Nzumbululo 18:1-24
18 Nga murahu ha zwenezwo zwithu, nda vhona muṅwe muruṅwa a tshi tsa a tshi bva ṱaḓulu, e na maanḓa mahulu; ḽifhasi ḽa vhonetshelwa nga vhugala hawe.
2 A vhidzelela nga ipfi ḽihulu, a ri: “Ḽo wa! Babele Ḽihulu ḽo wa, ḽo no vha vhudzulo ha madimoni na ha mimuya yoṱhe ya dzitshika na zwiṱaha zwa zwiṋoni zwoṱhe zwa dzitshika na zwi vhengwaho.
3 Nga nṱhani ha waini ya nyemulo ya vhupombwe hawe, tshaka dzoṱhe dzo kambiwa, na mahosi oṱhe a ḽifhasi o ita vhupombwe nae, na vhavhambadzi vha ḽifhasi vho pfuma nga nṱhani ha maanḓa a lupfumo lwawe lune a lu ṱongisa.”
4 Nda pfa ḽiṅwe ipfi ḽi tshi bva ṱaḓulu ḽi tshi ri: “Ibvani khaḽo, vhathu vhanga, arali ni sa ṱoḓi u vha na mukovhe kha zwivhi zwaḽo, ni sa ṱoḓi u baḓekanywa kha ṱhamu dzaḽo.
5 Zwivhi zwaḽo zwo ṱhophana u guma nga ḽiṱaḓulu, nahone Mudzimu ho ngo hangwa zwiito zwaḽo zwa vhutshinyi.
6 U ḽi lifhedze zwe ḽa ita vhaṅwe, u ḽi lifhedze kavhili kha zwithu zwe ḽa zwi ita; kha tshinwelo tshaḽo u ḽi ṱanganyisele kavhili.
7 U ya nga nḓila ye ḽa ḓihudza ngayo na u tshila vhutshilo ha u ḓiṱongisa, nga nṱhani ha zwenezwo, u ḽi tambudze ḽi lile. Ngauri ḽi dzulela u amba uri, ‘Ndo dzula sa khosi ya mufumakadzi, a thi tshilikadzi, a thi nga ḓo vhuya nda ṱungufhala.’
8 Ndi ngazwo nga ḓuvha ḽithihi ḽi tshi ḓo ḓelwa nga ṱhamu, lufu, u ṱungufhala na nḓala, nahone ḽi ḓo fhiswa tshoṱhe nga mulilo, ngauri Yehova Mudzimu, we a ḽi haṱula, u na maanḓa.
9 “Mahosi a ḽifhasi e a ita vhupombwe naḽo na e a tshila naḽo kha vhutshilo haḽo ha u ḓiṱongisa a ḓo ḽi ṱungufhalela na u ḽi lilela, musi a tshi vhona vhutsi ha u fhiswa haḽo.
10 A ḓo imela kule nga nṱhani ha u ofha u tambudzwa haḽo nahone a ḓo ri, ‘Yawee, yawee, muḓi muhulu, iwe Babele wa maanḓa, ngauri khaṱulo yau yo swika nga awara nthihi!’
11 “Zwiṅwe hafhu, vhavhambadzi vha ḽifhasi vha khou ḽi ṱungufhalela na u ḽi lilela, ngauri a hu na ane a renga thundu dzavho
12 dza musuku, tsimbi-tseṱha, matombo a thengo khulu, vhulungu, malabi avhuḓi, malabi a phephulu, malabi a siliga, malabi matswuku-tswuku; na zwithu zwoṱhe zwo itwaho nga thanda i nukhelelaho, zwithu zwoṱhe zwo itwaho nga ṋanga dza nḓou, thanda dza thengo khulu, tsimbi-tswuku, tsimbi, mavhulu;
13 na sinamoni, zwilungi zwa India, zwioro, mapfura a nukhelelaho, zwioro zwitshena, waini, mapfura a muṱwari, fulauru, goroi, kholomo, nngu, bere, gariki, vhalanda na vhathu.
14 Mutshelo wavhuḓi we wa vha u tshi u tama wo u ṱutshela, madzanga au oṱhe na zwithu zwa maṱeleṱele zwo ngala-ngala, a zwi tsha ḓo dovha zwa wanala.
15 “Vhavhambadzi vhe vha vha vha tshi rengisa zwenezwo zwithu, vhe vha pfuma nga nṱhani haḽo, vha ḓo imela kule ngauri vha ḓo vha vha tshi khou ofha u tambudzwa haḽo nahone vha ḓo ṱungufhala na u lila,
16 vha ri, ‘Yawee, yawee—muḓi muhulu wo ambaraho malabi avhuḓi a phephulu na matswuku-tswuku, wo khavhiswaho nga musuku u ḓuraho na matombo a thengo khulu na vhulungu,
17 ngauri lwonolwo lupfumo luhulu lwo mbo ḓi fhela nga awara nthihi!’
“Mutshimbidzi muṅwe na muṅwe wa tshikepe na muṅwe na muṅwe ane a tshi ṋamela, na vhaalavhi na vhoṱhe vhane vha tshila nga zwa lwanzheni vha imela kule
18 musi vha tshi vhona vhutsi ha musi ḽi tshi khou swa, vha vhidzelela vha ri, ‘Ndi muḓi ufhio une wa nga muḓi muhulu?’
19 Vha ḓishela buse kha ṱhoho dzavho vha vhidzelela vho ṱungufhala vha tshi khou lila, vha ri, ‘Yawee, yawee—muḓi muhulu, we vhoṱhe vhane vha vha na zwikepe lwanzheni vha pfuma nga lupfumo lwawo, ngauri wo lozwiwa nga awara nthihi!’
20 “Iwe ḽiṱaḓulu na inwi vhakhethwa na vhaapostola na vhaporofita, takalelani zwe zwa itea khaḽo, ngauri Mudzimu o ḽi haṱula a tshi itela inwi!”
21 Muṅwe muruṅwa wa maanḓa a takula tombo ḽi ngaho guyo ḽihulu a ḽi posa lwanzheni, a ri: “Babele muḓi muhulu u ḓo poswa lwanzheni nga u ṱavhanya nga yeneyi nḓila, nahone a u tsha ḓo dovha wa wanala.
22 Na vhaimbi vhe vha vha vha tshi khou lidza zwihwana na vhalidzi vha zwiṱiringo na vhalidzi vha phalaphala na vhaṅwe vhaimbi a vha tsha ḓo dovha vha pfiwa. A hu tsha ḓo dovha ha wanala muvhaḓi ane a ita mushumo naho u ufhio, a hu tsha ḓo pfala u kuya ha guyo.
23 A hu tsha ḓo vha na tshedza tsha luvhone tshine tsha ḓo dovha tsha vhonetshela, a hu tsha ḓo dovha ha pfala ipfi ḽa mukwasha na ḽa muselwa. Ngauri vhavhambadzi vhau vho vha vhe vhanna vha vhuimo ha nṱha kha ḽifhasi, ngauri wo xedza tshaka dzoṱhe nga vhungome hau.
24 Khaḽo ho wanala malofha a vhaporofita na a vhakhethwa na vhoṱhe vhe vha vhulahwa kha ḽifhasi.”
