Marko 2:1-28
2 Naho zwo ralo, nga murahu ha maḓuvhanyana a dovha a vhuyelela Kapernaume, nahone zwa pfala uri u hayani.
2 Nga nṱhani ha zwenezwo, ha kuvhangana vhathu vhanzhi, ha ḓala u swika muṋangoni, a thoma u vha vhudza mafhungo maḓifha.
3 Vha mu ḓisela munna o omaho lurumbu o hwalwa nga vhanna vhaṋa.
4 Nge vha vha vha sa koni u mu isa he Yesu a vha e hone nga nṱhani ha u ḓala ha gogo, vha fuḓulula ṱhanga u livhana na he Yesu a vha e hone, nga buli ḽeneḽo vha tsitsa munna o omaho lurumbu o eḓela kha vhulalo hawe.
5 Musi Yesu a tshi vhona lutendo lwavho, a amba na munna o omaho lurumbu a ri: “Ṅwana’nga, wo hangwelwa zwivhi zwau.”
6 Vhaṅwe vhamaṅwalo vhe vha vha vho dzula henefho, vha elekanya vha ri:
7 “Ndi ngani uyu munna a tshi amba nga u ralo? U khou semana. Ndi nnyi a konaho u hangwela zwivhi arali e si Mudzimu fhedzi?”
8 Nge Yesu a vha a tshi ḓivha zwe vha vha vha tshi khou zwi elekanya, a amba navho a ri: “Ndi ngani ni tshi elekanya zwenezwi zwithu mbiluni dzaṋu?
9 Ndi zwifhio zwine zwa leluwa u vhudza uyu munna o omaho lurumbu, naa ndi uri, ‘Wo hangwelwa zwivhi zwau,’ kana ndi uri, ‘Takuwa u hwale vhulalo hau u tshimbile’?
10 Fhedzi uri ni ḓivhe uri Murwa-muthu u na maanḓa a u hangwela zwivhi kha ḽifhasi—” a amba na o omaho lurumbu a ri:
11 “Ndi a u vhudza ndi ri, Takuwa, u hwale vhulalo hau, u ye hayani hau.”
12 Nga zwenezwo, a takuwa nahone nga u ṱavhanya a hwala vhulalo hawe, a tshimbila a tshi vhonwa nga vhoṱhe. Vhoṱhe vha kanuka, vha renda Mudzimu vha ri: “A ri athu vhuya ra vhona zwithu zwi fanaho na zwenezwi.”
13 Yesu a dovha a ya thungo ha lwanzhe, nahone gogo ḽoṱhe ḽa mu tevhela, a thoma u ḽi funza.
14 Musi a tshi khou fhira nga henefho, a vhona Levi murwa wa Alifeo o dzula ofisini ya vhathelisi, a amba nae a ri: “Ivha mutevheli wanga.” A mbo ḓi takuwa a mu tevhela.
15 Musi o dzula nḓuni ya Levi vha tshi khou ḽa, ha ḓa vhathelisi vhanzhi na vhaitazwivhi vha dzula na Yesu na vhafunziwa vhawe, nahone vhanzhi vha mbo ḓi vha vhatevheli vhawe.
16 Fhedzi musi vhamaṅwalo na Vhafarisei vha tshi vhona uri u khou ḽa na vhaitazwivhi na vhathelisi, vha thoma u amba na vhafunziwa vhawe vha ri: “Naa u ḽa na vhathelisi na vhaitazwivhi?”
17 Musi Yesu a tshi pfa zwenezwo, a amba navho a ri: “Vhathu vha re na mutakalo wavhuḓi a vha ṱoḓi ṅanga,* fhedzi i ṱoḓwa nga vha lwalaho. A tho ngo ḓela u vhidza vhathu vho lugaho, fhedzi ndo ḓela u vhidza vhaitazwivhi.”
18 Vhafunziwa vha Yohane na Vhafarisei vho vha vho ḓowela u ḓidzima zwiḽiwa. Ngauralo, vha ḓa vha amba nae vha ri: “Ndi ngani vhafunziwa vha Yohane na vhafunziwa vha Vhafarisei vha tshi ḓidzima zwiḽiwa, fhedzi vhafunziwa vhau vha sa ḓidzimi?”
19 Yesu a amba navho a ri: “Musi mukwasha a tshi kha ḓi vha navho, naa khonani dza mukwasha dzi nga ḓidzima zwiḽiwa? Musi vha tshi kha ḓi vha nae, vha nga si ḓidzime.
20 Fhedzi hu ḓo ḓa maḓuvha ane mukwasha a ḓo dzhiiwa khavho, ndi hone vha tshi ḓo ḓidzima zwiḽiwa nga ḽeneḽo ḓuvha.
21 A hu na ane a nga rungelela labi ḽiswa kha tshiambaro tsha nga nnḓa tsha kale, ngauri labi iḽo ḽiswa ḽi ḓo huma nahone buli ḽa mbo ḓi engedzea.
22 A hu na muthu ane a nga shela waini ntswa kha mikhwama* ya kale ya u shela waini. Arali a ita nga u ralo, i ḓo balea nahone waini ya tevhuwa, mikhwama ya tshinyala. Fhedzi vhathu vha shela waini ntswa kha mikhwama miswa ya u shela waini.”
23 Musi Yesu a tshi khou fhira nga masimuni a goroi nga Sabatha, vhafunziwa vhawe vha enda vha tshi ṱhukhula ṱhotshe dza goroi.
24 Ngauralo, Vhafarisei vha amba nae vha ri: “Vhona! Ndi ngani vhafunziwa vhau vha tshi khou ita zwithu zwi songo tendelwaho nga Sabatha?”
25 Fhedzi a amba navho a ri: “Naa a ni athu vhala zwe Davida na vhanna vhe a vha e navho vha zwi ita musi vha si na zwiḽiwa vho farwa nga nḓala?
26 Musi a tshi dzhena nḓuni ya Mudzimu, misini ya Abiathara tshifhe muhulu, a ḽa zwinkwa zwo ṋekedzwaho Mudzimu, zwe ene na vhanna vhawe vha vha vha songo tendelwa u zwi ḽa, zwe zwa vha zwo tea u ḽiwa nga vhotshifhe fhedzi?”
27 A amba navho a ri: “Sabatha yo itelwa muthu nahone a si muthu o itelwaho Sabatha;
28 ngauralo, Murwa-muthu u dovha a vha Murena wa Sabatha.”
