Nzumbululo 15:1-8
15 Nda vhona ḽiṅwe bono ḽihulu ngei ṱaḓulu ḽi mangadzaho, ho vha hu vharuṅwa vha sumbe vho fara ṱhamu dza sumbe. Dzenedzo ṱhamu dzo vha dzi dza u fhedzisela, ngauri mbiti dza Mudzimu dzi ḓo khunyeledzwa ngadzo.
2 Nda vhona zwine zwa nga lwanzhe lune lwa nga ngilasi lwo ṱangana na mulilo, na vhe vha kunda ḽivhanda na tshifanyiso tshaḽo na nomboro ine ya tshimbidzana na dzina ḽaḽo. Vho vha vho ima tsini na lwanzhe lu ngaho ngilasi, vho fara zwihwana zwa Mudzimu.
3 Vho vha vha tshi khou imba luimbo lwa Mushe mulanda wa Mudzimu na lwa Ngwana, vha tshi ri:
“Mishumo yau ndi mihulu, i a mangadza, iwe Yehova Mudzimu, Ramaanḓaoṱhe. Nḓila dzau dzo luga nahone ndi dza ngoho, iwe Khosi ya lini na lini.
4 Yehova, ndi nnyi ane zwa vhukuma a nga si u ofhe na u renda dzina ḽau, ngauri ndi iwe u woṱhe ane a fulufhedzea? Tshaka dzoṱhe dzi ḓo ḓa dza u rabela, ngauri ndaela dzau dzo lugaho dzo dzumbululwa.”
5 Nga murahu ha zwenezwi zwithu, nda vhona nnḓu khethwa ya dennde ḽa vhuṱanzi i tshi vulea ngei ṱaḓulu,
6 nahone vharuṅwa vha sumbe vho vha vho fara ṱhamu dza sumbe vha tshi bva nḓuni khethwa, vho ambara zwiambaro zwo kunaho, zwi penyaho, vho ḓivhofha khana nga labi ḽa musuku.
7 Nahone tshiṅwe tsha zwivhumbwa zwiṋa zwi tshilaho tsha ṋea muruṅwa wa vhusumbe mudzio wa musuku we wa vha wo ḓala mbiti dza Mudzimu a tshilaho lini na lini.
8 Huno nnḓu khethwa ya ḓala nga vhutsi nga nṱhani ha vhugala ha Mudzimu na nga maanḓa awe, nahone a hu na muthu we a kona u dzhena nḓuni khethwa u swikela ṱhamu dza sumbe dza vharuṅwa vha sumbe dzi tshi khunyelela.
