Marko 8:1-38
8 Misi iyo, ho dovha ha vha na gogo ḽihulu ḽe ḽa vha ḽi si na zwiḽiwa, ngauralo a vhidza vhafunziwa vhawe a amba navho a ri:
2 “Gogo iḽi ndi ḽi pfela vhuṱungu ngauri ho no fhela maḓuvha mararu ḽi na nṋe nahone a ḽi na zwiḽiwa.
3 Arali nda vha humisela mahayani avho vha songo ḽa, vha ḓo ṋoka nḓilani, nahone vhaṅwe vhavho vha bva kule.”
4 Fhedzi vhafunziwa vhawe vha mu fhindula vha ri: “Ndi ngafhi henefha sogani hune muthu a nga wana hone zwinkwa zwa u fusha vhenevha vhathu?”
5 A vha vhudzisa a ri: “Ni na zwinkwa zwingana?” Vha ri: “Zwa sumbe.”
6 Ngauralo, a vhudza gogo uri ḽi dzule fhasi. A dzhia zwinkwa zwa sumbe, a livhuha, a zwi ṅwatekanya, a zwi ṋea vhafunziwa vhawe uri vha zwi ṋee vhathu, vhafunziwa vhawe vha zwi ṋea gogo.
7 Vho vha vhe na khovhenyana dzi si gathi, musi o no livhuha, a vha vhudza uri vha vha ṋee dzone.
8 Vha ḽa vha fura, vha kuvhanganya matshakatshaka o salaho, a ḓadza zwirundu zwa sumbe.
9 Ho vha hu na vhanna vha ṱoḓaho u vha zwigidi zwiṋa. A vha litsha vha ṱuwa.
10 Nga u ṱavhanya a ṋamela tshikepe na vhafunziwa vhawe vha dzhena dzinguni ḽa Dalmanutha.
11 Ha ḓa Vhafarisei vha thoma u mu pikisa, vha tshi ṱoḓa uri a vha sumbedze tshiga tshi bvaho ṱaḓulu, uri vha mu linge.
12 Ngauralo, a ṱungufhala zwihulu a ri: “Ndi ngani murafho uyu u tshi ṱoḓa tshiga? Ngoho ndi a ni vhudza ndi ri: A hu na tshiga tshine tsha ḓo sumbedzwa wonoyu murafho.”
13 Nga zwenezwo, a vha ṱutshela, a dovha a ṋamela tshikepe, a wela seli.
14 Naho zwo ralo, vho vha vho hangwa u dzhia zwinkwa, fhedzi vhe na tshinkwa tshithihi tshikepeni.
15 A vha sevha a ri: “Ni dzule no tsha nahone ni thanyele mbiliso ya Vhafarisei na ya Herode.”
16 Nga zwenezwo, vha thoma u ṱaṱisana khani ngauri vho vha vhe si na zwinkwa.
17 Musi a tshi zwi ṱhogomela, a amba navho a ri: “Ndi ngani ni tshi ṱaṱa khani malugana na uri a ni na zwinkwa? Naa a ni athu ṱalukanya na ḓivha uri zwi amba mini? Naa mbilu dzaṋu a dzi athu pfesesa?
18 ‘Naho ni na maṱo, naa a ni vhoni, naho ni na nḓevhe, naa a ni pfi?’ Naa ni a zwi humbula
19 musi ndi tshi ṅwatela vhanna vha zwigidi zwiṱanu zwinkwa zwiṱanu? No ḓadza zwirundu zwingana nga matshakatshaka e na a dobela?” Vha mu fhindula vha ri: “Zwa fumi-mbili (12).”
20 “Musi ndi tshi ṅwatekanya zwinkwa zwa sumbe ndi tshi itela vhanna vha zwigidi zwiṋa, no ḓadza zwirundu zwingana nga matshakatshaka e na a dobela?” Vha mu fhindula vha ri: “Zwa sumbe.”
21 Nga zwenezwo, a amba navho a ri: “Naa a ni athu zwi ṱalukanya?”
22 Vha swika Betsaida. Henefho vhathu vha mu ḓisela munna o pofulaho, vha mu humbela uri a mu kwame.
23 A fara onoyo munna o pofulaho nga tshanḓa a bvela nae nnḓa ha muḓi. A mu pfela mare maṱoni, a vhea zwanḓa zwawe khae, a mu vhudzisa a ri: “Naa u khou vhona tshithu?”
24 Onoyo munna a lavhelesa a ri: “Ndi vhona vhathu, vha nga miri, ndi vhona vha tshi tshimbila.”
25 A dovha a vhea zwanḓa zwawe kha maṱo a uyo munna, onoyo munna a thoma u vhona zwavhuḓi tshiṅwe na tshiṅwe.
26 Ngauralo, a mu rumela hayani, a ri: “U songo dzhena muḓanani.”
27 Yesu na vhafunziwa vhawe vha ya miḓanani ya Kesarea Filipi, musi vhe nḓilani a thoma u vhudzisa vhafunziwa vhawe, a ri: “Vhathu vha ri ndi nṋe nnyi?”
28 Vha mu fhindula vha ri: “Vhathu vha ri ndi iwe Yohane Mulovhedzi; vhaṅwe vha ri ndi iwe Elia, ngeno vhaṅwe vha tshi ri u muṅwe wa vhaporofita.”
29 A vha vhudzisa a ri: “Inwi ni ri ndi nṋe nnyi?” Petro a fhindula a ri: “Ndi iwe Kristo.”
30 A vha laya o khwaṱhisa uri vha songo vhudza muthu nga hae.
31 A thoma u vha funza uri Murwa-muthu u tea u tambudzwa nga maanḓa na u landulwa nga vhahulwane na nga vhotshifhe vhahulu na vhamaṅwalo na u vhulahwa nahone a vuwa nga murahu ha maḓuvha mararu.
32 O amba mafhungo eneo a sa dzumbi na tshithihi. Fhedzi Petro a mu vhidzela thungo nahone a thoma u mu kaidza.
33 A rembuluwa a lavhelesa vhafunziwa vhawe, a kaidza Petro a ri: “Nṱutshele Sathane! Ngauri zwine wa humbula ndi zwa vhathu, a si zwa Mudzimu.”
34 A vhidza gogo khathihi na vhafunziwa vhawe a ri: “Arali muthu a tshi ṱoḓa u ntevhela, nga a ḓihangwe nahone a hwale danda ḽawe ḽa tshengedzo a ntevhele tshifhinga tshoṱhe.
35 Ngauri naho e nnyi ane a ṱoḓa u tshidza vhutshilo hawe u ḓo vhu lozwa, fhedzi naho e nnyi ane a lozwa vhutshilo hawe a tshi itela nṋe na mafhungo maḓifha u ḓo tshidzwa.
36 Ngauri muthu zwi ḓo mu vhuyedza ngani arali a tshi wana zwithu zwoṱhe shangoni, fhedzi a lovha?
37 Ndi mini tshine muthu a nga tshi bvisa uri a rengulule vhutshilo hawe?
38 Ngauri muthu ane a shona nṋe na pfunzo yanga kha uyu murafho u sa fulufhedzei kha Mudzimu* na wa vhuvhi, na Murwa-muthu u ḓo mu shona musi a tshi swika vhugalani ha Khotsi awe e na vharuṅwa vhakhethwa.”
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “wa vhupombwe.”
