Nzumbululo 2:1-29
2 “Ṅwalela muruṅwa wa tshivhidzo tsha Efesa uri: Hezwi ndi zwine zwa khou ambiwa nga o faraho ṋaledzi dza sumbe tshanḓani tshawe tsha u ḽa, ane a tshimbila vhukati ha zwiṱomambone zwa sumbe zwa musuku,
2 ‘mishumo yau ndi a i ḓivha, na u ḓidina hau na u konḓelela, na uri a u koni u konḓelela vhathu vhavhi, u linga vhane vha amba uri vha vhaapostola, fhedzi vhe si vhaapostola, ngeno vhe vhazwifhi.
3 Zwiṅwe hafhu, u a konḓelela, nahone wo sumbedza u sa fhela mbilu u tshi itela dzina ḽanga, u sa neti.
4 Naho zwo ralo, ndi u kaidzela uri wo litsha lufuno lwe wa vha u nalwo u thomani.
5 “‘Nga zwenezwo, humbula he wa wa u hone, nahone u rembuluwe u ite mishumo ye wa vha u tshi i ita u thomani. Arali wa sa rembuluwa, ndi ḓo u ḓela nahone nda bvisa tshiṱomambone tshau vhudzuloni hatsho.
6 Zwine wa khou ita zwavhuḓi ndi uri u vhenga mishumo ya tshigwada tsha Nikolai ine na nṋe nda i vhenga.
7 Ane a vha na nḓevhe nga a pfe zwine muya wa vhudza zwivhidzo: Kha ane a kunda ndi ḓo mu tendela uri a ḽe muri wa vhutshilo, une wa vha paradisoni ya Mudzimu.’
8 “Ṅwalela muruṅwa wa tshivhidzo tsha Simirina uri: Khezwi zwine a zwi amba, ‘ene wa u Thoma na wa u Fhedza,’ we a fa nahone a dovha a tshila,
9 ‘ndi a ḓivha vhuṱungu hau na vhushai hau—fhedzi wo pfuma—na u semiwa nga vhane vha ḓivhidza Vhayuda vhe si Vhayuda, ngeno vhe sinagogo ya Sathane.
10 U songo ofha u tambudzwa hune wa ḓo sedzana naho zwenezwino. Diabolo u ḓo dzula a tshi kudza vhaṅwe vhaṋu dzhele uri ni lingwe nga vhuḓalo, na uri ni tambudzwe maḓuvha a fumi. I vha a fulufhedzeaho u swika lufuni, nahone ndi ḓo u ṋea khare ya vhutshilo.
11 Ane a vha na nḓevhe nga a pfe zwine muya wa vhudza zwivhidzo: Ane a kunda ha nga itwi tshithu na tshithihi nga lufu lwa vhuvhili.’*
12 “Ṅwalela muruṅwa wa tshivhidzo tsha Peregamo uri: Khezwi zwine zwa khou ambiwa nga ane a vha na banga ḽilapfu ḽi re na vhuhali, ḽa mutshea-hoṱhe,
13 ‘ndi a ḓivha hune wa dzula hone, hune ha vha na khuluṋoni ya Sathane; naho zwo ralo, u dzula wo farelela dzina ḽanga, huno a wo ngo landula u vha hau na lutendo kha nṋe na nga misi ya Antipa, ṱhanzi yanga i fulufhedzeaho, we a vhulahwa ni hone henefho hune Sathane a dzula hone.
14 “‘Naho zwo ralo, hu na zwithu zwi si gathi zwine nda ḓo u kaidzela zwone, zwa uri u na vhane vha tevhedza pfunzo ya Bileamu, we a gudisa Balaka uri a vhee tshikhukhulisi phanḓa ha vharwa vha Isiraele, uri vha ḽe zwiṱhavhelo zwo itelwaho midzimu ya zwifanyiso na uri vha ite vhupombwe.
15 Na iwe u dovha wa vha na vhane vha tevhedza pfunzo ya tshigwada tsha Nikolai.
16 Ngauralo, rembuluwa. Arali wa sa ita nga u ralo, ndi ḓo u ḓela nga u ṱavhanya nda lwa navho nga banga ḽilapfu ḽa mulomo wanga.
17 “‘Ane a vha na nḓevhe nga a pfe zwine muya wa vhudza zwivhidzo: Ane a kunda ndi ḓo mu ṋea iṅwe ya mana yo dzumbwaho, ndi ḓo mu ṋea tombo ḽitshena, nahone kha ḽeneḽo tombo hu ḓo vha ho ṅwalwa dzina ḽiswa ḽi sa ḓivhiwi nga muthu nga nnḓa ha we a ḽi ṋewa.’
18 “Ṅwalela muruṅwa wa tshivhidzo tsha Thiathira uri: Khezwi zwine Murwa wa Mudzimu a zwi amba, ane a vha na maṱo a ngaho khavhu ya mulilo, ane milenzhe yawe ya nga tsimbi-tswuku i penyaho,
19 ‘ndi a ḓivha mishumo yau, na lufuno lwau, lutendo lwau, vhuḓinḓa hau, na u konḓelela hau, uri mishumo yau ya zwino i fhira ya u thomani.
20 “‘Naho zwo ralo, ndi u kaidzela uri u tendela onoyu mufumakadzi Isebele, ane a ḓivhidza muporofita wa mufumakadzi, ane a gudisa na u xedza vhalanda vhanga uri vha ite vhupombwe na uri vha ḽe zwiṱhavhelo zwo itelwaho midzimu ya zwifanyiso.
21 Huno ndo mu ṋea tshifhinga tsha uri a rembuluwe, fhedzi ho ngo ḓiimisela u rembuluwa kha vhupombwe hawe.
22 Hu si kale ndi ḓo ita uri a lwale vhukuma, na vhane a ṱonḓola navho ndi ḓo ita uri vha welwe nga vhuṱungu vhuhulu, arali vha sa rembuluwa kha mishumo yawe.
23 Ndi ḓo vhulaha vhana vhawe nga dwadze, uri zwivhidzo zwoṱhe zwi ḓivhe uri ndi nṋe ane a ṱolisisa mihumbulo ya nga ngomu-ngomu* na dzimbilu, nahone ndi ḓo ṋea muṅwe na muṅwe waṋu u ya nga mishumo yawe.
24 “‘Naho zwo ralo, kha vhoṱhe vha re Thiathira ndi ri, vhoṱhe vha sa tevhedzi yeneyi pfunzo, vhe vha vha vha sa ḓivhi zwine zwa vhidzwa “zwithu zwo dzikaho,” zwine zwa bva ha Sathane: a thi khou ni hwesa muṅwe muhwalo.
25 Zwi ngaho zwenezwo, farelela kha zwine wa vha nazwo u swika ndi tshi ḓa.
26 Kha ane a kunda na ane a tevhedza mishumo yanga u swika vhufheloni ndi ḓo mu ṋea maanḓa kha dzitshaka,
27 nahone u ḓo lisa vhathu nga lubaḓa lwa tsimbi uri vha pwashekane sa midzio ya vumba, vhunga ndo ṋewa zwenezwo nga Khotsi anga.
28 Ndi ḓo mu ṋea ṋaledzi ya nga matsheloni.*
29 Ane a vha na nḓevhe nga a pfe zwine muya wa vhudza zwivhidzo.’
Ṱhaluso dzi re magumoni a siaṱari
^ Zwine zwa amba uri “lufu lwa tshoṱhe.”
^ Ṱhalutshedzelo ya ipfi nga ipfi i ri “dzitswio.”
^ Masase.
