Nzumbululo 20:1-15
20 Nda vhona muruṅwa a tshi tsa a tshi bva ṱaḓulu o fara khoṋo ya mugodi na ngeḓane khulu.
2 A fara ḽigweṋa, ḽiṋowa ḽa kale na kale, ḽine ḽa vha Diabolo na Sathane, a ḽi vhofha miṅwaha ya tshigidi.
3 A ḽi posa mugodini, a u vala, a shatela uri ḽi si tsha ḓo kona u xedza dzitshaka u swikela miṅwaha ya tshigidi i tshi fhela. Nga murahu ha zwenezwi zwithu ḽi fanela u vhofhololwa lwa tshifhinganyana.
4 Nda vhona dzikhuluṋoni, vho dzulaho khadzo vho ṋewa maanḓa a u haṱula. Nda vhona vhathu vhe vha vhulahelwa* u ṱanziela nga ha Yesu na u amba nga ha Mudzimu. A vho ngo rabela ḽivhanda kana tshifanyiso tshaḽo kana u swaiwa kha phanḓa dzavho na zwanḓani zwavho. Vha vuswa nahone vha vhusa sa mahosi na Kristo miṅwaha ya tshigidi.
5 (Vhaṅwe vhafu vha si vuswe u swikela hu tshi fhela miṅwaha ya tshigidi.) Yeneyi ndi mvuwo ya u thoma.
6 Muṅwe na muṅwe ane a ḓo vuswa nga mvuwo ya u thoma u a takala nahone ndi mukhethwa; lufu lwa vhuvhili a lu na maanḓa kha vhenevha, fhedzi vha ḓo vha vhotshifhe vha Mudzimu na Kristo, nahone vha ḓo vhusa sa mahosi nae miṅwaha ya tshigidi.
7 Musi miṅwaha ya tshigidi yo no fhela, Sathane u ḓo vhofhololwa dzhele,
8 nahone u ḓo bva a ya u xedza tshaka dzi re khuḓani nṋa dza ḽifhasi, Gogo na Magogo, u itela u vha kuvhanganyela nndwani. Tshivhalo tshavho tshi ḓo nga muṱavha wa lwanzhe.
9 Vha phaḓalala na ḽifhasi ḽoṱhe vha tanga mushasha wa vhakhethwa na muḓi u funwaho. Fhedzi ha wa mulilo u tshi bva ṱaḓulu wa vha fhedza.
10 Diabolo we a vha xedza a poswa dzivhani ḽa mulilo na tsevhela, hune ha vha na ḽivhanda na muporofita wa mazwifhi; nahone vha ḓo tambudzwa vhusiku na masiari lini na lini.
11 Nda vhona khuluṋoni khulu tshena na o dzulaho khayo. Ḽifhasi na ḽiṱaḓulu zwa shavha phanḓa hawe, zwa si tsha dovha zwa wanala.
12 Nda vhona vhafu, vhahulwane na vhaṱuku, vho ima phanḓa ha khuluṋoni, mipombo ya vulwa. Fhedzi ha vulwa muṅwe mupombo; ndi mupombo wa vhutshilo. Vhafu vha haṱulwa nga zwo ṅwalwaho kha mipombo u ya nga mishumo yavho.
13 Lwanzhe lwa bvisa vhafu vha re khalwo, na lufu na Vhudzulavhafu* zwa bvisa vhafu vha re khazwo, vha haṱulwa nga muthihi nga muthihi u ya nga mishumo yavho.
14 Lufu na Vhudzulavhafu zwa poswa dzivhani ḽa mulilo. Ḽeneḽi dzivha ḽa mulilo ḽi imela lufu lwa vhuvhili.
15 Zwiṅwe hafhu, muṅwe na muṅwe a songo ṅwalwaho buguni ya vhutshilo a poswa dzivhani ḽa mulilo.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “vho vhulahwaho nga mbaḓo.”
^ Nga Lugerika ndi haiʹdes. Sedzani Ṱhumetshedzo 7.
