Marko 7:1-37
7 Vhafarisei na vhaṅwe vhamaṅwalo vha bvaho Yerusalema vha kuvhanganela Yesu.
2 Musi vha tshi vhona vhaṅwe vha vhafunziwa vha tshi khou ḽa nga zwanḓa zwi re na tshika, zwine zwa amba uri vho vha vha songo zwi ṱamba—
3 ngauri Vhafarisei na Vhayuda vhoṱhe a vha ḽi vha songo thoma vha ṱamba zwanḓa zwavho u swika kha lukuḓavhavha, vha tshi tevhedza sialala ḽa vhomakhulukuku wavho,
4 nahone musi vha tshi bva makete, a vha ḽi vha songo thoma vha ḓikunakisa nga u ḓishasha nga maḓi, nahone hu na maṅwe masialala manzhi ane vha a tevhela, a ngaho u ṱanzwa zwinwelo, dzikhali na zwidongo.—
5 Vhenevha Vhafarisei na vhamaṅwalo vha mu vhudzisa vha ri: “Ndi ngani vhafunziwa vhau vha sa tevheli sialala ḽa vhomakhulukuku washu, vha tshi ḽa vha songo ṱamba zwanḓa?”
6 A vha fhindula a ri: “Vhadzia-muhoyo ndi inwi, Yesaya o porofita nga ho teaho nga ha inwi, samusi zwo ṅwalwa ha pfi: ‘Vhathu avha vha nkhulisa nga milomo, ngeno mbilu dzavho dzi kule na nṋe.
7 U ngwadamela havho ndi ha mahandana, ngauri vha funza ndaela dza vhathu.’
8 Ni pfuka mulayo wa Mudzimu na tevhela sialala ḽa vhathu.”
9 A dovha a amba navho a ri: “Ni nyadza mulayo wa Mudzimu u itela u tevhedza sialala ḽaṋu.
10 Sa tsumbo, Mushe o ri, ‘Hulisa khotsi au na mme au,’ nahone ‘A semaho khotsi awe kana mme awe nga a vhulahwe.’
11 Fhedzi inwi ni ri, ‘Ane a amba na khotsi awe kana mme awe a ri: “Tshithu tshiṅwe na tshiṅwe tshine nda vha natsho tshine nda nga ni ṋea ndi korobani (zwine zwa amba tshifhiwa tsho ṋekedzwaho Mudzimu),”’
12 A ni tsha tendela onoyo muthu a tshi itela khotsi awe kana mme awe tshithu na tshithihi.
13 Nga zwenezwo, no ita uri ipfi ḽa Mudzimu ḽi si vhe ḽa ndeme nga nṱhani ha sialala ḽaṋu ḽe na ḽi fhirisela kha vhaṅwe. Ni ita zwithu zwinzhi zwi fanaho na zwenezwi.”
14 A dovha a vhidza gogo a amba naḽo a ri: “Noṱhe nthetsheleseni, nahone ni ṱalukanye.
15 Muthu ha shatiwi dzitshika nga zwithu zwine zwa dzhena mulomoni wawe, fhedzi ndi zwine zwa bva kha muthu zwine zwa shata muthu dzitshika.”
16 * ——
17 A sia vhathu nnḓa a dzhena nḓuni, vhafunziwa vhawe vha thoma u mu vhudzisa nga ha tshifanyiso tshenetsho.
18 Yesu a amba navho a ri: “Naa na inwi a ni pfesesi u fana navho? Naa a ni zwi ḓivhi uri zwoṱhe zwi dzhenaho muthuni zwi tshi bva nnḓa a zwi koni u mu shata dzitshika,
19 samusi zwi sa yi mbiluni yawe, fhedzi zwi tshi ya malani, nahone zwa bva nga nḓila yazwo?” Ngauralo, a amba uri zwiḽiwa zwoṱhe zwo kuna.
20 A dovha a ri: “Zwine zwa bva kha muthu ndi zwone zwine zwa shata muthu dzitshika,
21 ngauri mbiluni ya muthu ndi hone hune ha bva mihumbulo mivhi, vhupombwe, vhuvhava, u vhulaha,
22 vhuṱonḓolo, vhupangwa, vhuvhi, vhufhura, u ḓifara nga nḓila i shonisaho, vivho, tsemano, u ḓikukumusa, na vhutsilu.
23 Zwenezwi zwithu zwoṱhe zwivhi zwi bva muthuni nahone ndi zwine zwa shata muthu dzitshika.”
24 A ṱuwa henefho a ya madzinguni a Tiro na Sidoni. A tshi swika henefho a dzhena nḓuni nahone a si ṱoḓe zwi tshi ḓivhiwa nga muthu, fhedzi vhathu vha zwi ḓivha.
25 Nga u ṱavhanya mufumakadzi we a vha e na ṅwananyana a re na muya muvhi a tshi pfa nga ha Yesu, a ḓa a gwadama milenzheni yawe.
26 Onoyo mufumakadzi o vha e Mugerika, wa lushaka lwa Sirofenike, nahone a mu humbela lunzhi-lunzhi uri a pandele dimoni ḽi re kha ṅwananyana wawe.
27 Fhedzi Yesu a amba nae a ri: “Litsha vhana vha fure u thoma, ngauri a zwo ngo tea u dzhia zwiḽiwa zwa vhana wa zwi posela zwibwanana.”
28 Naho zwo ralo, mufumakadzi a mu fhindula a ri: “Ndi zwone Muṋe wanga, na zwibwanana zwi re fhasi ha ṱafula zwi a ḽa matshakatshaka o wiswaho nga vhana.”
29 Yesu a amba nae a ri: “Nga nṱhani ha zwe wa amba, tshimbila; dimoni ḽo bva kha ṅwananyana wau.”
30 A ya hayani hawe a wana ṅwananyana wawe o eḓela mmbeteni, nahone dimoni ḽo ṱuwa.
31 Musi Yesu a tshi ṱuwa madzinguni a Tiro, u buḓekanya nga Sidoni tsini na Lwanzhe lwa Galilea a fhira nga madzinguni a miḓini ya fumi.*
32 Huno vha mu ḓisela muthu o dzingaho nḓevhe wa mbevhevhe, vha mu humbela uri a mu vhee zwanḓa.
33 Yesu a mu vhidzela thungo, a longa minwe yawe nḓevheni dza onoyo muthu, a pfa mare, a mu kwama lulimi.
34 A lavhelesa ṱaḓulu, a femuluwa a amba nae a ri: “Efata,” zwine zwa amba uri, “Nḓevhe dzau kha dzi vulee.”
35 Ngauralo, nḓevhe dzawe dza vulea, lulimi lwawe lwa vhofholowa, a thoma u amba zwavhuḓi.
36 Nga zwenezwo, a vha laya uri vha songo vhudza muthu, u amba nga u ralo ha tou vha u vha vhudza uri vha zwi anḓadze.
37 Vha kanuka zwihulu vha ri: “Zwoṱhe zwe a zwi ita ndi zwavhuḓi. U ita uri vho dzingaho nḓevhe vha dovhe vha pfe na vha sa koni u amba vha dovhe vha ambe.”
Ṱhaluso dzi re magumoni a siaṱari
^ Dikapoli.
