Mateo 18:1-35
18 Nga tshenetsho tshifhinga vhafunziwa vha ḓa vha amba na Yesu vha ri: “Ndi nnyi ane zwa vhukuma a vha muhulwanesa Muvhusoni wa ṱaḓulu?”
2 Ngauralo, a vhidza ṅwana, a mu imisa vhukati havho
3 a ri: “Ngoho ndi a ni vhudza ndi ri: Arali na sa shanduka na nga vhana, ni nga si vhuye na dzhena Muvhusoni wa ṱaḓulu.
4 Nga zwenezwo, naho e nnyi ane a ḓiṱukufhadza u fana na hoyu ṅwana ndi ene muhulwanesa Muvhusoni wa ṱaḓulu,
5 naho e nnyi ane a ṱanganedza ṅwana a ngaho uyu a tshi itela dzina ḽanga, u ṱanganedza na nṋe-vho.
6 Fhedzi naho e nnyi ane a khukhulisa muṅwe wa vhenevha vhana vhane vha vha na lutendo kha nṋe, ndi khwine a tshi vhofhelelwa guyo mukuloni wawe ḽi fanaho na ḽine ḽa phiguluswa nga mbongola nahone a poswe lwanzheni.
7 “Khombo shangoni nga nṱhani ha zwikhukhulisi! Hone-ha zwikhukhulisi zwi fanela u vha hone, fhedzi khombo muthu ane tshikhukhulisi tsha ḓa ngae!
8 Arali tshanḓa tshau kana mulenzhe wau u tshi u khakhisa, u tumule nahone u u laṱe kule; ndi khwine u wana vhutshilo wo holefhala kana u tshi khou ṱudza nṱhani ha uri u poswe muliloni u sa dzimiho lini na lini u na zwanḓa zwivhili kana milenzhe mivhili.
9 Zwiṅwe hafhu, arali ḽiṱo ḽau ḽi tshi u khakhisa, u ḽi nongole nahone u ḽi laṱe kule; ndi khwine u wana vhutshilo u na ḽiṱo ḽithihi nṱhani ha u poswa muliloni wa Gehena* u na maṱo mavhili.
10 Ni vhone uri ni si nyadze muṅwe wa vhenevha vhana, ngauri ndi a ni vhudza uri vharuṅwa vhavho vha re ṱaḓulu vhane vha vha ṱhogomela, vha dzula vha tshi vhona tshifhaṱuwo tsha Khotsi anga a re ṱaḓulu.
11 * ——
12 “Ni zwi vhona hani? Arali muṅwe muthu e na nngu dza ḓana iṅwe yadzo ya xela, naa a nga si ḓo sia dza fuṱahe-ṱahe (99) thavhani nahone a ya a ṱoḓa yo xelaho?
13 Arali a i wana, ngoho ndi a ni vhudza, u ḓo i takalela u fhira dziḽa dza fuṱahe-ṱahe dzi songo xelaho.
14 Nga hu fanaho, na Khotsi anga wa ṱaḓulu ha funi hu tshi lovha na muṅwe wa vhenevha vhana.
15 “Zwiṅwe hafhu, arali wahau a ita tshivhi, iya u mu sumbedze vhukhakhi hawe ni vhavhili fhedzi. Arali a u thetshelesa u ḓo vha wo thusa wahau.
16 Arali a sa thetshelesi, u vhuyelele khae u na muthu muthihi kana vhavhali uri mafhungo oṱhe a khwaṱhiswe nga u ambiwa nga milomo ya ṱhanzi mbili kana tharu.
17 Arali a sa vha thetshelesi, u ambe na tshivhidzo. Arali a sa thetshelesa tshivhidzo, u mu ite wa nnḓa nahone u mu dzhie sa muthelisi.
18 “Ngoho ndi a ni vhudza ndi ri: Zwiṅwe na zwiṅwe zwine na nga zwi vhofha kha ḽifhasi zwi ḓo vha zwo no ḓi vhofhiwa ngei ṱaḓulu, nahone zwiṅwe na zwiṅwe zwine na nga zwi vhofholola kha ḽifhasi zwi ḓo vha zwo no vhofhololwa ngei ṱaḓulu.
19 Zwiṅwe hafhu, ngoho ndi a ni vhudza ndi ri: Arali vhavhili kha inwi fhano kha ḽifhasi vha tendelana malugana na tshithu naho tshi tshifhio tsha ndeme tshine vha fanela u tshi humbela, vha ḓo ṋewa hu u itela Khotsi anga a re ngei ṱaḓulu.
20 Ngauri hune ha kuvhangana vhavhili kana vhararu nga dzina ḽanga, na nṋe ndi vhukati havho.”
21 Zwenezwo Petro a sendela a amba nae a ri: “Murena, musi wahashu a tshi nkhakhela ndi fanela u mu hangwela lungana? Naa ndi nga mu hangwela lwa sumbe?”
22 Yesu a mu fhindula a ri: “U songo mu hangwela lwa sumbe fhedzi, fhedzi u mu hangwele lwa fusumbe-sumbe (77).
23 “Ndi ngazwo ndi tshi ri Muvhuso wa ṱaḓulu u fana na khosi ye ya vha i tshi ṱoḓa u dzudzanya zwikolodo na vhalanda vhayo.
24 Musi i tshi thoma u zwi dzudzanya, ha ḓiswa we a vha a tshi khou mu koloda talente dza zwigidi zwa fumi.
25 Nge a vha a si na tsha u lifha ngatsho, muṋe wawe a ṋea ndaela ya uri a rengiswe khathihi na mufumakadzi wawe na vhana vhawe na zwoṱhe zwe a vha e nazwo uri a lifhe tshikolodo.
26 Nga zwenezwo, onoyo mulanda a wa nga magona a mu losha, a ri, ‘U songo mphelela mbilu, ndi ḓo lifha zwoṱhe zwine nda u koloda.’
27 Nge a mu pfela vhuṱungu, a litsha uḽa mulanda nahone a phumula uḽa mulandu.
28 Fhedzi onoyo mulanda a tshi bva henefho a ṱangana na mulanda ngae we a vha a tshi mu koloda dinari dza ḓana, a mu fara, a thoma u mu tzhipa, a ri, ‘Nndifhele zwoṱhe zwine wa nkoloda.’
29 Mulanda ngae a gwadama nga magona a mu luvhelela a ri, ‘U songo mphelela mbilu, ndi ḓo lifha zwoṱhe zwine nda u koloda.’
30 Naho zwo ralo, a hana, fhedzi a laedza uri a valelwe dzhele uri a vhuye a lifhe tshikolodo tshawe.
31 Musi vhalanda ngae vha tshi vhona zwe zwa itea, vha ṱungufhala zwihulu, vha ya vha vhudza muṋe wavho zwe zwa itea.
32 Muṋe wawe a mu vhidza a amba nae a ri: ‘Mulanda muvhi ndi iwe, ndo phumula zwikolodo zwau zwoṱhe musi u tshi nkhumbela.
33 Ndi ngani u songo khathutshela mulanda nga iwe samusi nṋe ndo u khathutshela?’
34 Muṋe wawe a sinyuwa nga maanḓa, a mu isa dzhele, uri a vhuye a lifhe tshikolodo tshawe.
35 Khotsi anga wa ṱaḓulu u ḓo ni ita zwi fanaho na zwenezwo arali ni sa hangweli wahaṋu zwi tshi bva mbiluni.”
Ṱhaluso dzi re magumoni a siaṱari
^ Ndi fhethu he ha vha hu tshi fhiswa mathukhwi nnḓa ha Yerusalema.
