Nzumbululo 14:1-20
14 Nda lavhelesa, nda vhona Ngwana yo ima Thavhani ya Tsioni, i na vha 144 000 vhe vha ṅwalwa dzina ḽayo na dzina ḽa Khotsi ayo kha phanḓa dzavho.
2 Huno nda pfa ipfi ḽi tshi bva ṱaḓulu ḽi tshi nga muungo wa maḓi manzhi, ḽi tshi nga mubvumo muhulu; ipfi ḽe nda ḽi pfa ḽo vha ḽi tshi nga ḽa vhaimbi vhane vha khou lidza zwihwana zwavho.
3 Vho vha vha tshi khou imba zwine zwa pfala zwi tshi nga ndi luimbo luswa vhe phanḓa ha khuluṋoni na phanḓa ha zwivhumbwa zwiṋa zwi tshilaho na vhahulwane; nahone ho vha hu si na we a vha a tshi nga kona u guda lwonolwo luimbo nga nnḓa ha vha 144 000, vho rengwaho kha ḽifhasi.
4 Vhenevha ndi vhe vha si ḓishate tshika nga vhafumakadzi; zwi re zwone ndi uri, vho kuna.* Vhenevha ndi vhane vha dzula vha tshi tevhela Ngwana huṅwe na huṅwe hune ya ya hone. Vhenevho vho rengululwa kha vhathu uri vha vhe zwiranzhe zwa Mudzimu na zwa Ngwana,
5 nahone a ho ngo wanala mazwifhi milomoni yavho; a vha solei.
6 Nda vhona muṅwe muruṅwa a tshi khou fhufha a tshi buḓekanya ḽiṱaḓulu, e na mafhungo maḓifha a lini na lini ane a fanela u a ḓivhadza vhane vha dzula kha ḽifhasi, kha tshaka dzoṱhe, mirafho yoṱhe, na ndimi dzoṱhe na vhathu vhoṱhe,
7 a amba nga ipfi ḽihulu a ri: “Ofhani Mudzimu ni mu ṋee vhugala, ngauri tshifhinga tsha khaṱulo yawe tsho swika, rabelani we a sika ḽiṱaḓulu na ḽifhasi na lwanzhe na zwisima zwa maḓi.”
8 Muṅwe muruṅwa wa vhuvhili a tevhela, a ri: “Ḽo wa! Ḽo wa Babele Ḽihulu, ḽe ḽa ita uri tshaka dzoṱhe dzi nwe waini ya nyemulo ya vhupombwe haḽo!”
9 Muṅwe muruṅwa wa vhuraru a tevhela vhaḽa vhavhili, a amba nga ipfi ḽihulu a ri: “Arali muthu a tshi rabela ḽivhanda na tshifanyiso tshaḽo, a ṱanganedza luswayo kha phanḓa yawe kana kha tshanḓa tshawe,
10 na ene u ḓo nwa waini i songo dzimulwaho ya mbiti dza Mudzimu ine ya shelwa kha tshinwelo tsha mbiti dzawe, u ḓo tambudzwa nga mulilo na tsevhela e phanḓa ha vharuṅwa vhakhethwa na phanḓa ha Ngwana.
11 Huno vhutsi ha u tambudzwa havho vhu duba lini na lini, a vha nga aweli vhusiku na masiari, vhenevho vhane vha rabela ḽivhanda na tshifanyiso tshaḽo, na muṅwe na muṅwe ane a ṱanganedza luswayo lwa dzina ḽaḽo.
12 Henefha ndi hune ha ṱoḓea uri vhakhethwa vhane vha tevhedza ndaela dza Mudzimu na u vha na lutendo kha Yesu vha konḓelele.”
13 Nda pfa ipfi ḽi bvaho ṱaḓulu ḽi tshi ri: “Ṅwala uri: Vha a takala vhane u bva zwino vha fa vhe na vhuthihi na Murena. Muya wa ri, ee, kha vha awele kha u shuma havho nga u ḓinetisa, ngauri zwithu zwe vha zwi ita zwi ḓo vha tevhela.”
14 Nda lavhelesa, nda vhona gole ḽitshena, we a vha o dzula kha gole o vha a tshi nga murwa-muthu, ṱhohoni yawe o ambara khare ya musuku o fara segere ya vhuhali.
15 Ha bva muṅwe muruṅwa thembeleni,* a tshi khou vhidzelela nga ipfi ḽihulu o dzula kha gole a tshi ri: “Dzhia segere yau u kaṋe, ngauri tshifhinga tsha u kaṋa tsho swika, khaṋo ya ḽifhasi yo vhibva zwavhuḓi.”
16 O dzulaho kha gole a posa segere yawe kha ḽifhasi nahone ḽifhasi ḽa kaṋiwa.
17 Ha dovha ha bva muṅwe muruṅwa thembeleni ine ya vha ṱaḓulu; na ene o vha e na segere ya vhuhali.
18 Muṅwe muruṅwa a dovha a bva aletareni, e na maanḓa a u vhusa mulilo. A vhidzelela nga ipfi ḽihulu uḽa we a vha e na segere ya vhuhali, a ri: “Dzhia segere yau ya vhuhali u kuvhanganye zwiṱokola zwa munḓirivhe wa ḽifhasi, ngauri nḓirivhe dzawo dzo vhibva.”
19 Muruṅwa a posa segere yawe a kuvhanganya nḓirivhe dza ḽifhasi, a dzi posa bonḓeloni ḽa waini ḽa mbiti dza Mudzimu.
20 Bonḓelo ḽa waini ḽa sukekanywa nnḓa ha muḓi, ha shuluwa malofha khaḽo a guma nga mihala ya dzibere, a elela khilomithara dzi ṱoḓaho u vha 296.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “ndi vhathu vha sa athu ita zwa vhudzekani.”
^ Fhethu Hukhethwa-khethwa ha thembele.
