Marko 13:1-37
13 Musi a tshi bva thembeleni, muṅwe wa vhafunziwa vhawe a amba nae a ri: “Mufunzi, vhona uri matombo aya na zwifhaṱo zwi hani!”
2 Naho zwo ralo, Yesu a mu fhindula a ri: “Naa izwi zwifhaṱo zwoṱhe u khou zwi vhona? A hu na tombo ḽine ḽa ḓo sala ḽi nṱha ha ḽiṅwe ḽi songo piḓimulwa.”
3 Musi Yesu o dzula Thavhani ya Miṱwari o livhana na thembele, Petro, Yakobo, Yohane, na Andrea vha thoma u mu vhudzisa vhe vhoṱhe, vha ri:
4 “Ri vhudze, izwi zwithu zwoṱhe zwi ḓo itea lini, nahone tshiga tsha uri izwo zwithu zwoṱhe zwi ḓo fhela lini tshi ḓo vha tshifhio?”
5 Yesu a amba navho a ri: “Ni ṱhogomele uri hu si vhe na muthu ane a ni xedza.
6 Vhanzhi vha ḓo ḓa nga dzina ḽanga, vha ri, ‘Ndi nṋe onoyo,’ nahone vha ḓo xedza vhanzhi.
7 Zwiṅwe hafhu, musi ni tshi pfa nga ha dzinndwa na nga ha mafhungo a dzinndwa; ni songo tshuwa; zwenezwi zwithu zwi fanela u itea, fhedzi vhufhelo a vhu athu swika.
8 “Lushaka lu ḓo lwa na luṅwe lushaka na muvhuso wa lwa na muṅwe muvhuso; hu ḓo vha na midzinginyo fhethu ho fhamba-fhambanaho; zwiḽiwa zwi ḓo ṱahela. Zwenezwi ndi hone u ranga ha maṱungu.*
9 “Inwi ni dzule no fhaṱuwa; vhathu vha ḓo ni kumedzela dzikhoroni, nahone ni ḓo rwiwa dzisinagogoni, vha ḓo ni imisa phanḓa ha vhavhusi na mahosi nga nṱhani hanga uri zwi vhe vhuṱanzi khavho.
10 Zwiṅwe hafhu, hu ḓo thoma ha ḓivhadzwa mafhungo maḓifha kha tshaka dzoṱhe.
11 Musi vha tshi ni fara uri vha ni ise khoroni, ni songo vhilaela nga zwine na ḓo zwi amba, fhedzi zwiṅwe na zwiṅwe zwine na ḓo ṋewa nga tshenetsho tshifhinga, ni ambe zwenezwo, ngauri a si inwi ni ambaho, fhedzi ndi muya mukhethwa.
12 Zwiṅwe hafhu, murathu u ḓo hwelela mukomana a mu vhulahisa, khotsi u ḓo hwelela ṅwana, vhana vha ḓo vutshela vhabebi vhavho vha vha vhulahisa.
13 Ni ḓo vhengwa nga vhathu vhoṱhe nga nṱhani ha dzina ḽanga. Fhedzi ane a konḓelela u swika vhufheloni ndi ene ane a ḓo tshidzwa.
14 “Ngauralo, musi ni tshi vhona zwi nengisaho zwi ḓisaho mutshinyalo, zwi fhethu hune zwi si fanele u vha hone (muvhali nga a shumise ṱhalukanyo), vha re Yudea kha vha thome u shavhela dzithavhani.
15 Muthu a re kha ṱhanga a songo tsa kana a dzhena nḓuni uri a dzhie tshiṅwe tshithu tshi re nḓuni yawe,
16 a re tsimuni a songo tsha humela kha zwithu zwi re murahu uri a dzhie zwiambaro zwawe zwa nga nnḓa.
17 Khombo vho vhifhaho muvhilini na vha mamisaho misini yeneyo!
18 Ni dzule ni tshi rabela uri zwi si itee vhuriha,
19 ngauri misini yeneyo hu ḓo vha na maṱungu a sa athu vhuya a vha hone u bva mathomoni a tsiko yo sikwaho nga Mudzimu, u swika nga tshenetsho tshifhinga nahone ha tsha ḓo dovha a vha hone.
20 Zwi re zwone ndi uri arali Yehova a sa ḓo fhungudza maḓuvha, a hu na muthu ane a ḓo tshidzwa. Fhedzi nga nṱhani ha vhe a vha nanga, u ḓo fhungudza maḓuvha.
21 “Arali muthu a amba na inwi a ri, ‘Vhonani! Kristo khoyu,’ kana, ‘Vhonani! Khouḽaa,’ ni songo tenda.
22 Hu ḓo vha na Vhokristo vha mazwifhi na vhaporofita vha mazwifhi nahone vha ḓo ita zwiga na zwithu zwi mangadzaho uri arali zwi tshi konadzea vha xedze na vho nangiwaho.
23 Inwi ni fhaṱuwe; ndo ni vhudza zwithu zwoṱhe hu tshee nga phanḓa.
24 “Musi ho no fhira maṱungu eneo, ḓuvha ḽi ḓo swifhala, ṅwedzi a u tsha ḓo vhonetshela,
25 ṋaledzi dzi ḓo wa dzi tshi bva ṱaḓulu, na maanḓa a maṱaḓulu a ḓo dzinginyea.
26 Ndi hone vha tshi ḓo vhona Murwa-muthu a tshi ḓa e kha makole e na maanḓa mahulu na vhugala.
27 U ḓo ruma vharuṅwa nahone vha ḓo kuvhanganya vhanangiwa vhawe vha tshi bva thungo nṋa, u bva magumoni a ḽifhasi u swika magumoni a ḽiṱaḓulu.
28 “Zwino gudani kha tshifanyiso tsha muhuyu: Musi matavhi awo a tshi ṱuma lurere, ni mbo ḓi ḓivha uri tshilimo tshi tsini.
29 Nga hu fanaho, musi ni tshi vhona zwenezwi zwithu zwi tshi itea, ni ḓivhe uri u tsini, u muṋangoni.
30 Ngoho ndi a ni vhudza ndi ri murafho uyu u nga si lovhe hezwi zwithu zwoṱhe zwi sa athu itea.
31 Ḽiṱaḓulu na ḽifhasi zwi ḓo lovha, fhedzi maipfi anga ha nga lovhi.
32 “A hu na ane a ḓivha nga ha ḽeneḽo ḓuvha kana tshifhinga, na vharuṅwa vha re ṱaḓulu na Murwa a vha ḽi ḓivhi, ḽi ḓivhiwa nga Khotsi fhedzi.
33 Dzulani no fhaṱuwa ngauri a ni ḓivhi uri tshifhinga tsho vhewaho tshi lini.
34 Zwi fana na muthu ane a khou fara lwendo lwa u ya shangoni ḽa kule ane a sia nnḓu yawe, o ṋea vhalanda vhawe maanḓa, muṅwe na muṅwe o mu ṋea mushumo wawe, nahone a laya mulindi wa muṋango uri a dzule o fhaṱuwa.
35 Ngauralo, dzulani no fhaṱuwa, ngauri a ni ḓivhi uri Muṋe wa nnḓu u ḓo vhuya lini, kana nga madekwana kana vhukati ha vhusiku kana nga maḓautsha,
36 uri musi a tshi vhuya zwi songo lavhelelwa, a si ni wane no eḓela.
37 Fhedzi zwine nda vhudza inwi, ndi vhudza vhoṱhe ndi ri: Dzulani no fhaṱuwa.”
Ṱhaluso dzi re magumoni a siaṱari
^ U fana na vhuṱungu vhune mufumakadzi a vhu pfa musi a tshi vhofholowa.
