Nzumbululo 13:1-18
13 Ḽigweṋa ḽa ima kha muṱavha wa lwanzhe ḽi sa dzinginyei.
Nda vhona ḽivhanda ḽi tshi bva lwanzheni, ḽi na ṋanga dza fumi na ṱhoho dza sumbe, kha ṋanga dzaḽo ho vha hu na khare dza fumi, fhedzi kha ṱhoho dzaḽo ho vha hu na madzina ane a sema Mudzimu.
2 Huno ḽivhanda ḽe nda ḽi vhona ḽo vha ḽi tshi fana na nngwe, fhedzi milenzhe yaḽo i tshi fana na ya tshivhingwi, mulomo waḽo u tshi fana na wa ndau. Ḽigweṋa ḽa ṋea ḽivhanda nungo dzaḽo na khuluṋoni yaḽo na maanḓa mahulu.
3 Nda vhona iṅwe ya ṱhoho dzaḽo yo ṱhavhiwa lu isaho lufuni, fhedzi yeneyo mbonzhe i isaho lufuni ya fhola, nahone ḽifhasi ḽoṱhe ḽa tevhela ḽivhanda nga u ḽi takalela vhukuma.
4 Vha rabela ḽigweṋa ngauri ḽo ṋea ḽivhanda maanḓa aḽo, vha rabela ḽivhanda vha ri: “Ndi nnyi ane a nga ḽivhanda, nahone ndi nnyi ane a nga lwa naḽo?”
5 Ḽigweṋa ḽa ṋea ḽivhanda mulomo wa uri ḽi ambe zwithu zwa u ḓikukumusa na u semana, nahone ḽa ṋewa maanḓa a u vhusa miṅwedzi ya fuiṋa-mbili (42).
6 Ḽa aṱama mulomo waḽo ḽa sema Mudzimu, na dzina ḽawe na hune a dzula hone, na vhane vha dzula ṱaḓulu.
7 Ḽa tendelwa u lwa na vhakhethwa, ḽa vha kunda, ḽa ṋewa maanḓa a u vhusa mirafho yoṱhe na vhathu vhoṱhe na ndimi dzoṱhe na tshaka dzoṱhe.
8 Vhoṱhe vho dzulaho kha ḽifhasi vha ḓo ḽi rabela. U bva tshee shango ḽa sikwa, a hu athu vhuya ha vha na dzina na ḽithihi ḽavho ḽo ṅwalwaho kha mupombo wa vhutshilo wa Ngwana yo vhulahwaho.
9 A re na nḓevhe nga a pfe.
10 Arali muthu o tewa nga u thubwa, u ḓo ya vhuthubwani. Arali muthu a vhulaha nga banga, u ḓo vhulahwa nga banga. Zwenezwi zwi ḓo ṱoḓa uri vhakhethwa vha konḓelele na u vha na lutendo.
11 Nda vhona ḽiṅwe ḽivhanda ḽi tshi bva kha ḽifhasi, ḽo vha ḽi na ṋanga mbili dzi ngaho dza ngwana, huno ḽa thoma u amba sa ḽigweṋa.
12 Ḽa shumisa maanḓa oṱhe a ḽivhanda ḽa u thoma, ḽivhanda ḽa u thoma ḽo lavhelesa. Ḽa ita uri ḽifhasi na vho dzulaho khaḽo vha rabele ḽivhanda ḽa u thoma, ḽe mbonzhe yaḽo i isaho lufuni ya fhola.
13 Ḽa ita maḓembe mahulu, ḽa ita uri mulilo u we u tshi bva ṱaḓulu u wele kha ḽifhasi vhathu vha tshi zwi vhona.
14 Ḽa xedza vho dzulaho kha ḽifhasi nga maḓembe e ḽa tendelwa u a ita ḽivhanda ḽi tshi khou zwi vhona, musi ḽi tshi khou vhudza vho dzulaho kha ḽifhasi uri vha itele tshifanyiso ḽivhanda ḽe mbonzhe yaḽo i isaho lufuni ya fhola.
15 Ḽo tendelwa u vhudzulela mufemo kha tshifanyiso tsha ḽivhanda, uri tshenetsho tshifanyiso tsha ḽivhanda tshi kone u amba na u ita uri hu vhulahwe vhoṱhe vhe vha hana u rabela tshifanyiso tsha ḽivhanda.
16 Nahone ḽi kombetshedza vhathu vhoṱhe, vhaṱuku na vhahulwane, vhapfumi na vhashai, vho vhofholowaho na vhalanda, uri vha swaiwe kha tshanḓa tsha u ḽa kana kha phanḓa dzavho,
17 uri hu si vhe na ane a renga kana u rengisa nga nnḓa ha muthu a re na luswayo, dzina ḽa ḽivhanda kana nomboro ine ya tshimbidzana na dzina ḽaḽo.
18 Zwenezwi zwi ṱoḓa vhuṱali: A re na ṱhalukanyo nga a vhale nomboro dza ḽivhanda, ngauri ndi nomboro ya muthu; nahone nomboro ya hone ndi 666.
