amba nae a ri: “A u kule na Muvhuso wa Mudzimu.” Fhedzi a ho ngo tsha vha na muthu we a vha na tshivhindi tsha u mu vhudzisa.
35 Naho zwo ralo, musi Yesu a tshi khou bvela phanḓa na u funza thembeleni, a ri: “Zwo ḓa hani uri vhamaṅwalo vha ambe uri Kristo ndi murwa wa Davida?
36 Musi Davida o hevhedzwa nga muya mukhethwa o ri, ‘Yehova o amba na Murena wanga a ri: “Dzula thungo ya tshanḓa tshanga tsha u ḽa, ndi vhuye ndi ite maswina au vhukando ha milenzhe yau.”’
37 Davida o mu vhidza Murena, fhedzi zwi ḓa hani uri a vhe murwa wawe?”
Nahone gogo ḽihulu ḽo vha ḽo takalela u mu thetshelesa.
38 Musi a tshi khou funza a amba a ri: “Thanyelani vhamaṅwalo vhane vha tama u tshimbila vho ambara khanzu na u ṱoḓa u lumeliswa mimakete
39 na u funa u dzula zwiduloni zwa phanḓa dzisinagogoni na u dzudzwa zwiduloni zwo vhetshelwaho vhaeni vha vhuimo ha nṱha zwimimani.
40 Ndi vhone vhane vha dzhia thundu dza dzitshilikadzi na u kanganyedza nga thabelo ndapfu; vhenevho vha ḓo wana khaṱulo i vhavhaho vhukuma.”
41 A dzula tsini na mbulungelo ya tshelede nahone a lavhelesa nḓila ye gogo ḽa vha ḽi tshi khou longela ngayo tshelede mbulungeloni, nahone vhapfumi vhanzhi vha tshi khou longela tshelede nnzhi ya tsimbi.
42 Ha ḓa tshilikadzi i shayaho ya longela zwipeni zwivhili, zwe zwa vha zwi si na ndeme.
43 Ngauralo, a vhidza vhafunziwa vhawe a amba navho a ri: “Ngoho ndi a ni vhudza ndi ri iyi tshilikadzi i shayaho yo longela zwinzhi u fhira vhoṱhe vhe vha longa tshelede mbulungeloni.
44 Ngauri vhoṱhe vho longa vha tshi bvisa kha zwinzhi zwine vha vha nazwo, fhedzi naho ene e mushai, o longela zwoṱhe zwe a vha e nazwo, zwoṱhe zwe a vha a tshi ḓo ḓitshidza ngazwo.”
