Nzumbululo 17:1-18
17 Muṅwe wa vharuṅwa vha sumbe vhe vha vha vhe na midzio ya sumbe a ḓa kha nṋe a ri: “Iḓa ndi u sumbedze nḓila ine phombwe khulu yo dzulaho kha maḓi manzhi ya ḓo haṱulwa ngayo,
2 ye mahosi a ḽifhasi a ita vhupombwe nayo, nahone vhadzulapo vha ḽifhasi vha kambiwa nga waini ya vhupombwe hayo.”
3 A nkhwala nga maanḓa a muya a nnyisa sogani. Huno nda vhona mufumakadzi o ṋamela ḽivhanda ḽitswuku-tswuku ḽe ḽa vha ḽo ḓala madzina a maṱamba na ḽe ḽa vha ḽi na ṱhoho dza sumbe na ṋanga dza fumi.
4 Onoyo mufumakadzi o vha o ambara zwiambaro zwa phephulu na zwitswuku-tswuku, o ḓinakisa nga musuku na matombo a thengo khulu na vhulungu, tshanḓani tshawe o vha o fara tshinwelo tsha musuku tshe tsha vha tsho ḓala nga zwithu zwi nengisaho na zwithu zwa dzitshika zwa vhupombwe hawe.
5 Kha phanḓa yawe ho vha ho ṅwalwa dzina ḽine ḽa vha ḽa tshiphiri: “Babele Ḽihulu, mme a dziphombwe na zwithu zwi nengisaho zwa ḽifhasi.”
6 Nda vhona onoyo mufumakadzi o kambiwa nga malofha a vhakhethwa na nga malofha a ṱhanzi dza Yesu.
Huno musi ndi tshi mu vhona nda kanuka zwihulu.
7 Ngauralo, muruṅwa a amba na nṋe a ri: “Ndi ngani u tshi kanuka? Ndi ḓo u vhudza tshiphiri tsha mufumakadzi na tsha ḽivhanda ḽi re na ṱhoho dza sumbe na ṋanga dza fumi ḽo hwalaho phombwe:
8 Ḽivhanda ḽe wa ḽi vhona ḽo vha ḽi hone, fhedzi a ḽi tsheeho, naho zwo ralo ḽi tsini na u bva mugodini, nahone nga murahu ḽa fheliswa. Vhadzulapo vha ḽifhasi—vhe madzina avho a si ṅwalwe kha mupombo wa vhutshilo u bva tshee shango ḽa sikwa—vha ḓo kanuka musi vha tshi vhona uri ḽivhanda ḽo vha ḽi hone, fhedzi a ḽi tsheeho, nahone ḽi ḓo dovha ḽa vha hone.
9 “Zwenezwi zwi ṱoḓa ṱhalukanyo na vhuṱali: Ṱhoho dza sumbe dzi imela thavha dza sumbe, dze mufumakadzi a dzula nṱha hadzo.
10 Nahone hu na mahosi a sumbe: maṱanu o fa, khosi nthihi i tshee hone, iṅwe a i athu swika, fhedzi musi i tshi swika i ḓo vha hone lwa tshifhinganyana.
11 Ḽivhanda ḽe ḽa vha ḽi hone, fhedzi ḽi si tsha vha hone, na ḽone ndi khosi ya vhumalo, ḽi bva kha aḽa mahosi a sumbe, na ḽone ḽi ḓo fheliswa.
12 “Huno ṋanga dza fumi dze wa dzi vhona dzi imela mahosi a fumi, a sa athu wana muvhuso, fhedzi a ṋewa maanḓa a u vhusa sa mahosi khathihi na ḽivhanda awara nthihi.
13 Eneo mahosi a na muhumbulo u fanaho nahone a ṋea ḽivhanda maanḓa ao na muvhuso wao.
14 A ḓo lwa na Ngwana, fhedzi ngauri i Murena wa marena na Khosi ya mahosi, Ngwana i ḓo a kunda. Zwiṅwe hafhu, na vha re nayo vho vhidzwaho na vho nangwaho na vha fulufhedzeaho vha ḓo kunda.”
15 Muruṅwa a amba na nṋe a ri: “Maḓi e wa a vhona, e phombwe ya dzula khao, a imela vhathu, gogo na dzitshaka na dzindimi.
16 Ḽivhanda ḽine ḽa vha na ṋanga dza fumi ḽe wa ḽi vhona, ḽi ḓo vhenga phombwe ḽa i bvula ya sala i fhedzi, ḽa ḽa ṋama yayo nahone ḽa i fhisa tshoṱhe nga mulilo.
17 Ngauri Mudzimu o dzhenisa mbiluni dzavho zwine a zwi humbula, uri vha humbule zwi fanaho nga u ṋea ḽivhanda muvhuso wavho, u swikela zwe Mudzimu a zwi amba zwi tshi khunyelela.
18 Nahone mufumakadzi we wa mu vhona u imela muḓi muhulu une wa vhusa mahosi a ḽifhasi.”
