Marko 6:1-56
6 Yesu a ṱuwa henefho a ya muḓini we a alutshela khawo, vhafunziwa vhawe vha mu tevhela.
2 Nga Sabatha a thoma u funza sinagogoni, vhanzhi vhe vha vha vho mu thetshelesa vha kanuka vha ri: “Uyu muthu o wana ngafhi zwenezwi zwithu? Nahone ndi ngani uyu munna o ṋewa honovhu vhuṱali na vhukoni ha u ita yeneyi mishumo ya maanḓa nga zwanḓa zwawe?
3 Naa uyu a si muvhaḓi, murwa wa Maria, ane a vha mukomana wa Yakobo, Yosefa, Yudasi na Simoni? Khaladzi dzawe a ri nadzo henefha vhukati hashu?” Vha thoma u khukhulisea nga nṱhani hawe.
4 Fhedzi Yesu a amba navho a ri: “Muporofita ha huliswi muḓini we a alutshela khawo na nga mashaka awe na hayani hawe.”
5 Ho ngo ita mishumo ya maanḓa nga nnḓa ha u vhea zwanḓa vhalwadze vha si gathi uri a vha fhodze.
6 U sa vha havho na lutendo zwo mu mangadza. A tshimbila u mona na miḓana zwiṱirikini zwa henefho, a tshi khou funza.
7 A vhidza vha fumi-mbili (12), a vha ruma nga vhavhili nga vhavhili, nahone a vha ṋea maanḓa a u pandela mimuya mivhi.
8 A dovha a vha laedza uri musi vha tshi fara lwendo vha songo ṱuwa na tshithu nga nnḓa ha lubaḓa—vha songo hwala tshinkwa, mukhwama wa zwiḽiwa, tshelede ya tsimbi-tswuku zwipatshini zwavho—
9 fhedzi vha ambare thovho nahone vha songo ambara zwiambaro zwivhili.
10 A dovha a ri: “Muḓini muṅwe na muṅwe une na ḓo dzhena khawo, ni dzule henefho u swika ni tshi ṱuwa.
11 Arali vha sa ni ṱanganedzi kana vha sa ni thetshelesi, musi ni tshi ṱuwa henefho, ni fhufhure buse ḽi re milenzheni yaṋu uri zwi vhe vhuṱanzi khavho.”
12 Huno vha bva vha huwelela uri vhathu vha rembuluwe,
13 nahone vho vha vha tshi pandela madimoni manzhi na u ḓolisa vhalwadze vhanzhi mapfura na u vha fhodza.
14 Ngauralo, Khosi Herode a pfa nga ha zwenezwo, ngauri dzina ḽa Yesu ḽo vha ḽi tshi khou ambiwa hoṱhe, vhathu vha tshi ri: “Yohane Mulovhedzi o vuswa vhafuni, ndi ngazwo a tshi ita yeneyo mishumo ya maanḓa.”
15 Fhedzi vhaṅwe vho vha vha tshi ri: “Ndi Elia.” Vhaṅwe vha tshi ri: “Ndi muporofita u fana na vhaṅwe vhaporofita vha kale.”
16 Musi Herode a tshi zwi pfa, a thoma uri: “Yohane uḽa we nda mu tumula ṱhoho, o vuswa.”
17 Ngauri Herode o vha o ruma vhathu uri vha vhofhe Yohane nahone vha mu valele dzhele a tshi itiswa nga Herodia mufumakadzi wa Filipo, mukomana wawe, ngauri o vha o mu vhinga.
18 Yohane o vhudza Herode lunzhi-lunzhi a ri: “A wo ngo tendelwa u vhinga mufumakadzi wa mukomana wau.”
19 Herodia o vha o fara Yohane nga mbilu nahone o vha a tshi ṱoḓa u mu vhulaha, fhedzi a kundwa.
20 Herode o vha a tshi ofha Yohane, nge a vha a tshi ḓivha uri ndi munna o lugaho, mukhethwa, nahone Herode o vha a tshi mu tsireledza. Tshifhinga tshoṱhe musi a tshi pfa Yohane a tshi amba, o vha a sa ḓivhi uri a ite mini, naho zwo ralo o bvela phanḓa a tshi takalela u mu thetshelesa.
21 Ha swika ḓuvha ḽo teaho ḽe Herode a vha o ita tshilalelo nga ḓuvha ḽawe ḽa mabebo, o itela vhanna vhawe vha vhuimo ha nṱha na vhalangammbi na vhaḓivhalea vha Galilea.
22 Ṅwananyana wa Herodia a dzhena a tshina nahone a takadza Herode na vhe a vha o dzula navho zwiḽiwani. Khosi ya amba na ṅwananyana ya ri: “Nkhumbele tshiṅwe na tshiṅwe tshine wa tshi ṱoḓa, nahone ndi ḓo u ṋea tshone.”
23 A mu anela a ri: “Tshiṅwe na tshiṅwe tshine wa nkhumbela ndi ḓo u ṋea tshone, naho hu u u fhandulela muvhuso wanga nga vhukati.”
24 Ngauralo, a ṱuwa a ya a vhudzisa mme awe a ri: “Ndi humbele mini?” Mme awe vha ri: “Humbela ṱhoho ya Yohane Mulovhedzi.”
25 A vhuyelela ha khosi nga u ṱavhanya nahone a ri: “Ndi ṱoḓa u tshi nṋea zwino ṱhoho ya Yohane Mulovhedzi i kha ndilo.”
26 Naho zwenezwo zwo ṱungufhadza khosi zwihulu, yo vha i sa ṱoḓi u mu dzima zwe a vha o zwi humbela, ngauri yo vha yo ana phanḓa ha vhe ya vha yo dzula navho zwiḽiwani.
27 Nga zwenezwo, khosi ya mbo ḓi ruma mulindi uri a ḓise ṱhoho ya Yohane. Ngauralo, a ya a tumula ṱhoho ya Yohane dzhele.
28 A ḓisa ṱhoho ya Yohane i kha ndilo, a i ṋea ṅwananyana, nahone ṅwananyana a i ṋea mme awe.
29 Musi vhafunziwa vhawe vha tshi zwi pfa, vha ḓa vha dzhia tshitumbu tshawe vha tshi vhulunga vhiḓani.
30 Vhaapostola vha tshi vhuya vha ḓa vha kuvhangana phanḓa ha Yesu vha mu ṱalutshedza zwoṱhe zwe vha ita na zwe vha funza.
31 A amba navho a ri: “Kha ri ṱuwe nga tshashu ri ye fhethu hu re thungo uri ri awelenyana.” Ngauri ho vha hu na vhathu vhanzhi vhe vha vha vha tshi khou dzhena vha tshi bva, nahone vha sa koni u wana tshifhinga tsha u awela na tsha u ḽa.
32 Nga zwenezwo, vha ṱuwa vhe vhoṱhe nga tshikepe vha tshi ya fhethu hu re thungo.
33 Fhedzi vhathu vha vha vhona vha tshi khou ṱuwa, nahone vhanzhi vha zwi ḓivha, vha gidima nga milenzhe vha tshi bva miḓini yoṱhe vha swika u thoma.
34 Musi a tshi tsa tshikepeni a vhona gogo, a ḽi pfela vhuṱungu ngauri ḽo vha ḽi tshi tou nga nngu dzi si na mulisa. A thoma u vha funza zwithu zwinzhi.
35 Ḽo vha ḽi tshi vho kovhela, vhafunziwa vhawe vha ḓa vha amba nae vha ri: “Afha fhethu hu thungo nahone ḽo no kovhela.
36 Vha litshe vha ṱuwe, uri vha kone u ya mivhunduni na miḓanani vha ḓirengele zwiḽiwa.”
37 Yesu a amba navho a ri: “Inwi vha ṋeeni zwiḽiwa.” Vha mu fhindula vha ri: “Naa ri ye u renga zwinkwa zwa dinari dza maḓana mavhili ri ṋee avha vhathu vha ḽe?”
38 A vha vhudzisa a ri: “Ni na zwinkwa zwingana? Iyani u sedza!” Musi vho no sedza vha ri: “Ndi zwinkwa zwiṱanu na khovhe mbili.”
39 A vha laedza uri vha dzudze vhathu vhoṱhe hatsini nga zwigwada.
40 Vha dzula nga zwigwada zwa vhathu vha ḓana na zwa fuṱhanu (50).
41 A dzhia zwiḽa zwinkwa zwiṱanu na khovhe mbili, a lavhelesa ṱaḓulu, a zwi fhaṱutshedza. Nga murahu, a ṅwatekanya zwinkwa a ṋea vhafunziwa vhawe uri vha ṋee vhathu, a kovhekanyela vhathu vhoṱhe dziḽa khovhe mbili.
42 Vhoṱhe vha ḽa vha fura,
43 vha kuvhanganya matshakatshaka a zwinkwa a ḓadza zwirundu zwa fumi-mbili (12), hu songo kumbelwa a khovhe.
44 Vhe vha ḽa zwinkwa ho vha hu vhanna vha zwigidi zwiṱanu.
45 Nga u ṱavhanya a kombetshedza vhafunziwa vhawe uri vha ṋamele tshikepe uri vha mu range phanḓa, vha wele seli thungo ha Betsaida nahone ene a sala a tshi vhofholola gogo.
46 Musi o no onesana navho, a gonya thavhani u itela u rabela.
47 Musi ḽo no kovhela, tshikepe tsho vha tshi vhukati ha lwanzhe, fhedzi Yesu o vha o sala e eṱhe nnḓa ha lwanzhe.
48 Nga maḓautsha a vhona vhafunziwa vha tshi khou kundwa u langa tshikepe, ngauri vho vha vho livhana na ḓumbu, a ya khavho a tshi khou tshimbila nṱha ha lwanzhe, fhedzi a nga u a vha fhira.
49 Musi vha tshi mu vhona a tshi khou tshimbila nṱha ha lwanzhe, vhafunziwa vhawe vha kanuka, vha ri: “Ndi bono!” Vha ṱavha mukosi.
50 Vhoṱhe vha tshi mu vhona vha dzhenwa nga nyofho. Nga u ṱavhanya a amba navho a ri: “Ivhani na tshivhindi! Ndi nṋe; ni songo ofha.”
51 Nga zwenezwo a dzhena tshikepeni, ḓumbu ḽa dzika. Zwenezwo zwo vha kanukisa vhukuma,
52 ngauri vho vha vha sa pfesesi zwe vha vha vha tshi fanela u zwi guda nga ha vhuṱolo ha zwinkwa, fhedzi mbilu dzavho dzo dzula dzo rindila vha sa pfesesi.
53 Musi vha tshi wela seli, vha dzhena shangoni ḽa Genetsareta vha imisa tshikepe tshavho henefho.
54 Musi vha tshi tou bva tshikepeni, vhathu vha mu ḓivha,
55 vha gidima na dzingu ḽoṱhe vho hwala vhalwadze vhe kha vhulalo havho vha vha isa he a vha e hone.
56 Miḓini na miḓanani ye a vha a tshi ya khayo vho vha vha tshi ḓisa vhalwadze makete, nahone vho vha vha tshi mu humbela uri vha tou kwama zwavho lupendelo lwa tshiambaro tshawe tsha nga nnḓa. Vhanzhi vhe vha kwama lupendelo vho mbo ḓi fhola.
