Nzumbululo 12:1-17
12 Ha vhonala bono ḽihulu ngei ṱaḓulu, mufumakadzi o vha o ambara ḓuvha, ṅwedzi u nga fhasi ha milenzhe yawe, ṱhohoni yawe ho vha hu na khare ya ṋaledzi dza fumi-mbili (12),
2 nahone o vha o vhifha muvhilini. A ṱavha mukosi musi a tshi pfa vhuṱungu ha u ṱoḓa u beba.
3 Ha dovha ha vhonala ḽiṅwe bono ngei ṱaḓulu. Ho vha hu na ḽigweṋa ḽihulu ḽo tswukaho sa mulilo, ḽi na ṱhoho dza sumbe na ṋanga dza fumi nahone kha ṱhoho yaḽo ḽo ambara khare dza sumbe;
4 mutshila waḽo wa kokodza tshipiḓa tshithihi kha zwiraru tsha ṋaledzi dza ṱaḓulu, wa dzi wisela kha ḽifhasi. Ḽigweṋa ḽa ima phanḓa ha onoyo mufumakadzi we a vha e tsini na u beba, uri musi a tshi vhofholowa , ḽi mbo ḓi mila ṅwana wawe.
5 Onoyo mufumakadzi a beba murwa, ṅwana wa mutukana, ane a ḓo lisa tshaka dzoṱhe nga lubaḓa lwa tsimbi. Ṅwana wawe a iswa ha Mudzimu kha khuluṋoni yawe.
6 Mufumakadzi a shavhela sogani, fhethu he a vha o lugiselelwa hone nga Mudzimu, o vha a tshi ḓo ṋewa zwiḽiwa maḓuvha a 1 260.
7 Ha vuwa nndwa ngei ṱaḓulu: Mikaele na vharuṅwa vhawe vha lwa na ḽiḽa ḽigweṋa, huno ḽigweṋa na vharuṅwa vhaḽo vha lwa
8 fhedzi vha kundwa, vha si tsha wana fhethu ha u dzula ngei ṱaḓulu.
9 Ngauralo, ḽigweṋa ḽihulu ḽa poswa fhasi, ḽiṋowa ḽa kale na kale, ḽine ḽa vhidzwa u pfi Diabolo na Sathane, ḽine ḽa khou xedza ḽifhasi ḽoṱhe; ḽo poswa kha ḽifhasi, na vharuṅwa vhaḽo vha poswa kha ḽifhasi naḽo.
10 Nda pfa ipfi ḽihulu ḽi tshi bva ṱaḓulu ḽi tshi ri:
“Zwa zwino ho swika tshifhinga tsha u tshidza na maanḓa a muvhuso wa Mudzimu washu na maanḓa a Muḓodzwa* wawe, ngauri mupomoki wa vhahashu, we a vha a tshi vha pomoka vhusiku na masiari phanḓa ha Mudzimu washu, o poswa fhasi!
11 Vho mu kunda nga malofha a Ngwana na nga mulaedza we vha u ṱanziela, nahone vho vha vho ḓiimisela u fa.
12 Nga nṱhani ha zwenezwo, takalani inwi maṱaḓulu na vho dzulaho khao! Khombo kha ḽifhasi na kha lwanzhe, ngauri Diabolo o tsela henengeo kha inwi e na mbiti khulu, a tshi ḓivha uri o salelwa nga tshifhinga tshiṱuku.”
13 Musi ḽigweṋa ḽi tshi vhona uri ḽo poswa kha ḽifhasi, ḽa tovhola mufumakadzi we a beba ṅwana wa mutukana.
14 Fhedzi onoyo mufumakadzi a ṋewa phapha mbili dza goni ḽihulu, uri a fhufhele fhethu hawe sogani, hune a ḓo ṋewa zwiḽiwa lwa tshifhinga na zwifhinga na hafu ya tshifhinga* e kule na ḽiṋowa.
15 Ḽiṋowa ḽa ṱanza maḓi ane a nga mulambo a tshi bva mulomoni a tevhela onoyo mufumakadzi, uri a kumbiwe nga mulambo wonoyo.
16 Fhedzi ḽifhasi ḽa thusa onoyo mufumakadzi, ḽa vula mulomo waḽo ḽa nwa eneo maḓi ane a nga mulambo e a ṱanziwa nga ḽigweṋa.
17 Ḽigweṋa ḽa sinyutshela mufumakadzi, ḽa ṱuwa ḽa ya ḽa lwa na vho salaho vha mbeu yawe vhane vha tevhedza ndaela dza Mudzimu na vhane vha vha na mushumo wa u ṱanziela nga ha Yesu.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “Kristo.”
^ Ndi uri zwifhinga zwiraru na hafu.
