Marko 3:1-35
3 A dovha a dzhena sinagogoni, nahone henefho ho vha hu na munna o omaho tshanḓa.
2 Vha mu vhea iṱo u itela u vhona arali a tshi ḓo fhodza onoyu munna nga Sabatha, uri vha mu vhone mulandu.
3 Yesu a amba na munna o omaho tshanḓa a ri: “Takuwa u ḓe ngeno vhukati.”
4 Nga murahu a vha vhudzisa a ri: “Naa zwo tendelwa uri nga Sabatha muthu a ite mishumo yavhuḓi kana i si yavhuḓi, a tshidze kana a vhulahe?” Fhedzi vha fhumula.
5 Musi o no vha lavhelesa o sinyuwa, a vha pfela vhuṱungu nge mbilu dzavho dza vha dzo rindila, a amba na onoyo munna a ri: “Onyolosa tshanḓa tshau.” A tshi onyolosa, nahone tsha fhola.
6 Musi vha tshi vhona zwenezwo, Vhafarisei vha bva nahone nga u ṱavhanya vha fara muṱangano na vhatevheli vha Herode u itela u langana uri vha vhulahe Yesu.
7 Fhedzi Yesu na vhafunziwa vhawe vha ya lwanzheni, gogo ḽi bvaho Galilea na Yudea ḽa mu tevhela.
8 Na gogo ḽi bvaho Yerusalema na ḽine ḽa bva Idumea na ḽi bvaho seli ha mulambo wa Yorodane na u mona na Tiro na Sidoni, ḽa ḓa khae nge ḽa pfa nga ha zwithu zwinzhi zwe a zwi ita.
9 Yesu a vhudza vhafunziwa vhawe uri vha dzule vho mu lugisela tshikepe tshiṱuku tshine a ḓo tshi shumisa uri gogo ḽi si mu pwanyeledze.
10 O vha o no fhodza vhathu vhanzhi, nahone zwenezwo zwo ita uri vhoṱhe vhe vha vha vha tshi khou lwalesa vha mu kuvhanganele uri vha mu kwame.
11 Na mimuya mivhi musi i tshi mu vhona, yo vha i tshi gwadama phanḓa hawe ya zhamba ya ri: “Iwe u Murwa wa Mudzimu.”
12 Fhedzi tshifhinga tshinzhi o vha a tshi i laya nga ho khwaṱhaho uri i songo mu ḓivhadza.
13 Yesu a gonya nṱha ha thavha a vhidza vhe a vha a tshi vha ṱoḓa, nahone vha gonya vha ya khae.
14 A vhumba tshigwada tsha vha fumi-mbili (12), a vha vhidza uri ndi vhaapostola, uri vha tshimbile nae na uri a vha rume u huwelela
15 na u vha ṋea maanḓa a u pandela madimoni.
16 Kha tshigwada tsha vha fumi-mbili (12) tshe a tshi vhumba ho vha hu Simoni, we a dovha a mu ira dzina ḽine ḽa pfi Petro,
17 Yakobo murwa wa Sebedeo na Yohane, murathu wa Yakobo; (o dovha a vha ira dzina ḽine ḽa pfi Benehargeme, zwine zwa amba uri “Vharwa vha Mubvumo”),
18 Andrea, Filipo, Baratholomeo, Mateo, Thomasi, Yakobo murwa Alifeo, Thadeo, Simoni wa Kana,
19 na Yudasi Iskariote, we nga murahu a mu fheṱa.
Yesu a dzhena nḓuni.
20 Gogo ḽa dovha ḽa kuvhangana, lwe vha si kone na u ḽa.
21 Musi mashaka awe a tshi zwi pfa, vha bva u itela uri vha mu fare, ngauri vho vha vha tshi ri: “O ṱangana ṱhoho.”
22 Na vhamaṅwalo vha ḓa khae vha tshi bva Yerusalema vha ri: “U na Beelsebulu,* nahone u pandela madimoni nga maanḓa a muvhusi wa madimoni.”
23 Musi o no vha vhidza, a amba navho nga zwifanyiso a ri: “Sathane a nga pandela hani Sathane?
24 Arali muvhuso wa fhandekana u ḓo wa,
25 arali nnḓu ya fhandekana, a i nga ḓo ima.
26 Arali zwino Sathane a tshi ḓivutshela a lwa na ene muṋe u ḓo fhandekana, ha nga koni u ima, hu ḓo vha u fhela hawe.
27 Zwi re zwone ndi uri a hu na ane a nga dzhena nḓuni ya munna a re na maanḓa a tswa thundu dzawe, arali a songo thoma a mu vhofha. Ndi hone a tshi ḓo kona u tswa thundu dzawe.
28 Ngoho ndi a ni vhudza ndi ri vhana vha vhathu vha ḓo hangwelwa zwivhi zwoṱhe, hu sa londwi uri ndi zwivhi zwifhio zwine vha zwi ita na uri ndi maṱamba afhio ane vha a amba.
29 Naho zwo ralo, ane a sema muya mukhethwa ha nga hangwelwi na lini na lini, fhedzi u na mulandu wa tshivhi nga hu sa fheli.”
30 O amba zwenezwi ngauri vho vha vha tshi ri: “U na muya muvhi.”
31 Ha swika mme awe na vharathu vhawe, vha ima nnḓa vha ruma muthu uri a ye a mu vhidze.
32 Nge gogo ḽa vha ḽo mu tanga, vha amba nae vha ri: “Mme au na vharathu vhau vho ima nnḓa vha khou u ṱoḓa.”
33 Ene a vha fhindula a ri: “Mme anga ndi nnyi, nahone vharathu vhanga ndi vhonnyi?”
34 A lavhelesa vhathu vhe vha vha vho dzula vho mu tanga a ri: “Vhonani, mme anga na vharathu vhanga khevha!
35 Ngauri ane a ita zwine Khotsi anga a zwi funa, ndi ene murathu wanga na khaladzi anga na mme anga.”
Ṱhaluso dzi re magumoni a siaṱari
^ Ndi ḽiṅwe dzina ḽa Sathane.
