Marko 5:1-43
5 Vha wela seli ha lwanzhe vha swika shangoni ḽa Gadara.
2 Musi Yesu a tshi tou tsa tshikepeni, a ṱangana na munna a re na muya muvhi a tshi bva mavhiḓani.
3 Onoyo munna o vha a tshi dzula mavhiḓani, nahone ho vha hu si na muthu we a vha a tshi kona u mu vhofha, naho hu nga ngeḓane.
4 Ngauri o vha o no vhofhiwa lunzhi nga ngeḓane zwanḓani na milenzheni, fhedzi a tshi dzi ṱhukhula, hu si na muthu we a vha e na maanḓa a u mu kunda.
5 O vha a tshi dzulela u zhamba vhusiku na masiari e mavhiḓani na dzithavhani a tshi ḓitshea nga matombo.
6 Fhedzi a tshi vhona Yesu a tshee kulenyana, a mu gidimela a swika a mu losha.
7 Nga zwenezwo, a zhamba nga ipfi ḽihulu a ri: “Wo ḓela mini iwe Yesu, Murwa wa Mudzimu wa Ṱaḓulu-ṱaḓulu? Ndi a u anisa nga Mudzimu uri u songo ntambudza.”
8 Ngauri o vha a tshi khou amba nawo a tshi ri: “Ibva kha uyu munna, iwe muya muvhi.”
9 Yesu a mu vhudzisa a ri: “U pfi nnyi?” A fhindula a ri: “Ndi pfi Mmbi ngauri ri vhanzhi.”
10 A humbela Yesu lunzhi uri a songo pandela mimuya mivhi kha iḽo shango.
11 Nga henefho ho vha hu na sambi ḽihulu ḽa nguluvhe ḽe ḽa vha ḽi tshi khou fula thavhani.
12 Mimuya mivhi ya mu humbela ya ri: “Ri rumele sambini ḽa nguluvhe uri ri dzhene khadzo.”
13 Nahone a i tendela. Mimuya mivhi ya bva nahone ya dzhena kha sambi ḽa nguluvhe, nahone nguluvhe dzi ṱoḓaho u vha zwigidi zwivhili dza gidimela luwani dza mbo ḓi godimela lwanzheni, dza fela henefho.
14 Hone vhalisa vhadzo vha shavha, vha swika muḓini na mivhunduni ya henefho vha amba zwoṱhe zwe zwa itea, vhathu vha ḓa vha vhona zwe zwa itea.
15 Ngauralo, vha ḓa ha Yesu, vha vhona munna we a vha e na mmbi ya madimoni o dzula henefho o ambara zwavhuḓi nahone o no vha muthu-muthu, vha ofha zwihulu.
16 Na vhe vha zwi vhona vha ṱalutshedza zwe zwa itea kha munna we a vha e na madimoni na kha dzinguluvhe.
17 Nga zwenezwo, vha humbela Yesu uri a ṱuwe zwiṱirikini zwavho.
18 Musi Yesu a tshi khou ṋamela tshikepe, uḽa munna we a vha e na madimoni a mu humbela uri a ṱuwe nae.
19 Naho zwo ralo, a si tende u ṱuwa nae, fhedzi a mu vhudza uri: “Iya hayani kha vhahau, u vha vhudze zwithu zwoṱhe zwe Yehova a u itela zwone na nḓila ye a u khathutshela ngayo.”
20 Nahone a ṱuwa a thoma u ḓivhadza miḓini ya fumi* zwoṱhe zwe Yesu a mu itela zwone, nahone vhathu vhoṱhe vha kanuka.
21 Musi Yesu o no dovha a wela seli ha khunzi-khunzi nga tshikepe, gogo ḽihulu ḽa mu kuvhanganela, nahone o vha e tsini na lwanzhe.
22 Muṅwe wa vhane vha ingamela sinagogo, we a vha a tshi pfi Yairo a ḓa, musi a tshi mu vhona a gwadama milenzheni yawe
23 a mu humbela lunzhi-lunzhi a ri: “Ṅwananyana wanga muṱuku u khou lwala lwa u fa. Ndi khou humbela uri u ḓe u mu vhee zwanḓa uri a fhole.”
24 Nga zwenezwo, a ṱuwa nae. Nahone gogo ḽa mu tevhela ḽi tshi khou mu pwanyeledza.
25 Ho vha hu na muṅwe mufumakadzi we a vha o no fhedza miṅwaha ya fumi-mbili (12) o farwa nga vhulwadze ha u shuluwa malofha,
26 nahone o vha o no tambudzwa lunzhi nga dziṅanga,* o no fhedza thundu yawe yoṱhe nahone a sa fholi, fhedzi vhulwadze ha ḓi ṋaṋa vhu tshi ya.
27 Musi a tshi pfa nga zwe Yesu a zwi ita, a ḓa khae nga murahu a tshi tou vhanyuludza nahone a kwama tshiambaro tshawe tsha nga nnḓa,
28 ngauri o vha a tshi dzulela u amba uri: “Arali nda tou kwama fhedzi zwiambaro zwawe zwa nga nnḓa, ndi ḓo fhola.”
29 Vhulwadze hawe ha u shuluwa malofha ha mbo ḓi fhola na zwenezwo, nahone a zwi pfa muvhilini wawe uri o fhola.
30 Nga u ṱavhanya Yesu a pfa uri maanḓa o bva khae, a rembuluwa a lavhelesa gogo a ri: “Ndi nnyi o kwamaho zwiambaro zwanga?”
31 Fhedzi vhafunziwa vhawe vha ri: “U a zwi vhona uri gogo ḽi khou u pwanyeledza, zwino ndi ngani u tshi ri, ‘Ndi nnyi o nkwamaho?’”
32 A sedza-sedza thungo dzoṱhe uri a vhone we a mu kwama.
33 Fhedzi uḽa mufumakadzi o vha o tshuwa a tshi khou tetemela, nga u ḓivha zwe zwa itea khae, a ḓa a gwadama phanḓa hawe nahone a mu vhudza ngoho yoṱhe.
34 A amba nae a ri: “Ṅwana’nga, lutendo lwau lwo u fhodza. Ṱuwa nga mulalo, nahone u fhole vhulwadze hau.”
35 Musi a tshi kha ḓi amba, vhaṅwe vhanna vha bvaho hayani ha muingameli wa sinagogo vha ḓa vha ri: “Ṅwananyana wau o lovha! U kha ḓi dinela’ni Mufunzi?”
36 Musi Yesu a tshi pfa zwe vha vha vha tshi khou zwi amba, a amba na muingameli wa sinagogo a ri: “U songo ofha; ivha na lutendo.”
37 A ṱuwa na Petro, Yakobo, na Yohane, murathu wa Yakobo. A si tende vhaṅwe vha tshi mu tevhela.
38 Vha mbo ḓi swika muḓini wa muingameli wa sinagogo, a vhona vhathu vho vusa bonyongo vha tshi khou lila nahone vhaṅwe vha tshi khou zhamba,
39 musi a tshi tou dzhena a amba navho a ri: “Ndi ngani no vusa bonyongo ḽingafha ni tshi khou lila? Ṅwana ho ngo fa, fhedzi o tou eḓela.”
40 Musi a tshi ralo vha thoma u mu sea nga u tou mu goḓa. Fhedzi musi o no bvisela vhathu vhoṱhe nnḓa, a dzhia vhabebi vha uyo ṅwana na vhe a vha e navho, a dzhena he ṅwana a vha e hone.
41 Nga zwenezwo, a mu fara tshanḓa a ri: “Thalita kumi,” zwine zwa amba uri: “Ṅwananyana muṱuku, ndi ri ‘Vuwa!’”
42 Nga u ṱavhanya ṅwananyana a vuwa a thoma u tshimbila. (O vha e na miṅwaha ya 12.) Vha takala vhukuma lwe vha kundwa u langa maḓipfele avho.
43 A vha vhudza lunzhi-lunzhi uri vha songo vhudza muthu enea mafhungo, nahone a amba uri vha ṋee onoyo ṅwananyana muṱuku zwiḽiwa.
