Mateo 17:1-27
17 Nga murahu ha maḓuvha a rathi, Yesu a ṱuwa na Petro na Yakobo na Yohane murathu wawe, a gonya navho thavha ndapfu.
2 A shanduka phanḓa havho; tshifhaṱuwo tshawe tsha penya sa ḓuvha, nahone zwiambaro zwawe zwa nga nnḓa zwa tshena sa tshedza.
3 Vha vhona Mushe na Elia vha tshi khou amba na Yesu.
4 Petro a amba na Yesu a ri: “Murena, ndi zwavhuḓi ri fhano. Arali u tshi funa, ndi nga atha madennde mararu, ḽiṅwe ḽi ḓo vha ḽau, ḽiṅwe ḽa vha ḽa Mushe nahone ḽiṅwe ḽa vha ḽa Elia.”
5 Musi a tshi kha ḓi amba, gole ḽi penyaho ḽa vha tiba, ha pfala ipfi ḽi tshi bva kha gole ḽa ri: “Hoyu ndi Murwa wanga, a funwaho ane nda mu takalela; ni mu thetshelese.”
6 Musi vha tshi pfa zwenezwo, vhafunziwa vha wela fhasi nahone vha ofha zwihulu.
7 Yesu a ya khavho, nahone a vha kwama, a ri: “Takuwani, ni songo ofha.”
8 Musi vha tshi sedza, vha vhona Yesu e eṱhe.
9 Vha tshi khou tsa thavhani, Yesu a vha laya a ri: “Ni songo vhuya na vhudza muthu heḽi bono u swikela Murwa-muthu a tshi vuswa vhafuni.”
10 Naho zwo ralo, vhafunziwa vha mu vhudzisa vha ri: “Ndi ngani vhamaṅwalo vha tshi amba uri hu fanela u thoma ha ḓa Elia?”
11 A vha fhindula a ri: “Ndi ngoho uri Elia u khou ḓa nahone u ḓo vusulusa zwithu zwoṱhe.
12 Naho zwo ralo, ndi a ni vhudza uri Elia o no ḓi ḓa, nahone a vho ngo mu ḓivha, fhedzi vho mu ita zwine vha funa. Nga zwenezwo, na Murwa-muthu vha ḓo mu tambudza.”
13 Vhafunziwa vhawe vha zwi ṱhogomela uri u khou amba nga ha Yohane Mulovhedzi.
14 Musi vha tshi sendela tsini na gogo, muṅwe munna a ḓa kha Yesu, a gwadama phanḓa hawe a ri:
15 “Murena khathutshela murwa wanga ngauri u na vhulwadze ha tshifakhole, nahone u dzulela u wela muliloni na maḓini,
16 ndo mu isa ha vhafunziwa vhau, fhedzi vho kundwa u mu fhodza.”
17 Yesu a fhindula a ri: “Murafho uyu u si na lutendo na wo tshinyalaho, ndi ḓo vha na inwi u swika lini? Ndi ḓo ni konḓelela u swika lini? Mu ḓiseni ngeno kha nṋe.”
18 Yesu a pandela dimoni, nahone ḽa mbo ḓi bva khae, onoyo mutukana a mbo ḓi fhola nga tshenetsho tshifhinga.
19 Ndi hone vhafunziwa vha tshi vhidzela Yesu thungo vha ri: “Ndi ngani riṋe ro kundwa u ḽi pandela?”
20 A amba navho a ri: “Ndi nga nṱhani ha uri ni na lutendo luṱuku. Ngoho ndi a ni vhudza ndi ri: Arali ni na lutendo lu ngaho thoro ya luṋonya, no vha ni tshi nga amba na heyi thavha na ri, ‘Sudzulutshela ngei,’ ya sudzuluwa, nahone a hu na tshithu na tshithihi tshine tsha ḓo ni kunda.”
21 * ——
22 Musi e na vhafunziwa vhawe ngei Galilea, Yesu a amba navho a ri: “Murwa-muthu u ḓo kumedzwa zwanḓani zwa vhathu,
23 vha ḓo mu vhulaha, nahone a vuswa nga ḓuvha ḽa vhuraru.” Zwenezwo zwa vha pfisa vhuṱungu nga maanḓa.
24 Musi vha tshi swika Kapernaume, vhathelisi vha muthelo wa thembele* vha ḓa kha Petro vha ri: “Naa mufunzi waṋu u a bvisa muthelo wa thembele?”
25 A ri: “Ee.” Naho zwo ralo, musi Petro a tshi dzhena nḓuni, Yesu a amba nae a ri: “Simoni, iwe u ri mini? Mahosi a ḽifhasi a thelisa vhafhio muthelo? A thelisa vhakololo kana vhatsinda?”
26 Musi a tshi ri: “A thelisa vhatsinda,” Yesu a amba nae a ri: “Zwi amba uri vhakololo a vha theli.
27 Fhedzi uri ri si vha khukhulise, iya lwanzheni, u pose tshihuka, nahone khovhe ine wa ḓo thoma u i fasha u i dzhie, musi u tshi vula mulomo wayo, u ḓo wana tshelede ya tsimbi. U i dzhie nahone i ḓo vha muthelo wanga na wau.”
Ṱhaluso dzi re magumoni a siaṱari
^ Yeneyi ndimana i a wanala kha dziṅwe ṱhalutshedzelo dza Bivhili, fhedzi maṅwalo a Lugerika a Westcott na Hort, ane a tendelana na maṅwalwa manzhi a kale a Lugerika o bvisa yeneyi ndimana.
^ Ṱhalutshedzelo ya ipfi nga ipfi i ri “tshelede ya tsimbi ya dirakima mbili.”
