Marko 16:1-20
16 Nga murahu ha Sabatha, Maria Magdalena, Maria mme a Yakobo, na Salome vha renga mishonga uri vha ḓodze tshitumbu tsha Yesu.
2 Nga matsheloni-tsheloni nga ḓuvha ḽa u thoma ḽa vhege, vha ya vhiḓani vha swika ḓuvha ḽi tshi vho ṱavha.
3 Nahone vho vha vha tshi khou amba nga tshavho vha tshi ri: “Ndi nnyi ane a ḓo ri phigulusela tombo a ḽi bvisa muṋangoni wa vhiḓa?”
4 Musi vha tshi lavhelesa, vha vhona uri tombo ḽo phiguluselwa kule, naho ḽo vha ḽi ḽihulwane vhukuma.
5 Musi vha tshi dzhena vhiḓani, vha vhona muṱhannga o dzula thungo ya tshanḓa tsha u ḽa o ambara zwiambaro zwitshena, vha mangala.
6 A amba navho a ri: “Ni songo mangala. Ndi a zwi ḓivha uri ni khou ṱoḓa Yesu wa Nazareta we a vha o ombelwa kha danda. O vuswa; ha ho fhano. Vhonani fhethu he vha vha vho mu vhea hone.
7 Fhedzi tshimbilani; ni vhudze vhafunziwa vhawe na Petro uri, ‘U nḓilani ya u ya Galilea; ni ḓo mu vhona henengei, samusi o ni vhudza.’”
8 Ngauralo, vha bva henefho vhiḓani nga u gidima, vha tshi tetemela nga nyofho. Nahone vha si vhudze muthu, ngauri vho vha vha tshi khou ofha.
MAGUMO MAPFUFHI
Maṅwalwa a Bivhili a fulufhedzeaho a guma nga maipfi a wanalaho kha ndimana ya vhumalo. Naho zwo ralo, maṅwe maṅwalwa a kale a na magumo malapfu a tevhelaho, nahone maṅwe maṅwala e a ṅwalwa nga murahu a na magumo a tevhelaho. Eneo magumo mavhili ha dzhiiwi sa tshipiḓa tsha Maṅwalo o hevhedzwaho.
Zwithu zwoṱhe zwe vha vhudzwa vho zwi anetshela nga u pfufhifhadza vhe vha vha vhe tsini na Petro. Zwiṅwe hafhu, nga murahu ha zwenezwo zwithu, Yesu a rumela mulaedza mukhethwa na wa lini na lini malugana na u tshidzwa nga hu sa fheli, u bva vhubvaḓuvha u ya vhukovhela.
MAGUMO MALAPFU
9 Musi o no vuwa vhafuni nga matsheloni a ḓuvha ḽa u thoma ḽa vhege a bvelela lwa u thoma kha Maria Magdalena, we a pandela madimoni a sumbe khae.
10 A ṱuwa a ya a vhudza vhe vha vha vhe nae, samusi vho vha vho ṱungufhala nahone vha tshi khou mu lilela.
11 Musi vha tshi pfa uri u khou tshila na uri Maria o mu vhona, vha si tende.
12 Nga murahu ha zwenezwo, a bvelela e kha tshiṅwe tshivhumbeo kha vhathu vhavhili vhe vha vha vho farisana nḓila, musi vha tshi khou ya kha ḽiṅwe shango ḽa mahayani;
13 nahone vha huma vha vhudza vhaṅwe vhoṱhe. Na vhone vha si vha tende.
14 Fhedzi nga murahu a bvelela kha vha fumi-nthihi (11) musi vho dzula zwiḽiwani, a vha kaidza nge vha si vhe na lutendo na u vha havho na mbilu dzi konḓaho, ngauri a vho ngo tenda vhe vha mu vhona musi o no vuswa vhafuni.
15 A amba navho a ri: “Iyani shangoni ḽoṱhe ni huwelele mafhungo maḓifha kha zwivhumbwa zwoṱhe.
16 Ane a tenda nahone a lovhedzwa u ḓo tshidzwa, fhedzi ane a si tende u ḓo haṱulwa.
17 Zwiṅwe hafhu, vhane vha tenda vha ḓo ita zwi tevhelaho: Nga u shumisa dzina ḽanga vha ḓo pandela madimoni, vha ḓo amba nga dzindimi,
18 vha ḓo fara dziṋowa nga zwanḓa zwavho, naho vha nwa tshithu naho tshi tshifhio tshi vhulayaho a tshi nga ḓo vha vhaisa na luthihi. Vha ḓo vhea zwanḓa zwavho kha vha lwalaho, nahone vha fhola.”
19 Ngauralo, musi Murena Yesu, o no amba navho, a takulelwa ṱaḓulu nahone a dzula kha tshanḓa tsha u ḽa tsha Mudzimu.
20 Nga zwenezwo, vha ṱuwa vha ya u huwelela huṅwe na huṅwe, musi Murena a tshi khou shuma navho na u tikedza mulaedza nga zwiga.
