Nzumbululo 21:1-27
21 Nda vhona ḽiṱaḓulu ḽiswa na ḽifhasi ḽiswa; ngauri ḽiṱaḓulu ḽa kale na ḽifhasi ḽa kale zwo vha zwo fhira, na lwanzhe lu si tsheeho.
2 Nda vhona muḓi mukhethwa, Yerusalema muswa, u tshi tsa u tshi bva ṱaḓulu ha Mudzimu nahone wo lugiselelwa sa muselwa o ṱamelwa munna wawe.
3 Nda pfa ipfi ḽihulu ḽi tshi bva kha khuluṋoni ḽi tshi ri: “Asiyo! Nnḓu ya mulanga* ya Mudzimu vhukati ha vhathu, huno u ḓo dzula navho, nahone vha ḓo vha vhathu vhawe. Mudzimu ene a vha navho.
4 U ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.”
5 O dzulaho kha khuluṋoni a ri: “Vhonani! Zwoṱhe ndi zwi ita zwiswa.” A dovha a ri: “Ṅwala, ngauri haya maipfi ndi a fulufhedzeaho a dovha a vha a ngoho.”
6 A amba na nṋe a ri: “Zwo khunyelela! Ndi nṋe Alfa na Omega, mathomo na magumo. Naho e nnyi a re na ḓora ndi ḓo mu ṋea nga fhedzi maḓi a vhutshilo a bvaho tshisimani.
7 Muṅwe na muṅwe ane a kunda u ḓo ḽa ifa ḽa zwenezwi, nahone ndi ḓo vha Mudzimu wawe, ene a vha murwa wanga.
8 Fhedzi magoswi na vha si na lutendo na vha nengisaho nga tshika dzavho na vhavhulahi na dziphombwe na vhadzia-vhungome na vhane vha gwadamela midzimu ya zwifanyiso na vhadzia-u-zwifha, mukovhe wavho u ḓo vha dzivhani ḽi dugaho mulilo na tsevhela. Zwenezwi zwi amba lufu lwa vhuvhili.”
9 Ha ḓa muṅwe wa vharuṅwa vha sumbe vhe vha vha vho fara midzio ya sumbe, ye ya vha yo ḓala ṱhamu dza sumbe dza u fhedzisela, a amba na nṋe a ri: “Iḓa, ndi ḓo u sumbedza muselwa, mufumakadzi wa Ngwana.”
10 A nkhwala nga maanḓa a muya a nnyisa thavhani ndapfu, a ntsumbedza muḓi mukhethwa wa Yerusalema u tshi tsa u tshi bva ṱaḓulu ha Mudzimu
11 u na vhugala ha Mudzimu. Wo vha u tshi penya sa tombo ḽa thengo khulu, sa tombo ḽa yasipere ḽi vhonadzaho.
12 Wo vha u na luvhondo luhulwane na khoro dza fumi-mbili (12), henefho khoroni hu na vharuṅwa vha fumi-mbili, nahone dzikhoroni ho ṅwalwa madzina a tshaka dza fumi-mbili dza vharwa vha Isiraele.
13 Vhubvaḓuvha ho vha hu na khoro tharu, devhula hu na khoro tharu, tshipembe hu na khoro tharu, na vhukovhela hu na khoro tharu.
14 Luvhondo lwonolwo lwa muḓi lwo vha lwo thewa kha matombo a fumi-mbili, kha eneo matombo ho vha hu na madzina a vhaapostola vha Ngwana vha fumi-mbili.
15 We a vha a tshi khou amba na nṋe o vha o fara luṱanga lwa musuku lwa u ela, uri a kone u ela muḓi na khoro dzawo na mbondo dzawo.
16 Muḓi wonoyo wo vha u na khuḓa nṋa, vhulapfu hawo vhu tshi eḓana na vhuphara hawo. A ela muḓi nga luṱanga, wa vha khilomithara dzi ṱoḓaho u vha 2 220; vhulapfu na vhuphara hawo na u ya nṱha zwi tshi lingana.
17 A dovha a ela na luvhondo lwawo, lwa vha khubithi dza 144, nga kuelele kwa vhathu, wonoyo ndi muelo u fanaho na we muruṅwa a u shumisa.
18 Huno luvhondo lwo vha lwo itwa nga matombo a yasipere, nahone muḓi wo vha wo fhaṱwa nga musuku u songo vanganaho u tshi nga ngilasi i vhonadzaho.
19 Mitheo ya luvhondo lwa muḓi yo vha yo khavhiswa nga matombo a thengo khulu a mifuda yoṱhe: mutheo wa u thoma wo vha u wa yasipere, wa vhuvhili u wa safire, wa vhuraru u wa khalisidoni, wa vhuṋa u wa emeralidi,
20 wa vhuṱanu u wa saradonekisi, wa vhurathi u wa saradiasi, wa vhusumbe u wa krisolaithi, wa vhumalo u wa berili, wa vhuṱahe u wa thophasi, wa vhufumi u wa krisporasi, wa vhufumi-nthihi u wa haisenthe, wa vhufumi-mbili u wa amethisi.
21 Zwiṅwe hafhu, khoro dza fumi-mbili dzo vha dzo itwa nga nungu dza fumi-mbili; khoro iṅwe na iṅwe yo vha yo itwa nga nungu nthihi. Nahone khoro khulwane ya muḓi yo vha yo itwa nga musuku u songo vanganaho u tshi nga ngilasi i vhonadzaho.
22 Nahone kha wonoyo muḓi a tho ngo vhona thembele, ngauri thembele yawo ndi Yehova Mudzimu Ramaanḓaoṱhe na Ngwana.
23 Wonoyo muḓi a u ṱoḓi u vhonetshelwa nga ḓuvha kana ṅwedzi, ngauri vhugala ha Mudzimu vhu a u vhonetshela, nahone luvhone lwawo lwo vha lu Ngwana.
24 Tshaka dzi ḓo tshimbila kha tshedza tshawo, na mahosi a ḽifhasi a ḓo u ḓisela vhugala hao khawo.
25 Khoro dzawo dzi ḓo dzula dzo vulea ḓuvha ḽoṱhe, ngauri a hu tsha ḓo vha na vhusiku henefho.
26 Vha ḓo ḓisa vhugala na khuliso zwa tshaka khawo.
27 Fhedzi tshiṅwe na tshiṅwe tshi re na tshika na muthu muṅwe na muṅwe ane a ita zwi nengisaho na zwa vhufhura ha nga dzheni khawo na luthihi; hu ḓo dzhena fhedzi vho ṅwalwaho kha mupombo wa vhutshilo wa Ngwana.
Ṱhaluso dzi re magumoni a siaṱari
^ Ṱhalutshedzelo ya ipfi nga ipfi i ri “dennde.”
