Marko 14:1-72
14 Ho vha ho sala maḓuvha mavhili uri hu swike Paseka na Vhuṱambo ha Zwinkwa zwi si na mbiliso. Nahone vhotshifhe vhahulu na vhamaṅwalo vho vha vha tshi khou ṱoḓa nḓila ine vha nga fara ngayo Yesu nga vhukwila uri vha mu vhulahe,
2 vho vha vha tshi dzulela u amba uri: “Ri songo mu fara vhuṱamboni; khamusi vhathu vha nga vusa bonyongo.”
3 Musi e ngei Bethania nḓuni ya Simoni a re na mapele a tshi khou ḽa, muṅwe mufumakadzi a ḓa khae o fara mudzio u re na mapfura a nukhelelaho, a ḓuraho vhukuma. A vula mudzio wa mapfura a thoma u ḓodza Yesu kha ṱhoho.
4 Vha tshi vhona zwenezwi, vhaṅwe vha sinyuwa vha ri: “Enea mapfura a u nukhelela a tambiselwa-ni?
5 Ngauri enea mapfura a nukhelelaho o vha a tshi nga vha o rengiswa nga dinari dza maḓana mararu nahone yeneyo tshelede ya ṋewa vhashai!” Vha sinyutshela onoyo mufumakadzi.
6 Fhedzi Yesu a ri: “Mu litsheni. Ni mu dinela’ni? Zwe a nnyitela ndi zwavhuḓi.
7 Ngauri vhashai ni ḓo dzula ni navho, nahone ni nga vha itela zwivhuya tshifhinga tshoṱhe musi ni tshi ṱoḓa, fhedzi a ni nga vhi na nṋe misi yoṱhe.
8 O ita zwe a vha a tshi nga kona; o ḓodza muvhili wanga enea mapfura, a tshi itela u lugiselela mbulungo yanga.
9 Ngoho ndi a ni vhudza ndi ri: Huṅwe na huṅwe hune mafhungo maḓifha a ḓo ḓivhadzwa hone shangoni ḽoṱhe, zwe uyu mufumakadzi a ita zwi ḓo ambiwa-vho u itela u mu humbula.”
10 Yudasi Iskariote, muṅwe wa vha fumi-mbili (12), a ya ha vhotshifhe vhahulu uri a mu fheṱe.
11 Musi vha tshi zwi pfa, vha takala vha fulufhedzisa u mu ṋea tshelede ya tsimbi-tseṱha. Ngauralo, a thoma u ṱoḓa nḓila ya u mu fheṱa nga tshifhinga tsho teaho.
12 Nga ḓuvha ḽa u thoma ḽa vhuṱambo ha zwinkwa zwi si na mbiliso, samusi vho vha vho ḓowela u ṱhavha ngwana ya Paseka, vhafunziwa vhawe vha ḓa khae vha ri: “U ṱoḓa ri tshi u lugisela ngafhi uri u ḽe Paseka?”
13 Musi vha tshi ralo, a ruma vhafunziwa vhavhili nahone a amba navho a ri: “Iyani muḓini, ni ḓo ṱangana na muṅwe munna o hwala mudzio wa maḓi. Ni mu tevhele,
14 henefho hune a ḓo dzhena hone, ni ambe na muṋe wa muḓi ni ri, ‘Mufunzi u ri: “I ngafhi nnḓu ya vhaeni ine nda ḓo ḽela hone Paseka na vhafunziwa vhanga?”’
15 U ḓo ni sumbedza kamara khulwane ya nṱha, yo dzudzanywaho, ni ri lugiselele henefho.”
16 Ngauralo, vhafunziwa vha ṱuwa, vha dzhena muḓini nahone vha wana zwi nga nḓila ye a vha vhudza ngayo, vha lugiselela Paseka.
17 Musi ho no vha madekwana, a ḓa na vha fumi-mbili (12).
18 Musi vho dzula ṱafulani vha tshi khou ḽa, Yesu a ri: “Ngoho ndi a ni vhudza ndi ri: Muṅwe waṋu ane a khou ḽa na nṋe u ḓo mpheṱa.”
19 Vha ṱungufhala, vha thoma u amba nae nga muthihi nga muthihi vha ri: “Kani ndi nṋe?”
20 A amba navho a ri: “Ndi muṅwe wa vha fumi-mbili (12) ane a ḓo isa tshanḓa khathihi na nṋe tshidongoni ndi ane a ḓo mpheṱa.
21 Ndi ngoho uri Murwa-muthu u ḓo ṱuwa, samusi zwo ṅwalwa malugana nae, fhedzi khombo kha onoyo muthu ane a ḓo fheṱa Murwa-muthu! Zwi ḓo vha khwine arali onoyo muthu a songo vhuya a bebwa.”
22 Musi vha tshi khou ḽa, Yesu a dzhia tshinkwa, a livhuha, a tshi ṅwata, nahone a ṋea vhafunziwa vhawe, a ri: “Dzhiani, tshi imela muvhili wanga.”
23 A dzhia tshinwelo, a livhuha, a vha ṋea tshone, vhoṱhe vha nwa ngatsho.
24 A amba navho a ri: “Tshi imela ‘malofha anga a mulanga,’ ane a ḓo shululelwa vhanzhi.
25 Ngoho ndi a ni vhudza ndi ri: A thi tsha ḓo dovha nda nwa na inwi waini iyi hu vhuye hu ḓe ḓuvha ḽine nda ḓo i nwa na inwi i ntswa Muvhusoni wa Mudzimu.”
26 Mafheleloni, musi vho no renda Mudzimu nga u imba, vha ya Thavhani ya Miṱwari.
27 Yesu a amba navho a ri: “Noṱhe ni ḓo khakhiswa, ngauri ho ṅwalwa u pfi: ‘Ndi ḓo vhulaha mulisa, nahone nngu dzi ḓo balangana.’
28 Musi ndo no vuswa, ndi ḓo ni ranga phanḓa ra ṱangana Galilea.”
29 Fhedzi Petro a amba nae a ri: “Naho vhaṅwe vhoṱhe vha tshi nga khukhuliswa, nṋe ndi nga si ḓo vhuya nda khukhulisea.”
30 Nga zwenezwo, Yesu a amba nae a ri: “Ngoho ndi a u vhudza ṋamusi, ndi amba vhusiku vhuno, mukukulume u sa athu lila luvhili, u ḓo vha wo no nndandula luraru.”
31 Fhedzi Petro a amba o khwaṱhisa a ri: “Naho ndi tshi fanela u fa na iwe, ndi nga si vhuye nda u landula.” Na vhaṅwe vhafunziwa vhoṱhe vha amba nga u ralo.
32 Ndi hone vha tshi ya fhethu hune ha pfi Getsemane, a amba na vhafunziwa vhawe a ri: “Dzulani afha ndi thome ndi ye u rabela.”
33 A ṱuwa na Petro, Yakobo, na Yohane, a thoma u ṱungufhala na u tsikeledzea zwihulu.
34 A amba navho a ri: “Ndo ṱungufhala zwihulu lune nda tou nga ndi sa fa. Dzulani afha nahone ni dzule no fhaṱuwa.”
35 A fhirela phanḓanyana, a gwadama, a rabela uri arali zwi tshi konadzea, tshifhinga itsho tshi mu pfuke.
36 Nahone a ri: “Aba,* Khotsi, zwithu zwoṱhe zwi a konadzea kha iwe; bvisa tshinwelo itshi kha nṋe. Naho zwo ralo, hu songo itwa zwine nṋe nda zwi funa, fhedzi nga hu itwe zwi funwaho nga iwe.”
37 A tshi vhuya a wana vho eḓela, a amba na Petro a ri: “Simoni, naa wo eḓela? Naa u tou kundwa u dzula wo fhaṱuwa na nṋe awara nthihi?
38 Dzulani no fhaṱuwa nahone ni rabele, uri ni si dzhene mulingoni. Mbilu i a zwi funa, fhedzi ṋama a i na maanḓa.”
39 A dovha a ṱuwa a ya u rabela, a amba zwi fanaho.
40 A dovha a vhuya a wana vho eḓela, ngauri maṱo avho o vha a tshi khou lemelwa nga khofhe, vha si tsha ḓivha uri vha nga mu fhindula vha ri mini.
41 A vhuyelela lwa vhuraru, a amba navho a ri: “Ni kha ḓi vha no eḓela zwaṋu no ḓiawetshela! Zwo eḓana! Tshifhinga tsho swika tsha uri Murwa-muthu a kumedzwe zwanḓani zwa vhaitazwivhi.
42 Vuwani; kha ri ṱuwe. O mpheṱaho u tsini.”
43 Nga u ṱavhanya musi a tshi kha ḓi amba, ha bvelela Yudasi, muṅwe wa vha fumi-mbili (12), e na gogo ḽo fara mabanga na dzithonga ḽo rumiwa nga vhotshifhe vhahulu, vhamaṅwalo na vhahulwane.
44 O mu fheṱaho o vha o no vha ṋea tshiga, a ri: “Ane nda ḓo mu khisa ndi ene; ni mu fare ni ṱuwe nae o lindwa.”
45 A ya kha Yesu o mu livha a ri: “Rabi!”* nahone a mu khisa.
46 Ngauralo, vha mu fara vha mu isa dzhele.
47 Hone muṅwe wa vhe vha vha vhe na Yesu a ṱomola banga ḽawe nahone a tumula nḓevhe ya mulanda wa tshifhe muhulu.
48 Yesu a amba navho a ri: “Naa no bva no fara mabanga na dzithonga zwa tou nga ni khou ya u fara ḽivemu?
49 Ḓuvha ḽiṅwe na ḽiṅwe, ndo vha ndi tshi ṱwa thembeleni ndi tshi khou funza, fhedzi a no ngo mpfara. Naho zwo ralo, ndi u itela uri Maṅwalo a ḓadzee.”
50 Nahone vhoṱhe vha mu ṱutshela vha shavha.
51 Fhedzi ho vha hu na muṅwe muṱhannga we a vha o ambara tshiambaro tsha labi ḽavhuḓi a thoma u mu tevhela, vha lingedza u mu fara,
52 fhedzi a sutuka a sia tshenetsho tshiambaro a shavha.
53 Vha ṱuwa na Yesu vha mu isa ha tshifhe muhulu, nahone vhotshifhe vhahulu vhoṱhe na vhahulwane na vhamaṅwalo vha kuvhangana.
54 Fhedzi Petro a tevhela nga kule, a vhuya a swika muṱani wa tshifhe muhulu; o vha o dzula na vhalanda a tshi khou ora mulilo.
55 Nga tshenetsho tshifhinga, vhotshifhe vhahulu na Sanhedrini* yoṱhe vho vha vha tshi khou ṱoḓa vhuṱanzi ha mazwifhi uri vha vhulahe Yesu, fhedzi vha si vhu wane.
56 Vhunzhi havho vho vha vha tshi khou mu ambela vhuṱanzi ha u zwifha. Fhedzi vhuṱanzi havho ho vha vhu tshi hanedzana.
57 Na vhaṅwe vho vha vha tshi takuwa vha tshi mu ambela vhuṱanzi ha u zwifha vha tshi ri:
58 “Ro mu pfa a tshi ri, ‘Ndi ḓo thutha thembele ye ya fhaṱwa nga zwanḓa, nahone nda fhaṱa iṅwe i songo fhaṱwaho nga zwanḓa nga maḓuvha mararu.’”
59 Na kha zwenezwi, vhuṱanzi havho ho vha vhu sa tendelani.
60 Mafheleloni, tshifhe muhulu a takuwa vhukati havho a vhudzisa Yesu a ri: “Naa a u fhinduli tshithu? U ri mini nga vhuṱanzi vhune vha khou u pomoka hone?”
61 Fhedzi a sokou fhumula a si fhindule tshithu. Tshifhe muhulu a dovha a mu vhudzisa a ri: “Naa u Kristo Murwa wa Mudzimu Mukhethwa?”
62 Nga zwenezwo, Yesu a ri: “Ndi nṋe, nahone ni ḓo vhona Murwa-muthu o dzula thungo ya tshanḓa tsha u ḽa tsha Wa maanḓa a tshi ḓa e kha makole a ṱaḓulu.”
63 A tshi pfa zwenezwo, tshifhe muhulu a mbo ḓi kherukanya zwiambaro zwawe a ri: “Ri kha ḓi ṱoḓa dziṅwe ṱhanzi dza mini?
64 No mu pfa a tshi khou semana. Ni phetha nga ḽifhio?” Vhoṱhe vha mu haṱula vha ri o tewa nga u fa.
65 Vhaṅwe vha mu pfela mare khofheni, vha mu thivha tshifhaṱuwo, vha mu rwa nga mavili, vha ri: “Porofita!” Musi vho no mu vhanda khofheni, vhalindi vha ṱuwa nae.
66 Petro o vha o dzula ngei fhasi muṱani, ha ḓa musidzana wa mulanda.
67 Musi a tshi vhona Petro a tshi khou ora mulilo, a amba nae o tou mu lavhelesa a ri: “Na iwe wo vha u na Yesu wa Nazareta.”
68 Fhedzi a hanedza a ri: “Hoyo muthu a thi mu ḓivhi na zwine na khou amba zwone a thi zwi ḓivhi,” nahone a mbo bvela nnḓa ha khoro.
69 Onoyo musidzana a mu vhona nahone a dovha a vhudza vhe vha vha vho ima henefho a ri: “Onoyo ndi muṅwe wavho.”
70 A dovha a hanedza. Nga murahu ha tshifhinganyana, vho imaho henefho vha thoma u amba na Petro vha ri: “Vhukuma u muṅwe wavho, zwi re zwone ndi uri u Mugalilea.”
71 Fhedzi a thoma u ana a ri: “Hoyo munna ane na khou amba nga hae a thi mu ḓivhi!”
72 Nahone nga u ṱavhanya mukukulume wa lila lwa vhuvhili, nahone Petro a humbula zwe Yesu a mu vhudza a tshi ri: “Musi mukukulume u sa athu lila luvhili, u ḓo vha wo no nndandula luraru.” A ṱungufhala zwihulu nahone a lila.
Ṱhaluso dzi re magumoni a siaṱari
^ Ḽeneḽo ndi ipfi ḽa Luaramiki ḽine ḽa amba uri “khotsi.” Ndi ipfi ḽine vhana vha ḽi shumisa vha tshi vhidza khotsi avho.
^ Ndi dzina ḽa u hulisa mufunzi wa Muyuda.
^ Yo vha i khoro khulwane ya Vhayuda.
