Mateo 9:1-38
9 Nga zwenezwo, a ṋamela tshikepe, a wela seli a swika muḓini wa hawe.*
2 Vha mu ḓisela munna o omaho lurumbu o eḓela kha vhulalo. Yesu a tshi vhona lutendo lwavho, a amba na o omaho lurumbu a ri: “Takala, ṅwana’nga! Wo hangwelwa zwivhi zwau.”
3 Vhaṅwe vhamaṅwalo vha amba nga tshavho vha ri: “Hoyu munna u khou sema Mudzimu.”
4 Nge Yesu a ḓivha zwine vha khou zwi humbula, a ri: “Ndi ngani ni tshi khou humbula zwithu zwivhi mbiluni dzaṋu?
5 Sa tsumbo, ndi zwifhio zwine zwa leluwa, naa ndi uri, ‘Wo hangwelwa zwivhi zwau,’ kana ndi uri, ‘Takuwa u tshimbile’?
6 Naho zwo ralo, uri ni ḓivhe uri Murwa-muthu u na maanḓa kha ḽifhasi a u hangwela zwivhi—” a mbo ḓi amba na munna o omaho lurumbu a ri: “Takuwa u hwale vhulalo hau u ye hayani.”
7 A takuwa a ya hayani hawe.
8 Gogo ḽi tshi vhona zwenezwo ḽa dzhenwa nga nyofho, ḽa renda Mudzimu, we a ṋea vhathu maanḓa eneo.
9 Musi Yesu a tshi khou fhira nga henefho, a vhona muṅwe munna ane a pfi Mateo o dzula ofisini ya vhathelisi, a amba nae a ri: “Ivha mutevheli wanga.” A mbo ḓi takuwa a mu tevhela.
10 Musi o dzula nḓuni vha tshi khou ḽa, ha ḓa vhathelisi vhanzhi na vhaitazwivhi vha dzula na Yesu na vhafunziwa vhawe.
11 Musi Vhafarisei vha tshi vhona zwenezwo, vha thoma u amba na vhafunziwa vhawe vha ri: “Ndi ngani mufunzi waṋu a tshi ḽa na vhathelisi na vhaitazwivhi?”
12 A tshi pfa zwenezwo, a ri: “Vhathu vha re na mutakalo wavhuḓi a vha ṱoḓi ṅanga,* fhedzi ṅanga i ṱoḓwa nga vha lwalaho.
13 Nga zwenezwo, tshimbilani ni ye ni pfesese zwine zwenezwi zwa amba zwone: ‘Ndi ṱoḓa khathutshelo hu si tshiṱhavhelo.’ Ngauri a tho ngo ḓela u vhidza vhathu vho lugaho, fhedzi ndo ḓela u vhidza vhaitazwivhi.”
14 Vhafunziwa vha Yohane vha ḓa khae vha vhudzisa vha ri: “Ndi ngani riṋe na Vhafarisei ri tshi ḓidzima zwiḽiwa, fhedzi vhafunziwa vhau vha sa ḓidzimi zwiḽiwa?”
15 Yesu a amba navho a ri: “Naa khonani dza mukwasha dzi na tshiitisi tsha u lilela mukwasha a tshi kha ḓi vha navho? Fhedzi hu ḓo ḓa maḓuvha ane mukwasha a ḓo dzhiiwa khavho, ndi hone vha tshi ḓo ḓidzima zwiḽiwa.
16 A hu na ane a nga rungelela labi ḽiswa kha tshiambaro tsha nga nnḓa tsha kale, ngauri labi iḽo ḽiswa ḽi ḓo huma nahone buli ḽa mbo ḓi engedzea.
17 A hu na ane a nga shela waini ntswa kha mikhwama ya kale ya u shela waini.* Arali a ita nga u ralo, i ḓo balea waini ya tevhuwa. Fhedzi vhathu vha shela waini ntswa kha mikhwama miswa ya u shela waini, nahone zwoṱhe zwa vhulungea.”
18 Musi a tshi kha ḓi vha vhudza zwenezwo zwithu, ha ḓa muṅwe muvhusi a gwadama phanḓa hawe a ri: “Nga tshino tshifhinga ṅwananyana wanga u fanela u vha o no ḓi fa, fhedzi i ḓa u mu vhee tshanḓa uri a tshile.”
19 Yesu a takuwa a mbo ḓi mu tevhela; na vhafunziwa vhawe vha tevhela-vho.
20 Ha mbo ḓi ḓa muṅwe mufumakadzi we a vha o no fhedza miṅwaha ya fumi-mbili (12) o farwa nga vhulwadze ha u shuluwa malofha nahone a kwama lupendelo lwa tshiambaro tshawe tsha nga nnḓa,
21 ngauri o vha a tshi dzulela u amba uri: “Arali nda tou kwama fhedzi lupendelo lwa tshiambaro tshawe tsha nga nnḓa ndi ḓo fhola.”
22 Yesu a rembuluwa a mu vhona a ri: “Rudza mbilu ṅwana’nga! Lutendo lwau lwo u fhodza.” Nahone onoyo mufumakadzi a mbo ḓi fhola nga tshenetsho tshifhinga.
23 Musi a tshi swika nḓuni ya muvhusi a vhona vhalidzi vha dziṋanga na gogo ḽi tshi khou zhamba,
24 Yesu a ri: “Ibvani, ngauri ṅwananyana ho ngo fa, fhedzi o tou eḓela.” Musi vha tshi pfa zwenezwo vha thoma u mu sea vha tshi khou mu holedza.
25 Musi o no bvisela gogo nnḓa, a dzhena nḓuni a fara tshanḓa tsha ṅwananyana, ṅwananyana a vuwa.
26 Zwe Yesu a zwi ita zwa phaḓalala dzinguni ḽeneḽo ḽoṱhe.
27 Musi Yesu a tshi khou fhira henefho, vhanna vhavhili vho pofulaho vha mu tevhela, vha tshi vhidzelela vha tshi ri: “Ri khathutshele Murwa wa Davida.”
28 Musi o no dzhena kha iṅwe nnḓu, vhanna vho pofulaho vha ḓa khae, nahone Yesu a vha vhudzisa a ri: “Naa ni na lutendo lwa uri ndi nga ni bonyolosa?” Vhone vha fhindula vha ri: “Ee, Murena.”
29 A kwama maṱo avho, a ri: “Nga hu itee zwine na zwi tenda.”
30 Maṱo avho a bonyolowa. Yesu a vha laya nga ho khwaṱhaho a ri: “Ni songo vhudza muthu.”
31 Musi vha tshi bvela nnḓa, vha vhudza muṅwe na muṅwe kha dzingu ḽeneḽo ḽoṱhe nga ha zwe zwa itea khavho.
32 Musi vhenevho vhanna vha tshi kha ḓi tou bva u ṱuwa, vhathu vha ḓisa munna we a vha a sa koni u amba we a vha e na dimoni,
33 musi dimoni ḽo no pandelwa, munna we a vha a sa koni u amba a thoma u amba. Vhathu vha kanuka vhukuma, vha ri: “A ri athu vhuya ra vhona zwithu zwi ngaho izwi kha ḽa Isiraele.”
34 Fhedzi Vhafarisei vha ri: “U pandela madimoni nga maanḓa a muvhusi wa madimoni.”
35 Yesu a fara lwendo a ya miḓini na miḓanani yoṱhe, a funza sinagogoni dzavho na u huwelela mafhungo maḓifha a Muvhuso na u fhodza malwadze oṱhe na maṱungu oṱhe.
36 Musi a tshi vhona gogo a ḽi pfela vhuṱungu, ngauri ḽo vha ḽo vhaisala na u kulea nungo sa nngu dzi si na mulisa.
37 Ndi hone a tshi vhudza vhafunziwa vhawe a ri: “Khaṋo ndi khulu, fhedzi vhashumi a si vhanzhi.
38 Ngauralo, humbelani Muṋe wa khaṋo uri a rumele vhashumi khaṋoni yawe.”
Ṱhaluso dzi re magumoni a siaṱari
^ Betlehema.
^ Dokotela.
^ Ndi mukhwama wo itwaho nga mukumba wa tshipuka.
