Nzumbululo 16:1-21
16 Nda pfa ipfi ḽihulu ḽi bvaho nḓuni khethwa ḽi tshi amba na vharuṅwa vha sumbe ḽi tshi ri: “Iyani ni tevhule midzio ya sumbe ya mbiti dza Mudzimu kha ḽifhasi.”
2 Muruṅwa wa u thoma a ya a tevhulela mudzio wawe kha ḽifhasi. Vhathu vhe vha vha vhe na luswayo lwa ḽivhanda na vhe vha vha vha tshi rabela tshifanyiso tshaḽo vha bva zwilonda zwi vhavhaho vhukuma.
3 Wa vhuvhili a tevhulela mudzio wawe lwanzheni. Lwa shanduka lwa nga malofha a muthu o faho, na zwithu zwoṱhe zwi tshilaho zwi re lwanzheni zwa fa.
4 Wa vhuraru a tevhulela mudzio wawe milamboni na zwisimani zwa maḓi. Nahone zwa vha malofha.
5 Nda pfa muruṅwa a vhusaho maḓi a tshi ri: “Iwe Ane a vha hone na we a vha e hone, A fulufhedzeaho, wo luga, ngauri wo haṱula nga yeneyo nḓila,
6 nga nṱhani ha uri vho shulula malofha a vhakhethwa na a vhaporofita, huno wo vha ṋea malofha uri vha a nwe; ndi zwo vha teaho.”
7 Nda pfa ipfi ḽi bvaho kha aletare ḽi tshi ri: “Yehova Mudzimu, Ramaanḓaoṱhe, khaṱulo dzau ndi dza ngoho nahone dzo luga.”
8 Wa vhuṋa a tevhulela mudzio wawe kha ḓuvha; ḓuvha ḽa ṋewa maanḓa a u fhisa vhathu nga mulilo.
9 Vhathu vha swa nga mufhiso muhulu, fhedzi vha sema dzina ḽa Mudzimu ane a vha na maanḓa a dzenedzo ṱhamu, nahone vha si rembuluwe na u mu ṋea vhugala.
10 Wa vhuṱanu a tevhulela mudzio wawe kha khuluṋoni ya ḽivhanda. Muvhuso waḽo wa swifhala, vha thoma u ḓishengekanya ndimi nga u pfa vhuṱungu,
11 fhedzi vha sema Mudzimu wa ṱaḓulu nga nṱhani ha u pfa vhuṱungu na nga u pfa u vhavha ha zwilonda zwavho, nahone vha si rembuluwe kha mishumo yavho.
12 Wa vhurathi a tevhulela mudzio wawe mulamboni muhulu wa Furata, nahone maḓi awo a xa, uri hu lugiselwe nḓila ya mahosi a bvaho vhubvaḓuvha.
13 Nda vhona mibulo miraru yo hevhedzwaho i re na tshika ye ya vha i tshi nga zwiḓula i tshi bva mulomoni wa ḽigweṋa na wa ḽivhanda na wa muporofita wa mazwifhi.
14 Ndi mibulo yo hevhedzwaho nga madimoni nahone i ita zwiga, i ya kha mahosi a ḽifhasi ḽoṱhe, ya a kuvhanganyela nndwani ya ḓuvha ḽihulu ḽa Mudzimu Ramaanḓaoṱhe.
15 “Huno ndi khou ḓa sa mbava. U a takala ane a dzula o fhaṱuwa uri vha si mu dzhiele zwiambaro zwawe zwa nga nnḓa, uri a si tshimbile e fhedzi a vho shona vhukati ha vhathu.”
16 Nahone a vha kuvhanganyela fhethu hune nga Luheberu ha pfi Haramagedo.
17 Muruṅwa wa vhusumbe a tevhulela mudzio wawe muyani. Ha pfala ipfi ḽi bvaho nḓuni khethwa ḽi tshi bva kha khuluṋoni, ḽi tshi ri: “Ndi hone zwo fhela!”
18 Ha vha na dziphenyo na maipfi na mibvumo, ha vha na mudzinginyo muhulu, u sa athu vhuya wa vha hone u bva tshee vhathu vha sikwa kha ḽifhasi, wo vha u mudzinginyo muhulu vhukuma.
19 Muḓi muhulu wa fhanduwa wa bva zwipiḓa zwiraru, na miḓi ya vha dzitshaka ya wa; nahone Mudzimu a humbula Babele Ḽihulu uri a ḽi ṋee tshinwelo tsha waini ya vhuhali ha mbiti dzawe.
20 Zwiṅwe hafhu, zwiṱangadzime zwoṱhe zwa shavha, na thavha dzi si tsha wanala.
21 Matombo mahulu a tshifhango, e ḽiṅwe na ḽiṅwe ḽao ḽa vha ḽi tshi ṱoḓa u lingana na talente* nga tshileme, a wela vhathu a tshi bva ṱaḓulu, huno vhathu vha sema Mudzimu nga nṱhani ha ṱhamu ya tshifhango, ngauri yo vha i khulwane vhukuma.
Ṱhaluso dzi re magumoni a siaṱari
^ Ndi tshileme tshi ṱoḓaho u vha khilogireme dza 20,4.
