Nzumbululo 11:1-19
11 Nda ṋewa luṱanga lune lwa nga lubaḓa nahone ha pfi: “Takuwa u ele thembele ya nnḓu khethwa ya Mudzimu na aletare na vhane vha rabela khayo.
2 Fhedzi muṱa u re nnḓa ha thembele ya nnḓu khethwa, u songo u ela, ngauri wo ṋewa vha dzitshaka, nahone vha ḓo kandekanya muḓi mukhethwa lwa miṅwedzi ya fuiṋa-mbili (42).
3 Huno ndi ḓo ita uri ṱhanzi dzanga mbili dzi porofite maḓuvha a 1 260 dzo ambara madzanganda.”
4 Dzenedzi ṱhanzi dzi fanyiselwa nga miṱwari mivhili na zwiṱomambone zwivhili, nahone dzo ima phanḓa ha Murena wa ḽifhasi.
5 Arali muthu a tshi ṱoḓa u dzi huvhadza, mulilo u a bva mulomoni wadzo nahone wa fhisa maswina adzo. Arali muthu a tshi nga ṱoḓa u dzi huvhadza, u fanela u vhulahwa nga yeneyo nḓila.
6 Dzi na maanḓa a u vala ḽiṱaḓulu uri mvula i si ne nga maḓuvha a musi dzi tshi khou porofita, dzi na maanḓa a u shandukisa maḓi uri a vhe malofha na u rwa ḽifhasi nga mufuda naho u ufhio wa ṱhamu nga u funa hadzo.
7 Musi dzo no fhedza u ṱanziela, ḽivhanda ḽi bvaho mugodini ḽi ḓo lwa nadzo, ḽa dzi kunda nahone ḽa dzi vhulaha.
8 Zwitumbu zwadzo zwi ḓo vha zwi nḓilani khulwane ya muḓi muhulu une nga lwa muya u vhidzwa Sodoma na Egipita, he Murena wavho na ene a ombelwa hone kha danda.
9 Vhathu vha mirafho na ndimi na dzitshaka vha ḓo lavhelesa zwitumbu zwa dzenedzo ṱhanzi lwa maḓuvha mararu na hafu, huno vha si tende uri zwitumbu zwadzo zwi vhulungwe vhiḓani.
10 Nahone vho dzulaho kha ḽifhasi vha a takala na u pembela nga nṱhani ha u fa hadzo, nahone vha ḓo rumelana zwifhiwa, ngauri vhenevha vhaporofita vhavhili vho vha vha tshi tambudza vho dzulaho kha ḽifhasi.
11 Nga murahu ha maḓuvha mararu na hafu muya wa vhutshilo u bvaho ha Mudzimu wa dzhena khadzo, dza takuwa dza ima, vhoṱhe vhe vha dzi vhona vha dzhenwa nga nyofho khulu.
12 Dza pfa ipfi ḽihulu ḽi tshi bva ṱaḓulu ḽi tshi ri: “Gonyani ngeno.” Nahone dza gonya dza ya ṱaḓulu dzi kha gole, maswina adzo a tshi zwi vhona.
13 Nga tshenetsho tshifhinga ha vha na mudzinginyo muhulu, tshipiḓa tshithihi kha zwa fumi tsha muḓi tsha wa; vhathu vha zwigidi zwa sumbe vha vhulahwa nga mudzinginyo, vho salaho vha ofha nahone vha renda Mudzimu wa ṱaḓulu.
14 Khombo ya vhuvhili yo fhira. Huno khombo ya vhuraru i khou ḓa nga u ṱavhanya.
15 Muruṅwa wa vhusumbe a lidza phalaphala yawe. Ha pfala maipfi mahulu ngei ṱaḓulu a tshi ri: “Muvhuso wa shango wo no vha muvhuso wa Murena washu na Muḓodzwa* wawe, huno u ḓo vhusa sa khosi lini na lini.”
16 Vhahulwane vha fumbili-iṋa (24) vhe vha vha vho dzula kha khuluṋoni dzavho phanḓa ha Mudzimu vha gwadama vha rabela Mudzimu,
17 vha ri: “Ri a u livhuha, Yehova Mudzimu, Ramaanḓaoṱhe, A re hone na we a vha e hone, ngauri wo dzhia maanḓa au mahulu nahone wa thoma u vhusa sa khosi.
18 Fhedzi tshaka dza sinyuwa, wa sumbedza mbiti dzau, tshifhinga tsho vhewaho tsho swika tsha uri vhafu vha haṱulwe, na tsha uri u ṋee vhalanda vhau vha vhaporofita malamba, khathihi na vhakhethwa na vhane vha ofha dzina ḽau, vhaṱuku na vhahulwane, na u lozwa vha tshinyadzaho ḽifhasi.”
19 Huno thembele ya nnḓu khethwa ya Mudzimu i re ṱaḓulu ya vulea, mbulungelo ya mulanga ya vhonala i thembeleni ya nnḓu khethwa. Huno ho vha hu na dziphenyo na maipfi na mibvumo na mudzinginyo na tshifhango tshihulu.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “Kristo.”
