Nzumbululo 1:1-20
1 Nzumbululo nga Yesu Kristo, ye Mudzimu a mu ṋea, uri a sumbedze vhalanda vhawe zwithu zwe zwa vha zwi tshi fanela u itea hu si kale. O ruma muruṅwa wawe uri a i sumbedze Yohane mulanda wawe nga zwiga,
2 we a ṱanziela ipfi ḽe a ṋewa nga Mudzimu na vhuṱanzi he Yesu Kristo a vhu ṋea, na u ṱanziela nga zwithu zwoṱhe zwe a zwi vhona.
3 Hu takala ane a vhalela nṱha na vhane vha pfa maipfi a honovhu vhuporofita, na vhane vha tevhedza zwo ṅwalwaho khaho; ngauri tshifhinga tsho vhewaho tshi tsini.
4 Nṋe Yohane ndi ṅwalela zwivhidzo zwa sumbe zwi re tshiṱirikini tsha Asia ndi ri:
Vhuthu vhuhulu na mulalo zwi bvaho “Kha Ane a vha hone, we a vha e hone na ane a khou ḓa,” na kha mimuya ya sumbe i re phanḓa ha khuluṋoni yawe,
5 na kha Yesu Kristo, “Ṱhanzi i Fulufhedzeaho,” “Ene tanzhe ḽa vho vuswaho vhafuni,” na “Muvhusi wa mahosi a ḽifhasi” nga zwi vhe na inwi.
Kha ane a ri funa na we a ri vhofholola zwivhini zwashu nga malofha awe—
6 a ri ita uri ri vhe muvhuso, vhotshifhe vha Mudzimu wawe a re Khotsi awe—vhugala na maanḓa nga zwi vhe zwawe lini na lini. Amen.
7 U khou ḓa e kha makole, vhathu vhoṱhe vha ḓo mu vhona, khathihi na vhe vha mu ṱhavha; huno tshaka dzoṱhe dzi re kha ḽifhasi dzi ḓo lila nga nṱhani hawe. Amen.
8 Yehova Mudzimu u ri: “Ndi nṋe Alfa na Omega, Ane a vha hone, we a vha e hone na ane a khou ḓa, Ramaanḓaoṱhe.”
9 Nṋe Yohane, wahaṋu na we a vha na mukovhe na inwi maṱunguni na muvhusoni na kha u konḓelela khathihi na Yesu, ndo vha ndi tshiṱangadzimeni tsha Patimo nge nda amba nga ha Mudzimu na u ṱanziela nga ha Yesu.
10 Ndo ḓadzwa muya mukhethwa nga ḓuvha ḽa Murena, murahu hanga nda pfa ipfi ḽihulu ḽi ngaho phalaphala,
11 ḽi tshi ri: “Zwine wa zwi vhona u zwi ṅwale kha mupombo, u zwi rumele kha zwivhidzo zwa sumbe, zwa ngei Efesa, Simirina, Peregamo, Thiathira, Saradesi, Filadelefia na Laodikea.”
12 Huno nda rembuluwa uri ndi vhone we a vha a tshi khou amba na nṋe, musi ndo no rembuluwa, nda vhona zwiṱomambone zwa sumbe zwa musuku,
13 vhukati ha zwenezwo zwiṱomambone nda vhona we a vha a tshi nga murwa-muthu, o ambara tshiambaro tsho lapfaho u swika milenzheni, o ḓivhofha khana nga labi ḽa musuku.
14 Zwiṅwe hafhu, mavhudzi a ṱhohoni yawe o vha e matshena sa muḓali mutshena, sa mahaḓa, huno maṱo awe o vha a tshi nga khavhu ya mulilo;
15 milenzhe yawe i tshi nga tsimbi-tswuku musi i tshi khou penya i ṋanḓoni; ipfi ḽawe ḽo vha ḽi tshi nga muungo wa maḓi manzhi.
16 Kha tshanḓa tshawe tsha u ḽa o vha o fara ṋaledzi dza sumbe, mulomoni wawe ho vha hu tshi khou bva banga ḽilapfu ḽi re na vhuhali, ḽa mutshea-hoṱhe, tshifhaṱuwo tshawe tsho vha tshi tshi nga ḓuvha ḽine ḽa penya vhukuma.
17 Musi ndi tshi mu vhona, nda wela milenzheni yawe nda nga mufu.
Hone a vhea tshanḓa tshawe tsha u ḽa kha nṋe a ri: “U songo ofha. Ndi nṋe wa u Thoma na wa u Fhedza,
18 na a tshilaho; ndo vha ndo fa, fhedzi vhona! Ndi khou tshila lwa tshoṱhe, ndi na khoṋo dza lufu na dza Vhudzulavhafu.*
19 Ngauralo, ṅwala zwithu zwe wa zwi vhona, na zwithu zwine zwa khou itea na zwine zwa ḓo itea nga murahu ha zwenezwi.
20 Tshiphiri tshikhethwa tsha ṋaledzi dza sumbe dze wa dzi vhona kha tshanḓa tshanga tsha u ḽa, na zwiṱomambone zwa sumbe zwa musuku ndi hetshi: Ṋaledzi dza sumbe dzi imela vharuṅwa vha zwivhidzo zwa sumbe, nahone zwiṱomambone zwa sumbe zwi imela zwivhidzo zwa sumbe.
Ṱhaluso dzi re magumoni a siaṱari
^ Nga Lugerika ndi haiʹdes. Sedzani Ṱhumetshedzo 7.
